Procurador General ta insisti pa mantene 2 aña di prizon pa dama cu a viola otro dama

Procurador General ta insisti pa mantene 2 aña di prizon pa dama cu a viola otro dama

Acusado ta para riba cu e ta inocente

ORANJESTAD (AAN): E muhe di inicial C. di 22 aña, riba Diaranson mainta a bisa Hof di Corte Superior cu e ta cera inhustamente na Prizon di KIA pasobra e no a haci nada cu e dama di inicial R.  Pero Procurador General (PG) ta haya cu tin suficiente prueba cu ta mustra cu C. a viola e dama victima R. hunto cu e amigo di C., esta e homber di inicial V.  Pesey PG a pidi Hof pa keda mantene e castigo di 2 aña di prizon cu a wordo duna den Corte di Prome Instancia.

   Den sala di Corte tabata presente e mama di e dama victima R., kende a presenta cu e demanda di daño contra e muhe C.

   PG a acusa C. cu riba un Diamars 19 Maart 2024, hunto cu e homber V., a forza e dama R. pa haci relacion sexual cu e homber V.  PG ta considera esaki violacion y tambe actonan inmoral. PG a bisa cu e dama victima R. tabata den situacion for di tino y no por a dicidi kico tabata pasa cun’e.

    Viola dama: Hof a mustra cu Corte den Promer Instancia a condena C. pa violacion y a declara C. liber di a haci actonan inmoral cu R. cu tabata for di tino. Hof kier sa pakico C. a apela e sentencia. Segun C. e no ta di acuerdo cu e castigo pasobra e no a haci nada.

   Hof a bisa cu ta trata e caso riba e acusacion violacion. E presidente di Hof a bisa cu e esencia di violacion ta obliga un persona haci algo cu e no kier. Hof a mustra cu e homber V. a penetra e dama R., cu ta un amiga di C.,  sin cu R. tabata kier. E dama R. a declara na Polis cu nan a force, nan a kita su paña.  Pero segun C., no tabatin violacion. El a bisa Hof cu tabatin relacion sexual normal y ningun momento R. a bisa pa stop.

   Hof a remarca cu R. a grita pa stop y cu e tin dolor. Segun e dama C. ora cu R. a bisa pa stop, nan a stop. El a bisa cu e no a mira R. reacciona manera cu algo malo a pasa y R. no a reclama cu nan a haci malo cu ne. Segun C., R. a yama su amigo pa bay busc’e y R. a bay pafor di e apartamento.

   Polis ta haya victima ta yora: Hof a mustra cu pa casualidad un agente di Polis a pasa den su auto y a mira e dama R. sinta riba acera ta yora.  Aki e muhe C. a remarca na Hof, pakico Polis no a bay na e apartamento y puntra kico tabata pasando. Hof a bisa cu e dama R. a WhatsApp un amiga A. E amiga A. a declara na Polis cu R. tabata yora y R. a bisa cu nan tabata forz’e y cu nan tabata hacie dolor.

   Hof a remarca cu ademas cu Polis a haya R. tabata yora, a haya tur e combersacionnan riba su WhatsApp.  E anochi mes a hiba e victima R. pa Hospital y a manda muestra di DNA Hulanda caminda Instituto Forense di Hulanda (NFI), a haya indicacion cu R. lo por a wordo penetra. Hof a sigui bisa cu e homber V. a bisa cu e no a penetra R. El a bisa cu ora el a bay tene relacion sexual cu R., R. a bisa stop y el a stop.

      Demanda di daño: Hof a papia cu mama di R.  Hof a bisa cu un parti di demanda a keda aproba den Corte den Promer Instancia. Hof a puntra e mama, con ta bayendo cu e victima R. E mama a splica cu su yiu ta den un proceso. Tin dia e ta bon y tin dia e ta menos bon.

   Hof a bisa cu mas o menos 8 mil Florin di daño material y 10 mil Florin di daño inmaterial e mama a haci demanda. Ta asina cu Corte den Promer Instancia a aproba 5 mil Florin na daño inmaterial. E mama a bisa cu e ta mantene e demanda.

   PG a exigi pa mantene e 2 aña di prison: PG a bisa Hof cu 19 Maart 2024 den oranan di marduga, un Polis cu pa casualidad a pasa riba e caminda den su auto, a mira R. sinta riba acera y tabata yora. El a bay atende R. y a haya sa cu C. a force tene relacion sexual cu e homber V. E mesun dia R. a haci denuncia.

   Na November 2024, C. y V. a wordo deteni relaciona cu e denuncia. C. a wordo condena na 2 aña di prison y e mesun dia el a apela. PG a bisa Hof cu por a scucha C. bisa cu e no a haci nada. Na opinion di PG, Hues di Corte den Promer Instancia ta haya cu tin suficiente prueba y a condena C. pa violacion. Instituto Forense di Hulanda, NFI, ta mustra cu a haya DNA den parti intimo di R. y esaki ta mas di V. Ta asina cu V. ta keda para riba cu e no a penetra R.

   PG a bisa cu e declaracion di e muhe C. y homber V. no ta consistente y pesey no ta confiabel. PG. ta haya e declaracion di e victima R. ta confiabel y tin pruebanan di sosten. El a pidi Hof pa confirma e sentencia di 2 aña di prizon.

   Abogado: mr. Emerencia a cuestiona e hecho cu a dura 8 luna promer cu Polis a bay over na detene C. y V. Esaki a causa cu videonan y potretnan cu C. a saca di loke a sosode e anochi ey, a disparce. E abogado ta haya cu esakinan lo por trece claridad kico tur a sosode. Na opinion di abogado, tambe lo por a busca imagennan di videonan di seguridad na e lugarnan cu nan a bishita. E abogado ta haya cu esaki ta un fayo di parti di Ministerio Publico di a tarda. Esaki ta afecta tur e defensa di C.

   Na opinion di e abogado, door di esaki Corte lo por a dicidi cu Ministerio Publico ta no admisible. E abogado a bisa cu ta incomprendibel cu a tarda 8 luna promer cu a bay haci investigacion. E ta haya cu Hof mester reduci e castigo aunke cu dentro di poco C. ta caba di sinta su castigo.

   E abogado a mustra cu nan tur tres tabata trip y a bebe. Den auto nan a cuminsa mishi cu otro. Ningun hende a obliga R. pa bay na e apartamento di C. Den e apartamento tabatin relacion sexual caminda ora R. a bisa stop, nan a stop tambe. Na opinion di e abogado, e declaracion di R. ta diferente di loke C. y V. ta bisa pasobra tabatin relacion conhunto. E abogado a bisa cu e hecho cu a haya DNA den parti intimo di R., esey no kier men cu tabatin penetracion. E abogado a desmenti e declaracion di R. cu lo a blokia pa e sali for di e apartamento.

   Na opinion di abogado, R. no tabata mustra emocional y el a sali for di e apartamento di C. pa warda su amigo. E abogado a conclui cu no tin prueba convicente cu R. a wordo viola y mester declara C. liber.

   C. a bisa Hof cu e ta inocente y a sinta casi full su castigo inhusto.

Hof a sera tratamento di e caso y a bisa cu 4 Maart 2026 lo tin sentencia.