Pa casi 1 luna tabata haci esey
- Sospechosonan a admiti e acto tambe
ORANJESTAD (AAN): Diabierna henter mainta a keda dedica na tratamento di e caso di pasamento di droga den KIA via Drone. Fiscal ta haya cu e hombernan D.R.A. di 29 aña y R.D.P. di 28 aña, ta complice di e pasamento di droga den KIA entre 1 Juli 2024 y 20 Augustus 2024. Fiscal ta haya cu e muhenan L.T. di 23 aña y K.D. di 22 aña a yuda, door di hiba D.R.A. y R.D.P. En total ta papia di 13 vuelo di Drone.
Sospechosonan ta admiti: Hues a bisa cu nan ta worde sospecha di a usa Drones pa benta marihuana den KIA. Hues a puntra D.R.A. y el a bisa cu e sa cu el a haci malo. Hues a bisa cu D.R.A. a declara na Polis cu e tabata haya peticion di presonan na KIA y hendenan pafor tabata prepara tur cos. D.R.A., haciendo uso di Drone tabata percura pa e droga yega ariba tereno di KIA.
El a bisa cu esun den KIA tabata worde paga y e mitar ta paga D.R.A. Segun D.R. e no tabata haya pago sino placa di gastonan cu el a haci. El a nenga cu e cocaina cu a haya ta di dje.
R.D.P. tabata esun cu tabata vigila. El a bisa cu e tabata bay cu D.R.A. y D.R.A. tabata esun cu ta traha cu e Drone. Hues a bisa cu for declaracionnan por compronde cu nan tabata bay na e beach na Boca Grandi y di eynan tabata maneha Drone.
Hues a bisa cu e dama L.T. a hiba D.R.A. y R.D.P. na Boca Grandi 4 pa 5 biaha. Ta asina cu L.T. no kier a bisa nada. Segun L.T., e no sa di nada. El a djis baha nan eynan. Hues a hala atencion di L.T. y K.D. y R.D.P. y D.R.A. pa tene cuenta cu tin tur indicacion cu nan ta culpabel y no bisa cu no sa di nada. Ta asina cu L.T. a bisa cu e no sa di nada. K.D. a bisa Hues cu e no tabata sa cu nan tabata usa Drone.
Pasa droga den KIA via Drone: Hues mustra cu 24 Juli 2024 tabatin combersacion entre R.D.P. y K.D., kende a bisa cu nan ta aki tras y ta bay haci nan promer vuelo y pa busca nan. Hues a mustra cu R.D.P. y D.R.A. tabata worde baha na un cas na De Vuist y nan tabata cana bay na e beach na Boca Grandi. Di eynan nan tabata uza Drone pa manda droga pa KIA y despues e Drone ta bay back Boca Grandi y despues nan ta cana bay back e cas na De Vuist caminda nan tabata worde busca door di K.D. y L.T.
Hues a mustra cu D.R.A. a bisa Polis cu e tabata hunto cu R.D.P. Segun R.D.P., el a bay diferente biaha pero hopi biaha e pasamento di droga cu Drone no a tuma lugar. Segun R.D.P., nan tabata haya un paki pero e no sa cuanto droga. For di KIA e tabata worde informa kico ta kico. El a bisa cu for di e cas tabata manda e Drone pa KIA. Hues a mustra cu tin vuelonan di Drone registra for di Boca Grandi pa KIA y no for di e cas na De Vuyst.
Hues a mustra cu tanto D.R.A. como R.D.P. ta conoci pa Polis. El a bisa cu segun carchi di castigo, D.R.A. tabata sera 6 aña den KIA pa un caso di ladronicia y awor ta sera atrobe. D.R.A. ta un barbero. Hues a mustra cu R.D.P. tambe tabata sera y a worde laga liber cu tempo di prueba. Ta asina cu R.D.P. ta traha riba auto. El a bisa cu e ta cansa di ta sera den KIA. Ta asina cu L.T. tin un yiu chikito di D.R.A. y ta bibando den un apartamento. E tin un otro yiu mas grandi cu sa bay sera dje, despues di school.
Hues a mustra cu e muhenan L.T. y K.D. tabata sera 3 luna y laga liber mientras cu R.D.P. y D.R.A. tin 10 luna sera den KIA.
Fiscal a exigi castigo combina: Fiscal a bisa Hues cu e caso a cuminsa door cu Polis a haya informacion cu D.R.A. y R.D.P. lo tabata hinca droga den KIA. Investigacion a haci den smartphone nan di D.R.A. y R.D.P., a haya sa cu tabata usa 2 Drone. Den smartphone a haya 7 vuelo di Drone for di beach Boca Grandi pa KIA entre 9’or di anochi y oranan laat. For di e smartphone a haya combersacionnan cu tabata manda Drone y pa despues busca D.R.A. y R.D.P. na un cas na De Vuyst.
