ORANJESTAD (AAN): Diahuebs mainta Corte a trata e caso di labamento di placa cu Ministerio Publico a cuminsa contra e muhernan Y.T., M.H. y e homber R.J.
Den e articulo aki, lo publica e defensa hiba pa e abogadonan mr. Hart, mr. Illes y mr. Mohamed. Den un otro articulo ta publica tratamento di e caso y e exigencia di Fiscal.
FISCAL TA PRETENDE COSNAN CU NO TA ASINA
Mr. Hart di Y.T. a bisa Hues, cu den pasado Y.T. a wordo deteni como sospechoso pero nunca el a wordo condena. El a demanda daño per juicio contra Gobierno y a haya razon. E abogado a menciona caso La Patrona, caminda Y.T. a haya tur loke Polis a confisca bek. E auto e no a haya. Tabata sospecha cu Y.T. lo tabata envolvi den droga. Tambe e caso di lo a cumpra dos agente di Polis. Segun e abogado, Y.T. a wordo laga liber. Aki tambe Y.T. a haya daño per juicio paga. Despues tabata e caso Domino, caminda pafor di aeropuerto, Polis a détente Y.T. pasobra el a bin Aruba hunto cu R.J. y R.J. tabatin masha hopi placa cu e no a declara na Douane. El a keda 3 dia sera y despues laga liber. Aki tambe Y.T. a haya daño per juicio paga.
FISHING EXPEDITION
E abogado a bisa Hues cu door di media, a daña Y.T. su nomber y a causa cu tin banco cu a rechaza habri cuenta pa Y.T. E abogado ta haya cu sin hustificacion ta haci un fishing expedition y a bin cu sospecho cu Y.T. lo ta laba placa. Aki tambe a coy cantidad di joyas y despues mester a debolbe. E abogado a reclama, cu ta parce cu e hecho cu Y.T. ta usa cosnan di marca, ta pint’e como sospechoso di un delito. Esaki ta di lamenta pasobra no tin base. E abogado ta haya cu no tin base pa conclui cu e placanan di Y.T. ta procedente di crimen. El a mustra cu Y.T. tin añas ta traha como taxista. E ta haya cu Y.T. a mustra cu raport di account cu e tin entradanan legal. Ademas e ta haya placa di su amigo R.C. cu tambe ta core taxi.
E abogado a sigui bisa cu Fiscal ta pretende cu Y.T. ta meti den organizacion di droga pero no tin ningun prueba. Tambe cu e lo a cumpra boto, cual tampoco ta cuadra. E abogado tambe a cuestiona e investigacion di agentenan pa cu entrada di Y.T. cu no ta cuadra. E abogado a splica cu no a tene cuenta cu tips cu Y.T. ta haya y esey ta mustra cu su entrada ta mucho mas halto cu loke Fiscal ta pretende. Ta un hecho cu tips no mester wordo declara na Belasting. E abogado a cuestiona cu Fiscal ta specula cu Y.T. ta haci gastonan siendo cu no ta Y.T. so a cumpra sino hunto cu otro persona. E abogado ta haya cu e calculacionnan haci no ta cuadra pasobra no ta tene cuenta cu placanan di belasting cu Y.T. a haya bek y tambe e demandanan di daño cu el a haya. E abogado ta haya cu mester declara Y.T. liber di labamento di placa y pa debolbe e auto, joyas y placanan.
Abogado mr. Illes, cu tambe a defensa Y.T., a mustra riba un carta di 2018 di Fiscal. E abogado a mustra cu Fiscal a bisa Y.T. cu si e no deshaci di tur e cosnan cu a confisca, lo bay persiguie. Y.T. a nenga y tog el a haya su cosnan bek. A tarda hopi promer cu Fiscal a debolbe e cosnan bek y na 2022 a cuminsa un investigacion penal contra Y.T. Esaki mr. Illes ta haya inhusto. El a bisa Hues cu Fiscal a laga Y.T. den duda asina hopi tempo y awor ta bin cu caso penal. E abogado ta haya cu mester declara Fiscal no admisibel.
Fiscal a reacciona cu despues di 2018, BCI a haya informacion cu a sospecha Y.T. di labamento di placa y a cuminsa investigacion.
NO TIN LABAMENTO DI PLACA
Abogado mr. Mohamed a representa M.H. y R.J. El a bisa cu e investigacion contra R.J. a cuminsa door di sospecho cu R.J. y Y.T. lo ta envolvi den traficacion di droga for di Colombia. A sospecha cu R.J. a cumpra cosnan di hopi placa y cu e placa ta procedente di crimen. E abogado ta haya cu den e caso aki no tin nada di labamento di placa. El a bisa Hues cu e holoshi Rolex y pañanan di marca caro cu a haya serca Y.T., ta di R.J. Ta asina cu R.J. a haci uso di derecho di silencio durante interogacion pasobra e no ta confia Polis.
E abogado a sigui bisa cu R.J. tabata gamble den casino y a cumpra cosnan caro. E tin un compleho di 26 apartamento na Colombia y un accountant a manda documento cu R.J. ta genera mas di 200 mil florin pa aña. Door di condena den pasado, R.J. no por tin cuenta di banco na Aruba. Pesey e ta viaha cu sumanan grandi pa Aruba y a wordo gara cu hopi placa. Aki no por papia di placa di crimen.
E abogado a bisa cu R.J. ta fia hende placa na Aruba y nan ta paga bek cu interes. E hendenan no kier firma pa otronan haya sa. Esey ta motibo cu constantemente R.J. ta viaha di Colombia pa Aruba. Na opinion di mr. Mohamed, e hecho cu R.J. ta viaha hopi, no kiermen cu e ta liga den narcotrafico y labamento di placa. For di 2019 BCI ta sospecha Y.T. y R.J. ta meti den narcotrafico. Pero no tin ningun investigacion haci pa verifica. Na e cas unda Y.T. y R.J. a biba, no tabatin movecion di hendenan cu ta mustra cu tin bendemento di droga. E abogado ta haya cu mester declara R.J. liber.
Pa loke ta M.H., e ta envolvi door di e boto. E abogado ta haya cu inhustamente Fiscal ta señala cu M.H. a paga 85 mil florin pa e boto. Tambe el a cuestiona cu M.H. a haya deposito di sumanan grandi. E abogado a mustra cu M.H. tabata spaar su placanan y no tabata gasta placa na joyas caro. El a mustra cu na tips so M.H., coriendo taxi, lo a genera 30 mil florin pa aña. Door di esaki M.H. a paga 40 mil florin pa e boto. E abogado ta haya cu M.H. a duna declaracion creibel con el a yega na su placanan. E ta haya cu mester declara M.H. liber.
Hues, despues di a scucha defensa di e abogadonan, a bisa cu e ta pospone e caso te dia 23 Januari 2025 pa 8.30. E ora lo scucha e ultimo palabra di e sospechosonan y lo cera e caso y stipula un fecha pa sentencia.
