E sospechoso ta para riba cu e no tin nada di haci cu e caso
ORANJESTAD (AAN): Diabierna mainta e hombernan J.M.Z. di 25 aña y G.E.T. di 40 aña a presenta den Corte pa e caso penal cu Ministerio Publico a cuminsa contra nan. Nan ta wordo sospecha cu dia 26 di December 2024 a laga e defunto Terence D’Aguiar guli cantidad di bolitanan di cocaina na Colombia y bin Aruba, caminda 2 bolita a kibra y causa cu D’Aguiar a fayece.
Investigacion a mustra cu D’Aguiar a guli 42 bolita cu a pisa 504 gram. A constata cu e bolitanan tabata mal traha y pesey 2 a kibra.
Promer cu tratamento di e caso, Hues a bisa cu abogado di G.E.T., mr. D. Croes, a notifica cu e no por ta presente pa defende su cliente G.E.T. y a pidi pa pospone e caso. Fiscal a bisa cu e no tin nada contra. Hues a dicidi cu ta pospone e caso pa dia 3 October pa 8.30 di mainta.
Gulido di bolita a yega Aruba y fayece: Hues a bisa cu segun Polis, 26 December 2024 a haya informacion cu un hende cu a guli bolitanan di cocaina na Colombia a bin Aruba y a fayece. Ta asina cu e persona ta defunto D’Aguiar. Investigacion ta mustra cu na Medellin, D’Aguiar a guli bolitanan di cocaina. Su amiga Wolff a declara esey na Polis.
Esun cu a papia cu D’Aguair tabata G.E.T. E amiga Wolff a bisa cu J.M.Z. a bay cu D’Aguiar. Segun J.M.Z. el a bay Colombia pa haci compras di regalo y G.E.T. a pidi’e pa controla D’Aguiar cu ta usa droga y pa D’Aguiar no bay perde riba caya. J.M.Z. a bisa Hues cu esey a yega di pasa cu D’Aguiar a perde riba caya na Colombia.
J.M.Z. a sigui bisa cu el a bisa G.E.T. cu e no ta bay tuma riesgo cu asunto di droga. El a splica Hues cu den pasado el a yega di haya problema den droga y el a cambia su bida. E ta traha y a stop cu e bida negativo ey.
Segun J.M.Z., tanten cu no tin nada ilegal, tur cos ta ok. El a dicidi di tira bista riba D’Aguiar, mientras cu e tabata na Colombia. El a cumpra regalonan y a bin Aruba. Despues el a haya yamada di Wolff, cu D’Aguair a bira malo. J.M.Z. a yama Ambulance pa bay na e cas. El a bisa Hues cu e no tabata sa kico a pasa. El a sigui bisa cu despues G.E.T. a yam’e y bis’e pa bay entrega e auto di huur. Ora J.M.Z. a yega na cas di G.E.T., G.E.T. a bis’e cu D’Aguiar a fayece. Na dado momento Polis a yega na cas y detene nan. Segun J.M.Z., Polis tabata insisti pa e bay controla na hospital si e no a guli bolita. Polis tabata sospecha cu J.M.Z. tambe a guli. Segun J.M.Z., el a splica Polis cu na Colombia caba el a wordo listra. El a insisti cu e no a guli nada. Sinembargo, el a dicidi di bay toch hospital pa controla y no tabatin nada.
“Polis ta gaña den declaracion”: Hues a mustra cu na Polis, J.M.Z. a declara cu e tabata sa cu D’Aguiar tabata guli bolitanan y el a bay sinta pafor y huma cigaria. J.M.Z. ta para riba cu e no tabata sa cu D’Aguiar tabata guli bolitanan di cocaina. El a bisa Hues cu e ta sinti cu el a wordo uza. El a bisa cu e no ta compronde con Polis ta bisa esey siendo cu e no a declara asina. El a bisa Hues cu Polis a bis’e pa firma un papel pero e no sa kico tabatin skirbi. E ta haya cu Polis ta gaña y e no sa pakico.
