Supremo a ordena Hof pa coregi e sentencia
ORANJESTAD (AAN): Diaranson for di mainta te den oranan di merdia, a trata e orden di Corte Supremo di Hulanda dirigi na Hof di Corte Superior, relaciona cu e sentencia contra Izak Principaal.
Corte Supremo a ordena Hof pa coregi e sentencia pasobra Hof a usa e ley hubenil contra Principaal, kende e tempo ey tabatin 17 aña y a conden’e na 4 aña di prison y tratamento obligatorio den un instituto. Corte Supremo di Hulanda ta haya cu no por condena Principaal na castigo hubenil y banda di esey tratamento obligatorio.
Hof mester coregi sentencia: E acusado a presenta dilanti Hof, mama di Principaal y tata y famia di e victima tabata presente. Hof a bisa cu Corte den Promer Instancia a usa e ley di adulto contra Principaal y a conden’e na 9 aña di prison.
A apela e sentencia y Hof a usa e ley hubenil y a condena Principaal na 4 aña di prison y tratamento obligatorio. Na October 2024, Corte Supremo a dicidi cu Hof no por condena castigo di prison y tratamento obligatorio den un instituto.
Culpable di delitonan serio: Hof a mustra cu Principaal, den un periodo di dos siman, a haci tres delito hopi serio. Hof a mustra cu 22 Mei 2021, Principaal a forma parti di un asalto na cas di un homber di edad. Principaal tabata arma cu machete y a bay cu e auto.
Dia 30 Mei 2021 na American Bar na San Nicolas, Principaal tabata envolvi den un drive-by shooting, caminda 4 persona a resulta herida. Principaal tabata den auto y Zulian Celaire a tira. Despues riba 4 Juni 202, Principaal a tira Sayuri Petronia (di 19 aña) mata. Hof ta haya cu aki ta 3 caso hopi serio y hororoso.
Principaal ta sigura cu el a cambia: Hof a bisa cu siguiendo e sentencia di Corte Supremo, e pregunta ta con mester castiga Principaal cu e tempo ey tabata menor di edad. Hof a mustra cu tin cantidad di raportnan di psychiaterio, psycologo, Reclasering, riba Principaal. Hof a puntra Principaal si el a pensa riba tur e cosnan aki y si nan lo bay bolbe sosode.
Izak Principaal a bisa Hof, cu e tempo ey droga a influenci’e cu el a haci loke no tabata bon. El a bisa cu e ta stima su famia hopi. Su mama a cuminsa yora. Por a mira cu Principaal tabata emociona y a bisa Hof cu e ta gusta yuda hende, haci deporte. El a bisa cu e tabatin partinan scur den su bida, manera usamento di droga. El a sigura Hof, su mama, cu el a laga e bida ey atras.
A pidi sorry na tata di Sayuri: Na dado momento Principaal a dirigi na Petronia, tata di Sayuri. El a bisa cu aunke e sa cu Petronia lo no kere, el a pidi disculpa pa loke el a haci.
Rapportnan preocupante riba Principaal: Hof a mustra cu for di e raportnan ta sali cosnan hopi preocupante. Nan ta mustra cu e chens pa Principaal bolbe haci e mesun cosnan, ta hopi halto. Nan ta papia di diferente personalidad di Principaal. Principaal a bisa cu e personalidadnan ey a cambia. Segun Principaal e trahadornan social di KIA a yud’e hopi y esey a pone compronde cu e mester cambia.
Hof a puntra abogado y PG si por usa raport di psychiater cu ta mas cu 1 aña bieu. Ambos a bisa cu no tin nada contra. Hof a mustra cu un psychiater a skirbi cu Principaal tin problema anti social y rasisti. Tambe ta papia di psycopata. Abogado mr. Kock a reclama Hof, cu ta bay mucho leu cu e observacion ey. Principaal a remarca cu e no ta asina. Hof a remarca cu den un periodo cortico Principaal a haci tres cos hopi horososo y cu Principaal no tabata worry cu nada.