Droga haya den KIA: Fiscal a mustra cu guardianan di KIA a den KIA un saco di plastic cu mas o menos 22 gram di marihuana. A intercepta e droga. Entre 1 Juli 2024 y 20 Augustus 2024 a haci 13 vuelo.
Dia 28 Juli 2024, guardianan di KIA a haya 76,7 gram di marihuana riba e dak di un seccion di celnan. Na Augustus 2024, guardianan di KIA a filma Drone ta bula ey riba. Fiscal a mustra cu tin hopi mensahenan entre D.R.A. y L.T. y R.D.P. y K.D. Na KIA a haya un paki riba tereno, cu 24,4 gram marihuana aden.
Cuatro smartphone haya den un cel: Guardianan di KIA a mira un Drone pasa riba KIA y cu for di un cel di preso a coy un paki for di e Drone. A haci investigacion den e cel y a haya 4 smartphone.
Haya drone cu droga: Na un ocasion e Drone a cay. Dia 19 Augustus 2024, miembronan di KIA a haya e Drone cu lo a cay caminda tabatin 20,8 gram di marihuana. Relaciona cu esaki, Polis a haci investigacion na un cas na Ponton caminda D.R.A. ta keda y a haya un lote di marihuana y 1,2 gram di cocaina. Tambe a haya cosnan di Drone. Na Sero Janchi na cas di R.D.P. a haya algun cos y a confisca auto di e muhe K.D.
Como 171,80 gram di marihuana confisca: For di investigacion a mustra cu smartphone nan y droga tabata worde benta den KIA via Drone. Mustra cu L.T. a declara cu el a hiba D.R.A. y R.D.P. na un cas na De Vuist cu auto di K.D. E dama K.D. tambe a bisa cu el a hiba nan. En total 171,80 gram a keda intercepta. E otro 8 biahanan, e presonan a haya e droganan.
No ta conoci con D.R.A. tabata haya e droga. For di KIA tabata regla pa D.R.A. haya e droga. Tin indicacion cu durante 2 luna a hiba droga KIA via Drone. Fiscal ta haya cu D.R.A. y R.D.P. ta complice di hinca droga den KIA y e dos muhenan L.T. y K.D. a yuda. En total 13 biaha a pasa droga.
Castigo: Fiscal ta haya e caso hopi serio. Droga no ta bon pa salud di hende. E traficacion di marihuana den KIA ta un asunto serio. Na un forma creativo a percura cu Drone tabata hiba marihuana den KIA. Fiscal a mustra cu D.R.A. ta residivista di ladronicia. R.D.P. tambe ta residivista di ladronicia.
Fiscal ta haya cu mester exigi castigo combina pa forza nan di stop manda droga den KIA. Fiscal a exigi pa D.R.A. y R.D.P., 18 luna di prison di cual 6 luna ta condicional cu un tempo di prueba di 2 aña. Fiscal a exigi pa L.T. y K.D., 360 dia di prison di cual 258 dia ta condicional cu un tempo di prueba di 2 aña. Esaki, bou guia di Reclasering. Esey ta nifica cu e muhenan L.T. y K.D. no mester bay sera mas.
Abogado: Abogado mr. Griffith a bisa Hues cu L.T. tin relacion cu D.R.A. mientras cu K.D. tin un relacion di apenas 2 luna cu R.D.P. E abogado no ta haya cu L.T. y R.D.P. ta complice di traficacion di droga den KIA. El a bisa cu nan a yuda nan pareha pa hiba nan na e cas. Segun abogado, L.T. y K.D. no tabata sa kico tabata pasando. Nan no por tabata sa kico tabata pasa cu Drone. E abogado ta haya cu e auto di K.D. cu a keda confisca, mester worde debolbe.
Abogado mr. Maldonado a bisa cu D.R.A. y R.D.P. a admiti di a pasa droga via Drone den KIA. E abogado a bisa Hues cu no tur droga cu a worde haya riba tereno di KIA mester ta relaciona cu Drone di D.R.A. y R.D.P. Tin mas casonan di otro Drone. Na opinion di mr. Maldonado, si conta tur e droga, no ta yega na 500 gram di marihuana. El a bisa cu tin intentonan di Drone cu no a resulta.
Na opinion di mr. Maldonado, ya caba D.R.A. y R.D.P. tin 10 luna sera den KIA cu ta 2/3 parti di e castigo exigi pa Fiscal. E ta haya cu pa e cantidad di droga cu a haya, e periodo cu nan ta sera ta suficiente. E abogado a pidi Hues pa debolbe e auto di D.R.A., cu Fiscal a exigi pa keda confisca. E abogado ta haya cu e auto no realmente tabata worde usa pa hiba droga KIA. El a bisa Hues cu e auto ta D.R.A. su unico medio di transporte.
Hues a sera tratamento di e caso y a bisa cu e ta bay studia e caso y dia 11 Juli 2025 pa 8.15 am lo tin sentencia.