Hues a bisa cu e pareha di e victima D’Aguiar, Wolff, a bisa Polis cu e conoce J.M.Z. y a bisa cu e tabata sospecha cu J.M.Z. lo a guli bolitanan. J.M.Z. a bisa Hues cu e solamente mester tira a bista riba D’Aguiar y nada mas. Hues a mustra cu segun e pareha, J.M.Z. lo tabata traha cu G.E.T. y cu J.M.Z. tabata hiba droga pa G.E.T. E pareha a declara cu un biaha D’Aguiar a bay pa busca droga na Medellin pero no a bin bek. A resulta cu el a bay keda riba caya ta usa droga. Segun declaracion di e pareha, G.E.T. a manda J.M.Z. pa controla cu D’Aguiar ta guli bolita. J.M.Z. a remarca na Hues, cu e no a bay pa obliga D’Aguiar guli bolitanan! El a bisa cu e ta lamenta hopi loke a sosode y cu e yiunan awor a keda sin tata. J.M.Z. a bisa Hues cu ora el a mira D’Aguiar yega cu taxi na Colombia, ya caba e tabata droga. J.M.Z. a bisa cu el a bay serca su famia y despues el a bay atrobe na D’Aguiar y a hay’e mal droga. El a bisa Hues cu despues el a bin Aruba y no tabata sa mes cu D’Aguiar a guli bolitanan.
Abogado kier pa mira video di interogacion: Hues a mustra cu e amiga di J.M.Z., e dama S., a declara na Polis cu J.M.Z. a bis’e cu e ta bay Colombia pa controla cu D’Aguiar ta guli bolitanan pa despues bin Aruba. J.M.Z. a bisa Hues cu esey no por pasobra su amiga no ta compronde Hulandes ni Papiamento.
E momento ey, abogado mr. Odor a remarca na Hues cu den e procesverbaal di Polis ta mustra cu ta Polis a traduci pa e dama loke nan a pone riba papel. E abogado a bisa Hues cu e kier pa mira e video di interogacion pasobra e ta haya cu e dama a wordo forza.
Fiscal no ta di acuerdo cu esey. Hues a bisa cu e ta tuma un decision despues riba e peticion aki.
Fiscal a exigi 18 luna di prison: Fiscal a bisa Hues cu J.M.Z. a declara na Polis cu riba orden di G.E.T. el a bay Colombia cu D’Aguiar pa controla cu D’Aguiar ta guli bolitanan. Fiscal a bisa cu J.M.Z. a firma su declaracion na Polis y awor den Corte ta bisa cu e no sa kico el a firma. Fiscal ta kere cu J.M.Z. lo a wordo presiona door di G.E.T. na KIA y pesey kier cambia su declaracion.
Fiscal no ta kere loke J.M.Z. a bisa den Corte. Fiscal a mustra cu 27 December 2025 e pareha di J.M.Z., e dama S., a declara na Polis cu J.M.Z. a bis’e cu e mester bay Colombia pa controla cu D’Aguiar ta guli bolitanan. E pareha S., a declara cu G.E.T. a bisa cu J.M.Z a bay cu D’Aguiar pa percura cu D’Aguiar ta guli bolitanan y bin Aruba. Fiscal ta haya cu tin suficiente prueba cu J.M.Z. a yuda den traficacion di 504 gram di cocaina.
Pa cu e castigo, Fiscal a bisa cu e ta tene cuenta cu na 2022, a condena J.M.Z. pa droga y awor atrobe e ta dilanti Hues pa caso di droga. Fiscal ta haya cu J.M.Z. tabata e intermediador pa percura cu D’Aguiar ta guli e bolitanan. Fiscal a exigi 18 luna di prizon.
Polis a forza hende duna declaracion: Abogado mr. Odor a bisa Hues cu e unico declaracion cu lo por compromete J.M.Z., ta e ex pareha di J.M.Z., e dama S. E abogado a bisa Hues cu tanto J.M.Z. como e dama S. a wordo presiona door di Polis y tur cos mester ta graba riba video. E abogado ta persisti pa mira e videonan di interogacion. En todo caso e kier pa Hues mira con e interogacionnan a tuma lugar. E abogado a mustra cu e dama W., pareha di D’Aguiar, ta supone cu J.M.Z. ta envolvi den traficacion di droga pero no ta asina.
Fiscal a reacciona cu abogado tabatin suficiente tempo, pa a pidi pa copia di e video y audio. Fiscal a bisa Hues cu e no ta compronde pakico e abogado a tarda asina tanto. El a bisa cu e agentenan a traha procesverbaal riba huramentacion. E ta haya cu mester rechaza e peticion.
E abogado a reacciona cu si a caso el a tarda di haci peticion, esey ta su fayo y no mester tin consecuencia pa su cliente.
Hues a cera tratamento di e caso y a bisa cu dia 18 Juli 2025, e lo duna sentencia.