Principaal a bisa cu e tempo ey e tabata hopi bou influencia di droga. El a bisa Hof cu loke Hof ta bisa, esey no ta su persona. El a bisa cu den KIA e ta gusta yuda, e ta bayendo school. El a remarca, con un psychiater por bisa cu e no ta gusta hende. El a remarca cu e gusta hunga basketball y con, si e tin e comportacion manera e raportnan ta bisa, e por hunga basketball cu otronan. Hof a remarca cu Principaal por hunga basketball sabiendo cu e ta usa e otronan. Principaal a bisa cu si e raport ta pint’e asina, e kier pa tin un raport nobo pa mira con el a cambia. Principaal a bisa cu e kier cambia su bida.
Hof a mustra cu e raport recien di 2023 di Reclasering ta mustra cu tempo cu Principaal a drenta KIA, e tabatin hopi problema cu otronan. Awor, Principaal a cambia hopi. Hof a remarca cu Principaal a pasa un hubentud hopi dificil cu su mama. Hof a bisa cu ta respeta e hecho cu e mama ta presente den Corte, pa yuda su yiu. Principaal a bisa cu su mama ta su super hero.
Procurador General a exigi 9 aña: Procurador General (PG) a bisa Hof cu den promer instancia, Hues a considera Principaal como adulto y conden’e na 9 aña di prison. Ta asina cu a apela e sentencia y Hof a dicidi castigo hubenil maximo cu ta 4 aña di prison y tratamento obligatorio den un institucion. Corte Supremo a cuestiona cu no por duna 2 castigo. E tempo ey Principaal tabatin 17 aña. PG a bisa cu mirando e delitonan di Principaal, mester di castigo di prison y tratamento obligatorio pa tempo largo.
Tin raport amplio di psycologo y PG ta haya cu mester considera Principaal como adulto y tratamento obligatorio. PG a pidi Hof pa confirma e condena di Hues esta 9 aña di prison. Si Hof dicidi pa tog castiga Principaal castigo hubenil, PG ta haya cu mester condena Principaal pa tratamento obligatorio den un institucion cera na Hulanda. PG a mustra Celaire a worde condena pa tratamento obligatorio na Hulanda y a haya esaki tambe.
Abogado: mr. Kock a bisa Hof, e no a kere cu awe lo bay asina profundo den e caso. El a bisa cu el a kere cu Hof a tuma un decision riba e instruccion di Corte Supremo pa dicidi sea castigo di prison of tratamento obligatorio. E ta haya cu Corte Supremo no a duna comentario si mester aplica castigo hubenil of no. E ta haya cu awor aki no tin nada di papia si e castigo mester ta hubenil of no. E unico cos cu mester dicidi si ta duna castigo hubenil of tratamento obligatorio.
Abogado a bisa Hof cu e kier enfatisa cu Principaal no ta un asesino. Abogado a bisa cu ta Celaire tabata esun cu a influencia Principaal. Ta Celaire a bay cu e arma na cas di Principaal y nan a cuminsa hunga cu e pistool y e accidente a sosode. E abogado a remarca, con por ta cu Celaire cu ta esun cu a tira riba otronan banda di American Bar y e ta haya tratamento obligatorio so.
Abogado ta di opinion cu Hof por condena Principaal na tratamento obligatorio na Aruba mes. E abogado a bisa cu lo bay dura hopi promer cu e tratamento obligatorio keda realisa pa Hulanda. Na opinion di mr. Kock, castigo hubenil no ta existi na Aruba. El a mustra cu Principaal ya a sinta 3 aña y ta keda solamente 7 luna pa e caba. El a menciona un ley cu Hof por pone e resto di e castigo, condicional pero cu condicion cu Principaal ta cay bou guia di Reclassering. El a bisa cu e mama ta dispuesto pa tuma su yiu.
Hof a sera tratamento di e caso y a bisa cu 4 Februari pa 1:45’or di merdia lo dicta sentencia. E potret ta mustra e cas unda e caso aki a socede na Juni 2021.
