Recherche a graba su combersacion cu un persona
- Por ta trata aki di un sicario of e ta djis ‘blof’
ORANJESTAD (AAN): E caso di asesinato cruel di e miembro di CEA, Sergio Maduro, a hala hopi atencion ora cu Hues a mustra cu e asesino di Sergio, Bryan Jimenez, a declara cu el a mata 15 otro hende cu ta dera y desapareci na Aruba.
Testigo di asesinato a papia: Tratamento di e caso tabata henter mainta te den oranan di merdia. Awe ta publica parti di e tratamento cu a hala atencion. Hues a mustra cu investigacion di Recherche a mustra cu un homber P. ta usando e celular di Sergio, cu a haya sin bida banda di parke di Avestruz riba 23 December 2023. Recherche a bay detene P. como sospechoso di e asesinato.
Durante interogacion, sospechoso P. a bisa cu ta Jimenez a mata Sergio y cu segun Jimenez, ta Jennifer a paga Jimenez pa mata Sergio.
Despues di a asesina Sergio, Jimenez a duna sospechoso P. e SIM-card di e smartphone di Sergio y Jimenez mes a keda cu e smartphone.
Sospechoso P. a bisa Recherche cu Jimenez a bis’e cu el a choca Sergio mata. P. a declara cu Jimenez a yam’e den oranan laat di anochi, pa busc’e na Noord. Ora el a busca Jimenez y hib’e cas, Jimenez a cont’e cu el a caba di mata Sergio, choca y pasa auto riba dje banda di e parke di Avestruz.
Jimenez a cont’e cu Sergio a busc’e na su cas y nan a sali. P. a bisa cu Jimenez a coy varios cos di Sergio y sconde tras di su cas. Hasta cu Jimenez tabata hunto cu Jennifer y nan a bay check na ATM machine si tin placa riba Sergio su cuenta. El a bisa cu Jimenez a usa e auto di Sergio, e Mitsubishi, pa pasa auto riba Sergio.
Jimenez ta bisa cu el a mata 15 otro hende: Polis a bay pone microfon scondi den auto di Jimenez pa scucha combersacion. Sospechoso P. tabata den auto cu Jimenez. Recherche tabata scucha y graba ora nan tabata papia di e matamento y cu Jimenez a bisa cu ta su so a mata Sergio. Riba grabacion tin con el a bisa cu el a choca Sergio mata y pasa auto riba dje. Jimenez a bisa cu Jennifer mester paga awor. El a bisa cu Jennifer a paga un adelanto di 200 Florin.
Jimenez a bisa cu Jennifer no por bisa nada sino e lo basha abao y nan dos lo bay cera.
Sospechoso P. a puntra Jimenez, ta con e por a mata Sergio asina? Sorprendentemente Jimenez a contesta cu Sergio no ta e prome hende cu el a mata.
Aki el a agrega cu el a yega di mata total di 15 hende... hendenan cu el a mata for di tempo cu e tabata forma parti di un gang y cu e hendenan aki ta perdi. Jimenez a agrega y e ta graba, cu el a dera tur hende cu el a mata na Arikok.
E declaracion aki a hala atencion di tur den sala di Corte. E ta duna impresion cu Jimenez ta un sicario mes. Mas detayenan tocante di e 15 hendenan cu el a mata no a worde bisa durante tratamento di e caso.
Por bien ta cu esaki ta un parti cu ainda Recherche lo ta bay investiga si realmente Jimenez a haci e asesinatonan aki of ta djis pa blof el a haci e expresionnan aki.
Ta un hecho cu riba lista tin monton di hende perdi y investigacion lo mustra si enberdad lo tin hendenan dera na Arikok of no.
