ORANJESTAD (AAN): Diabierna mainta e trio homber Venezolano: R.V.A., D.J.R., M.G.A., a presenta dilanti Hues pa e caso penal cu Ministerio Publico a cuminsa contra nan.
Fiscal a cuestiona e forma con a bati e Chines di edad y a exigi 5 aña y 6 luna di prison.
ASALTO ARMA BRUTAL
Fiscal a acusa nan cu riba 2 October 2020, nan a haci un asalto arma brutal na un supermercado Chines. Ta asina cu nan maltrata e homber Chines (75) cu tabata sinta riba un kruk banda di e caha di placa. Door di e maltrato, e Chines tabata sangra hopi. Nan a dal e Chines cu e arma na su cabez. Hues a bisa cu e victima Chines di 75 aña a declara na Polis cu dos homber a drenta y haci e asalto arma brutal cun’e y bay cu 400 florin for di e caha di placa.
Ta asina cu M.G.A. a bisa Polis cu e tabata esun arma cu a dal e Chines.
STUDIA E SUPERMERCADO
Investigacion a mustra cu D.J.R. tabata biba den vecindario di e supermercado y e tabata envolvi den trahamento di e plan. E tabata esun cu tabata maneha e auto. Nan a core anterior den vecindario di e supermercado pa studia bon con ta bay haci e asalto arma.
Den Corte, Hues a puntra pakico a haci esaki. M.G.A. a bisa Hues cu e no por a splica pakico. R.V.A. a bisa cu a haci’e pa haya placa pa por cumpra cos di come. El a bisa cu ta duel’e loke a sosode. D.J.R. a bisa cu el a papia tur cos na Polis. R.V.A. y M.G.A. ta esnan cu a drenta den e supermercado. Hues a bisa cu D.J.R. a declara cu den pasado M.G.A. a mustr’e e pistool y cu e ta un imitacion. D.J.R. a bin Aruba na November 2019 y tabata trahando den construccion. R.V.A. ta casa na Aruba y tin un yiu aki y un yiu na Venezuela. Na 2014 el a bin Aruba y tabata traha den cushina di restaurant. Door cu M.G.A. ta envolvi den otro casonan mas di asaltonan arma cu mas sospechoso, a dicidi cu Fiscal lo exigi castigo p’e ora ta trata e otro casonan hunto.
FISCAL A BAHA PISA
Fiscal a bisa cu lo exigi pa R.V.A. y D.J.R. y den e otro caso di un cantidad di asaltonan arma, lo exigi pa M.G.A. Fiscal a bisa cu tur e acusadonan a admiti. M.G.A. y R.V.A. a haci e asalto arma riba e Chines. Fiscal a bisa cu e por a compronde cu te ainda e Chines tin molester di e maltrato cu el a sufri aña pasa October.
Fiscal ta haya cu esaki ta un caso hopi serio, caminda a maltrata un homber di edad. E consecuencia di e asalto arma cu maltrato ta hopi mas serio pa e victima. E lo por keda afecta.
Pa cu e castigo, Fiscal a bisa cu e ta tene cuenta cu castigo cu Hof ta duna. El a mustra cu Hof su punto di salida ta 5 aña di prison pa asalto arma. Na opinion di Fiscal, door cu tabatin maltrato di un homber di edad, e ta exigi pa R.V.A. y D.J.R. 5 aña y 6 luna di prison.
Tanto abogado mr. Zara como mr. Emerencia ta haya cu e castigo ta mucho halto, teniendo cuenta cu ta promer biaha cu e duo aki ta cay den man di Husticia.
Hues a sera tratamento di e caso y a bisa cu e ta bay studia e caso y dia 25 Juni 2021 lo tin sentencia.
