ORANJESTAD (AAN): E cantidad di caso penal a baha na 2020, compara cu na 2021.
Core sin rijbewijs tambe ta wordo considera como un hecho castigable y mirando cu na 2020 polis a haci hopi menos control den trafico, esaki por a contribui na e cifra abao di e cantidad di casonan cu ta wordo considera casonan penal.
Esaki segun e rapport anual di Corte Comun cu a wordo presenta na prensa Diaranzon.
Huez Debbie Angela durante un conferencia di prensa a splica tambe cu tabata tin menos caso di violacion di leynan di trafico.
Esaki por tin di haber cu e hecho polis durante toque de queda por ehempel tabata enfoca riba otro tipo di violacion.
Tambe ta asina cu durante 2020 tabata tin basta periodo unda cu no tabata tin mucho auto riba caminda.
“E parti positivo di e pandemia pa corte ta cu tur caso cu mester a wordo trata na 2020 a wordo trata”, segun e huez.
El a splica cu tur caso penal cu mester a wordo trata den e tempo stipula pa ley, a wordo trata tambe.
Mr. Angela a papia tambe riba e asina yama ‘Caribisering’, unda cu Hof tin e maneho pa atrae hueznan di descendencia local, of hueznan cu a biba asina tanto tempo na Aruba of un di e otro islanan cu e ta wordo considera un habitante di isla, cu por ehempel conocemento di nos idioma y cultura.
“Actualmente 50% di e hueznan di Hof ta local, unda cu corte di Aruba tin 5 huez local cu un Huez Comisario local, mientras cu September di e aña aki nos ta bay haya un huez local nobo”.
Esaki ta pone cu nos ta bay tin 6 huez local y 4 di Hulanda, segun Angela.
