ORANJESTAD (AAN): Diabierna mainta tabatin momento durante tratamento caso Flamingo,
cu diferente di e sospechosonan a yora. Esaki tabata ora cu e sospechosonan mester a bisa Hues di nan circunstancia personal.
OTMAR A YORA
E promer tabata Otmar Oduber, kende a pidi Hues disculpa promer cu e papia si e bira emocional. Por a mira Otmar Oduber hopi tristo y alavez rabia pa tur loke caso Flamingo a haci cu ne y su famia.
Otmar a conta con el a bin cu e proyecto Bochincha cu tabata bayendo bon. Sinembargo, door di acusacionnan di labamento di placa tur cos a bay malo. Esey a causa cu el a divorcia. Door di e sospechonan di caso Flamingo di labamento di placa, Otmar no tin cuenta bancario.
Na yoramento Otmar a bisa Hues, cu e, cu tabata vice promer minister di Aruba, awor ta bibando cerca su mama den un apartamento.
CASO FLAMINGO A KIBRA MI COMPLETO
Otmar a bisa Hues cu despues di cinco aña y dos luna, awor e ta para dilanti Hues den Corte. El a mustra cu el a hiba 3 aña caso contra Aruba Bank y finalmente, Aruba Bank a sera su cuenta di banco door cu ta sospecha cu e ta hinca den organizacion criminal y labamento di placa.
Otmar, hopi emociona a bisa Hues, cu tur e acusacionnan ey, awe ningun di nan ta contra dje. Caso Flamingo a laga Otmar cu mas di 500 mil florin. Hues a puntra Otmar, con e ta mira futuro. Otmar a baha cabes y a lanta cara mira Hues cu mannan habri y a bisa cu tur cos ta depende di Hues. El a bisa cu e no ta confia mas den Ministerio Publico.
Otmar a bisa Hues cu dia 6 di December 2024 tin eleccion y e caso aki ta bah’e full te na suela. El a bisa cu aña pasa November 2023 el a wordo opera y awor e ta bon. El a cuestiona e trato cu el a haya tempo e tabata sera, cu tabata pa kibr’e mentalmente. Hues a stop Otmar y a bis’e cu den su defensa e por papia mas.
YIU DI OTMAR HOPI EMOCIONA
E yiu homber Jeandrick, tambe tabata hopi emociona. El a bisa Hues cu e ta e unico yiu cu tabata contra cu Otmar ta den politica. E tabata kier pa su tata sali di politica. Na 2019 el a bolbe Aruba y a habri 2 negoshi. Jeandrick a bisa Hues cu e promer negoshi tabata bayendo bon y a habri un bar chikito. Despues el a wordo deteni. Ministerio Publico a pint’e como sospechoso grandi den labamento di placa y yiu di Otmar. El a bisa Hues cu el a haya cartanan di Aruba Bank cu e no por haya prestamo. El a rabia y a bay otro banco. Nan a yam’e y bis’e cu e no por haya cuenta di banco pasobra e ta yiu di Otmar.
Jeandrick a bisa Hues cu inhustamente e ta wordo acusa pa cosnan cu e no tin nada di haci cu nan.
ESSER TRISTO PA LOKE E CASO A HACI CU NE
Esser a bisa Hues cu nan a mande cas pero e ta haya salario en espera di e caso aki. El a bisa cu e ta tristo cu e ta hinca den un caso cu e no tin nada di haci. Esser a bisa cu dentro di poco e ta bay cu pensioen despues di a traha 30 aña pa Gobierno.
PHILLIPS SU SITUACION TA PEOR CU HAITI
Phillips a bisa Hues cu su situacion financiero ta peor cu Haiti. E no ta hayando onderstand. El a bisa cu semper e ta trahando pa San Nicolas. Su mayornan a lanta na San Nicolas y el a lanta na San Nicolas. Door di yuda Otmar pa desaroyo di San Nicolas, awor e ta dilanti Hues.
WEVER AFECTA DOOR DI CASO
Wever, hopi emociona y cu awa na wowo, a bisa Hues cu e caso aki a afect’e masha hopi y cu awor e ta divorciando. Cu wowo na awa el a bisa cu gastonan ta hopi halto y no tin otro manera cu mester bende e cas cu nan tin. El a bisa Hues cu su tres yiunan sa di e divorcio pero no cu lo mester bay bende e cas. Hues a bisa cu ta tristo pa tende cu ta den proceso di divorcio. El a desea Wever exito.
