Aunke cu e acusado ta para riba cu e no a haci nada
ORANJESTAD (AAN): Diahuebs mainta e homber Venezolano J. (56) a presenta dilanti Hues pa scucha su sentencia den un caso di inmoralidad y abuso di un mucha muher menor di edad. Tambe e ta wordo acusa di pornografia di mucha den su cellular.
SENTENCIA
Hues a bisa cu abogado di e acusado J., mr. Mohamed a bisa cu e ta haya cu no tin prueba y mester declara su cliente liber.
Hues a bisa cu den casonan di inmoralidad hopi biaha ta declaracion di e acusado contra e declaracion di e victima. Den casonan asina, segun e ley penal nobo, no por bay tras declaracion di un persona so. Mester tin prueba di sosten. Hues ta haya cu e declaracion di e mucha ta confiabel. Hues a bisa cu e mucha V., e mesun dia cu e abuso a tuma lugar, a conta su mama con un rato promer, J. a haci actonan inmoral cun’e. E mucha a bisa cu J. a sunchi na su boca duro, pone man na su parti intimo. Hues a sigui bisa cu e mesun dia e mucha V. a conta e pareha di J. kico a pasa. Hues ta haya cu esaki ta declaracion consistente di e victima. Hues ta haya e declaracion di e victima confiabel.
ACUSADO TA CULPABEL
Hues a mustra cu como prueba di sosten tin, cu tanto e mama como e agente di Polis a mira cu e lip di e mucha tabata hincha. Hues a bisa cu segun investigacion, e acusado J., e dia ey a hiba e mucha V. so den su auto y no a hiba su yiu muher di 8 aña. Hues ta haya cu e declaracion di J. ta cuadra cu declaracion di e mucha, pa cu e forma con J. a actua y core auto.
Pa loke ta e acusacion di pornografia di mucha, Hues ta haya cu no tin suficiente prueba di pornografia di mucha.
CASTIGO
Hues ta haya legalmente proba cu J. a penetra e mucha door di hinca dede na su parti intimo. Hues a mustra cu Fiscal a exigi castigo di 24 luna di prison, di cual 6 luna ta condicional cu un tempo di prueba di 3 aña.
Hues a bisa cu J., como omo di e mucha, a abusa di e mucha y tacha integridad di e mucha. Hues a sigui bisa cu ta conoci cu hechonan asina ta afecta un mucha.
Pa cu e castigo, Hues a bisa cu e ta tene cuenta cu J. a keda para riba cu e no a haci nada. Hues a mustra cu ningun momento J. a mustra duele di loke el a haci. Hues tambe a tene cuenta cu ta promer biaha cu J. ta cay den man di husticia.
Pa loke ta e demanda di daño material di parti di e mucha, a wordo exigi mas o menos 8 mil florin. E mucha a keda den trauma y mester haya tratamento. Esaki ta debi na loke J. a haci cun’e. Fiscal ta haya cu mester aproba e demanda.
Hues ta haya cu J. ta responsabel pa esaki. El a bisa cu aunke cu e mucha ainda no a haya tratamento, Hues ta haya cu tratamento ta necesario. Hues a condena J. pa paga demanda di daño y a pone medida di pago. Esey ta nifica cu si J. no paga, e lo wordo deteni y cera.
E cellular confisca lo wordo debolbe pasobra no por proba pornografia di mucha.
Hues a confirma exigencia di Fiscal y a condena J. na 24 luna di prison, di cual 6 luna ta condicional cu un tempo di prueba di 3 aña.
