Nan a drenta na Eagle Beach cu e boto
ORANJESTAD (AAN): E hombernan Venezolano G.M.G. di 47 aña y A.C.I. di 33 aña riba Diabierna mainta a scucha Fiscal exigi 8 aña di prison pa nan. Fiscal ta haya nan culpabel di traficacion di mas cu 700 kilo di droga y tambe cu a haya 3 revolver lora den plastic den e boto.
Acusacionnan: E acusacionnan cu Fiscal a presenta contra e duo G.M.G. y A.C.I. ta cu riba 8 Juni 2024 nan tabatin un lote di marihuana y cocaina. Tambe nan ta worde acusa di tabatin 3 revolver cu bala.
Gara boto cu lote di droga y 3 arma: Hues a bisa cu Wardacosta di Caribe Hulandes a haya informacion cu tin un boto sospechoso ta bin Aruba 8 Juni 2024. Wardacosta a mira riba marine-radar cu e boto tabata bayendo direccion Eagle Beach. Di biaha a manda patruya pa Eagle Beach. Mainta tempran e patruya ta mira cu tin un pick up Mitsubishi cu un trailer cu un boto y 4 persona riba e boto.
Wardacosta a bay riba e pick up y dos di esnan den e boto a bula abao y core bay. E miembronan di Wardacosta a logra detene e hombernan G.M.G. y A.C.I. E pick up y e trailer cu boto a keda confisca y hiba Wardacosta.
Investigacion a mustra cu tabatin bultonan di droga. En total a haya 379 kilo di marihuana y 335 kilo di cocaina. Tambe e miembronan di Wardacosta a haya scondi den un compartimento di e boto, 3 revolver cu bala cualnan tabata lora den plastic.
Un a intermedia pa haya droga y arma: Hues a cuminsa haci preguntanan. Segun G.M.G., el a worde gaña. El a bisa cu el a haya bultonan di pisca pero no tabata sa cu tin droga den esakinan y tampoco tabata sa cu tin tres revolver scondi den e boto.
A.C.I. a bisa cu e tabata sa cu tabatin droga pero no sa e cantidad y tabata mas bien riba e boto pa yuda. Hues bisa cu a haya den un compartimento di e boto 3 revolver lora den plastic. A.C.I. a bisa cu e no sa di e armanan. Hues a mustra cu a haya un tas di lomba preto den cual tabatin 9 paki di cocaina cu ta mas o menos 9 kilo. A.C.I. a bisa cu e no sa di esey. Hues a bisa cu a haya un cellular cu ta di A.C.I. Polis a bay check den smartphone y a haya combersacionnan. A haya combersacionnan den code y A.C.I. a bisa cu ta asina. El a bisa Hues cu el a worde instrui na Aruba pa e capitan di e boto, pa cumpra 15 liber di marihuana na Venezuela. E tabata na Aruba y e capitan di e boto a dun’e e placa y el a bay na un persona aki na Aruba pa transferi e placa pa Venezuela. Hues a mustra cu den code tambe a papia di cocaina.
Segun A.C.I., e ta considera marihuana y cocaina, droga. Den cellular tin potretnan di pakinan di cocaina cu a manda pa A.C.I., pa e mustra e capitan di e boto. E otro persona na Venezuela ta sera yama Guajiro. Hues a mustra cu den chat tambe por mira cu ta mustra A.C.I. potret di revolver. Segun A.C.I., e capitan di e boto a mand’e potret di dos arma. A.C.I. a manda potret di e revolvernan pa Chajiro. Segun A.C.I., Guajiro no a contest’e riba esakinan. Hues a mustra cu miembronan di Wardacosta a haya 3 revolver mescos cu e potret. Segun A.C.I., e no sa di eseynan pasobra e palabracion pa arma no a sigui.
Segun A.C.I. e tabata 5 aña trahando den construccion na Aruba y na dado momento e capitan a cuminsa traha eynan. Despues di tempo e capitan a bisa A.C.I. cu e ta bay busca marihuana na Venezuela y si A.C.I. kier bay. A.C.I. a dicidi di bay pa asina regla su papelnan. A.C.I. e ora ey a pidi G.M.G. pa bay cun’e pasobra G.M.G. ta drecha motor. G.M.G. a instala e motornan na e boto. Segun A.C.I., e no a bisa G.M.G. nada di droga sino cu ta cabaron y pisca nan ta bay busca. Hues a mustra cu G.M.G. a declara na Polis cu e tabata sa di droganan. G.M.G. a nenga di a bisa asina. El a bisa Hues cu el a bisa Polis cu por a mira cu e bultonan tabata droga pero e no sa nada di esaki.
Hues a puntra di con G.M.G. no a bay for di e boto. G.M.G. a bisa Hues cu ora el a mira e bultonan, e no por hala atras sino nan ta mat’e. Hues a puntra nan si nan a haya pago. G.M.G. a bisa cu el a worde bisa cu lo yud’e cu papelnan di permiso mientras cu A.C.I. a bisa cu e lo a worde bisa di haya placa pero no a haya nada.
Recidivista di droga: Hues a mustra cu G.M.G. no ta un desconoci di Polis. G.M.G. na 2023 a worde condena na 3 aña di prison pa droga y despues laga liber y saca for di Aruba. Hues a bisa cu na 2004 tambe G.M.G. a worde condena pa droga. Segun G.M.G., e tabata abordo di e boto hunto cu 8 ilegal y no tabata sa nada di droga. Hues a remarca cu cada bez, G.M.G. ta cay pa importacion di droga. A.C.I. a pidi disculpa pa loke el a haci. El a bisa cu el a hacie pa haya placa door di su situacion financiero malo. G.M.G. a bisa cu door situacion financiero malo, el a bin Aruba pa traha pa manda placa pa famia na Venezuela.
Fiscal a exigi 8 aña di prison: Fiscal a bisa Hues cu Wardacosta a bay Eagle Beach pa un boto sospechoso. Na Eagle Beach e boto tabata riba un trailer tras di un pick up. Tabatin 4 persona pero 2 a core bay. A haya un lote di marihuana y un lote di cocaina den e boto. Tambe a haya 3 revolver. Fiscal ta haya legalmente proba cu G.M.G. y A.C.I. a importa droga. El a bisa cu tin potretnan caminda ta mira G.M.G. y A.C.I. tabata traha riba motor di e boto na Juni 2024, algun dia promer cu e boto a bay Venezuela. Tin chat riba smartphone caminda ta papia di marihuana y cocaina. En total ta trata di mas cu 700 kilo di droga riba un boto chikito. Fiscal a sigui bisa cu den cellular di C.A.I. a haya potret di revolvernan y e mesun tipo di revolvernan cu bala a haya den e boto. E armanan tabata lora den plastic y scondi den boto.
E ta haya cu C.A.I. no ta culpable di e armanan. Pa cu e castigo, Fiscal a bisa cu e ta tene cuenta cu e cantidad grandi droga. Fiscal ta haya cu intencional A.C.I. tabata envolvi den importacion di droga. Pa loke ta G.M.G., Fiscal a tene cuenta cu dos biaha promer el a worde condena pa importa droga abordo di boto.
Fiscal a exigi 8 aña di prison pa cada un. Fiscal a exigi pa e boto, pick up, motornan y trailer mester keda confisca.
Hues, despues di a scucha defensa di mr. Zara, a sera tratamento di e caso y a bisa cu dia 14 Maart 2025 lo tin sentencia
