Dama a bisa Hues cu e no kier su yiu mas den cas
ORANJESTAD (AAN): Diahuebs mainta e homber di inicial C. di 42 aña, a presenta dilanti Hues pa e caso penal cu Ministerio Publico a cuminsa contra dje. El a bin cu un pastor di Centro Alianza, na unda C. ta kedando pa rehabilita. Den sala di Corte tabata presente e mama di C., esta señora P.
Fiscal a bisa cu e acusacion contra C. ta cu riba 23 December 2023, e homber a tribi na menaza su mama P. cu morto, y di lo bay cende e cas.
Homber ta menaza su propio mama: Hues a bisa C., cu e tin hopi aña tratando casonan penal y e ta hopi asombra cu e caso aki. Hues no por compronde cu C. ta bay asina leu di menaza su propio mama cu e lo kima e cas y mat’e. Hues a mustra cu na Polis C. a bisa cu el a bisa esey pero no kiermen cu e lo haci’e.
Hues a remarca cu e expresionnan aki ta spanta e mama. Hues a puntra, con C. a yega asina leu.
Segun C. a bisa, cu el a lanta y crece cu su mama cu tin un caracter fuerte. El splica Hues cu su mama mes a pidi’e pa bay biba cun’e. C. tabata biba cu su pareha pero e pareha a bay lag’e y esaki a afect’e asina hopi cu el a bay bebe.
- a bisa cu actualmente e ta na Centro Alianza pa rehabilita pa uso di alcohol. El a bisa cu e no ta usa droga y e ta recuperando satisfactorio. El a bisa cu e ta stima su mama hopi pero nunca el a pensa cu cos a bay asina. Awor e ta realiza cu el a haci malo. El a bisa Hues cu e tin contacto cu su mama y a pidi’e pordon.
Mama no kier e homber mas den cas: Hues a puntra e mama con e situacion ta. E mama a bisa Hues cu asina C. bebe, e ta bira problematico. E mama a bisa cu e kier pa un psychiater por atende su yiu. El a bisa cu e no kier pa C. bay cerca dje mas. El a pidi Hues si por haya un manera cu C. lo por haya un cas pa bay biba su so.
Hues a mustra cu tabatin un “Tom zitting” caminda a keda palabra cu C. mester bay curso di regulacion di agresion pero cu segun Reclassering, lamentabelmente e homber C. a haci nada.
Aki e homber C. a bin cu e storia, cu el a paga via online dos biaha y cu Reclassering a bisa cu e mester warda. El a bisa Hues cu dos biaha el a bay personal na Reclassering pero nada.
Fiscal a remarca cu segun documentonan di Ministerio Publico, e homber C. no a siña su les, pasobra dia 22 October 2024 (menos di 2 luna pasa), C. a bolbe menaza su mama. C. a bisa Hues cu riba indicacion di Reclassering el a bay Centro Alianza.
Fiscal: Fiscal a bisa cu e tambe ta asombra cu C. ta menaza su mama. Fiscal a mustra cu Polis a bay na e cas y a mira cu den e cas tabata hopi reboltea. Na opinion di Fiscal, por mira cu aki tin problema cu uso di alcohol.
Fiscal a exigi 30 ora di trabao pa comunidad of 60 dia sera. Esaki ta condicional cu 2 aña di prueba. Fiscal a exigi pa den e periodo di prueba, C. keda bou guia di Reclassering pa entre otro e curso di control di agresion.
Sentencia: Hues a sera tratamento di e caso y a dicta sentencia di biaha. E opinion di Hues ta cu e centro di tur e asunto aki ta e bebemento. Hues a bisa cu e menaza di mama ta un asunto serio. Hues a bisa C. cu no ta bunita di scucha cu C. a bolbe menaza su mama. Di otro banda, Hues a bisa cu ta bunita pa tende cu C. ta na un centro pa rehabilita. Hues ta haya cu ta bon pa C. cay bou guia di Reclasering.
Hues ta haya e exigencia di Fiscal na su lugar. Hues a condena C. na 38 ora di trabao, di cual 30 ora ta condicional cu 2 aña di prueba. E periodo di prueba, C, mester cay bao guia di Reclassering. Hues a splica cu e sentencia ta mas abao cu loke Fiscal a exigi pasobra Hues a kita e 4 dianan cu C. tabata sera, for di e 38 ora di trabao y pesey el a bira 30 ora.
