Abogado a reclama cu e traductor Chines ta di e otro partido
ORANJESTAD (AAN): Den Corte di Husticia, e huesnan di Hof di Corte Superior a haya nan confronta cu un situacion cu no a keda otro manera cu Hof mester a pospone e caso.
Ta asina cu Hof di Corte Superior mester a trata e apelacion di Ministerio Publico contra e decision di Hues di Corte den Promer Instancia, cu a declara e homber Chines Z.X. liber di intento di mata y intento di maltrato severo riba 30 Juni 2021.
Abogado a reclama: Promer cu tratamento di e caso, abogado mr. R. Marchena a bisa Hof cu e ta protesta contra e traductor Chines cu a bin pa traduci pa su cliente Chines Z.X.
E abogado a bisa cu e traductor Chines tabata presente dia di e incidente y e ta forma parti di e otro partido. E abogado a sigui bisa Hof cu riba e video ta mira e traductor presente.
Hof a rechaza traductor: Hof a papia cu e traductor Chines, kende a admiti cu e tabata presente riba e Diaranson 30 Juni 2021 na e Club Chines, ora e incidente a sosode pero cu esey no tin nada di haci cu su trabao. El a bisa cu e ta trahando cu Corte pa mas di 10 aña.
Hof a pospone e caso un rato pa evalua. E tres Huesnan cu ta forma Hof a bay reuni nan so y despues di un rato nan a bolbe.
Hof a bisa cu e ta sigui e peticion di abogado mr. R. Marchena pa no laga e traductor Chines traduci pa Z.X. Hof ta haya cu e traductor tabata presente dia di e incidente, dia 30 Juni 2021, caminda Z.X. lo a agredi un hende Chines den un reunion na Chines Club cu un chapi.
Caso posponi pa haya otro traductor: Hof a dicidi cu ta pospone e caso pa dia 22 Mei 2026 pa 8:30’or di mainta. Entretanto lo haci e tramitenan necesario pa via Hulanda, haya un traductor Chines. E ora ey e traductor lo haci traduccion via video conference cu Hulanda.
