ORANJESTAD (AAN): Na December 2024, Hues di Corte di Husticia den Promer Instancia,
a dicta sentencia den e caso penal cu Ministerio Publico a cuminsa contra Richard Lacle, Brian Koolman, Norben Giel y Nelson Cabral de Andrade (Speed).
Hues a bisa den su sentencia cu e ta declara tur cuater acusado liber di e acusacion di a forma parti di un organizacion criminal. Hues ta haya cu no tin suficiente prueba. Hues a sigui bisa cu Speed, Giel y Lacle ta culpabel di a cumpra Vos. Hues ta haya proba cu Speed, Giel y Lacle a paga Vos. Cada un a hacie na nan manera. Hues a bisa cu e ta haya e declaracion di Vos confiabel. Na opinion di Hues, no ta esey so. E declaracion di Vos, ta wordo confirma door di e chatnan riba WhatsApp. Tin prestamo di placa haci y a duna regalo, pa asina move Vos como ambtenaar haci cosnan cu ta contra di su obligacion como agente di Polis.
Hues ta haya tur cuater periodista culpabel cu Vos a viola su obligacion di comparti informacionnan secreto di Polis. Hues a bisa cu Vos no a hacie su so. E acusadonan a yuda door di duna diferente laptop, facilita aparato wifi, instalacion di cierto apps pa asina haya tur informacion for di Tetra-radio di Polis. Hues ta haya cu cada un a haci aporte significante den esaki.
Libertad di Prensa tin limite: Hues a reacciona riba defensa di abogado, cu mester tene cuenta cu libertad di prensa. Hues a bisa cu en principio mester respeta esaki pa democracia den un pais. Sinembargo, e limite di libertad di prensa ta wordo determina pa ley.
Hues a enfatisa cu un periodista no por haci delito pa haya informacion.
Fiscal no di acuerdo cu castigonan: Ta asina cu Fiscal a exigi 2 aña di prison pa Speed y a exigi pa detencion di biaha ora Hues dicta sentencia. Fiscal a mustra cu Speed, apesar di a wordo condena pa un caso similar, a bolbe haci e mesun delito y den su periodo di prueba.
Fiscal a exigi 18 luna di prison di cual 8 luna ta condicional pa Giel y Lacle y cu 3 aña di prueba. Fiscal a exigi 6 luna di prison condicional pa Koolman cu 3 aña di prueba.
Hues a condena Lacle y Giel na 240 ora di trabao pa comunidad y si no cumpli cu esaki, lo mester bay 120 dia sera den KIA. Tambe Hues a condena Lacle y Giel na 12 luna di prison condicional cu 3 aña di prueba. Esey ta nifica cu si den e periodo di 3 aña nan haci algo contra ley, nan lo por haya e 12 luna di prison riba e castigo cu nan lo haya pa e delito cu nan a haci.
Hues a condena Speed na 18 luna di prison di cual 12 luna ta condicional cu un tempo di prueba di 3 aña. Esey ta nifica cu Speed mester bay 6 luna sera den KIA. Hues a bisa cu Speed a haya mas castigo pasobra Speed a haci e delito aki den su tempo di prueba pa un condena di e mesun delito aki cu el a yega di haci den pasado.
Hues a condena Koolman na 150 ora di trabao pa comunidad y si e no cumpli cu esaki, e lo mester bay sera 75 dia di prison. Tambe un castigo condicional di 3 luna di prison cu 3 aña di prueba.
Caso ta bay corte superior: Investigacion cu a haci ta mustra cu Ministerio Publico no ta di acuerdo cu e sentencia y a apela esaki. Esey ta nifica cu awor tres Hues (Hof) di Corte Superior lo bin Aruba pa trata e caso completamente di nobo. Procurador General lo bisa pakico a apela e sentencianan y lo bay exigi di nobo castigo pa tur cuater acusado y abogado mr. Canwood lo hiba su defensa pa su clientenan: Speed, Giel y Koolman. Despues Hof lo bisa ki dia lo tin sentencia.
Den curso den lunanan lo haya sa ki dia e caso aki lo bay tuma lugar.
