Hues den prome instancia no a honra nan peticion
ORANJESTAD (AAN) -- E comision cu ta encarga, boluntariamente, pa busca derecho di pensionadonan cu ta biba na Aruba y cu ta ricibi AOV di Curacao, ta informa cu manera ta conoci dia 11 di November ultimo, Hues den prome instancia NO a honra e peticion di pensionadonan di Aruba.
Segun e Huesnan cu no tabata di acuerdo cu e reduccion di 10 % riba nan pensioen aplica door di SVB Curacao, mester a protesta e tempo ey contra esaki cerca e Hues Administrativo.
E Hues a argumenta tambe cu e tempo pa protesta a pasa. Como cu pensionadonan di Aruba no a protesta na tempo, nan no por awor, tanto aña despues, purba drenta door di 'porta di patras', pidiendo pa declara e ley no valido cerca e Hues civil.
Remarcabel ta cu e Hues, pues no a yega pa trata e caso su contenido. El a indica solamente cu no mester a bin cerca dje cu e peticion.
Pensionadonan tin 6 siman pa hiba nan caso Corte Superior (Hof). Esakinan lo haci tambe manera palabra anteriormente cu nan abogado mr. David Kock.
Den Corte Superior no ta trata e caso su contenido ainda. Solamente huesnan mester contesta e pregunta: si e Hues den prome instancia, cu rason, a declara e peticion di e pensionadonan no admisibel (no valido), pues e discusion ta cu si e pensionadonan por pidi pa declara e ley “onverbindend” sin cu e pensionadonan a protesta (na tempo) contra SVB na 2017.
Si pensionadonan haya rason den Corte Superior, lo referi e caso bek na e hues di prome instancia pa trata e caso ainda riba su contenido.
Ta di spera cu den Corte Superior, e pensionadonan haya oido pa nan peticion.
