E ta horta casi tur dia
ORANJESTAD (AAN): E homber Arubiano J.F. di 33 aña, a scucha Hues bisa cu e ta culpabel pa un serie di ladronicia y a worde condena na 36 luna di prison di cual 6 luna ta condicional cu un tempo di prueba 3 aña.
Acusacionnan: Fiscal a presenta varios acusacion contra J.F., kende tabata nenga di a horta. E promer acusacion ta cu entre 18 April 2024 y Juni 2024, unda J.F. a horta na diferente cas den diferente bario.
Fiscal tambe ta acusa J.F. cu entre 13 Mei 2024 y 12 Juni 2024, el a horta for di container na dos cas. Tambe Fiscal ta acusa J.F. cu entre 3 Mei 2024 y 12 Juni 2024 el a horta tirenan di auto.
Subsidiario, Fiscal ta acusa J.F. di encubrimento. Por a mira riba e lista di casonan penal cu tin un total di 10 victima. Ta asina cu ningun a presenta pa haci demanda di daño. Hues a bisa cu tin demanda di daño di un victima.
Ladronicia: Hues a bisa cu J.F. a declara na Polis cu e no tin nada di haci cu ladronicia pero e tin cosnan cu el a cumpra pa bende. J.F. a bisa Hues cu el a bisa Polis cu e no tabata sa cu e cosnan ta di ladronicia. Hues a puntra J.F., ki ora el a haya sa. El a bisa cu ora Polis a yega na su cas.
El a bisa cu el a cumpra e cosnan for di un persona na un cas na Shiribana. Hues a puntra si J.F. a pensa di unda e cosnan aki a sali. El a bisa Hues cu door cu e hende tabata den necesidad di placa, el a cumpra nan. Segun J.F., ora el a paga 500 Florin pa tur e cosnan, el a sospecha cu algo no ta bon pero no tabata sa cu nan ta horta. Ta un cantidad di cos entre otro herment, airco, frigidaire, stoof, machine di welder, el a cumpra.
Bende cosnan horta riba Facebook: Hues a mustra cu Polis a haya chat riba WhatsApp di J.F. cu su amiga y tabata pone cosnan riba Facebook pa bende. E amiga di J.F. a bisa Polis cu e amigo di ruman homber di J.F. tabata por drenta den un compania y asina por a horta cantidad di cosnan. J.F. a bisa Hues cu esey e no sa di dje. Hues a mustra cu e amiga a declara cu J.F. tabata pone e cosnan riba Facebook pa bende. J.F. a bisa Hues, cu despues el a haya sa cu e cosnan tabata horta. E amiga a bisa cu ta J.F. y J.F. su ruman homber, a horta e cosnan.
J.F. a nenga y a bisa Hues cu Polis a pone presion riba su amiga pa e papia cosnan cu no ta berdad. Hues a mustra cu for di WhatsApp por nota cu J.F. tabata manda localidad di casnan y container caminda lo tin cosnan di horta. Tambe tin video cu e lo a manda di un cas. J.F. a bisa cu e no sa. Durante e interogacion di Hues, por a ripara cu hopi biaha J.F. tabata contesta cu e no a horta.
Droga y cantidad di cosnan horta haya: Ta asina cu Polis a haci investigacion na cas di J.F., caminda a haya droga, placa, cantidad di cosnan horta. Despues di e investigacion, e articulonan cu ta di J.F., el a haya back y e otro cosnan horta a bay pa e doñonan.
Segun J.F., e no a haya nada back di Polis. J.F. a bisa cu ta hendenan a horta e cosnan y trece p’e pero e no kier menciona nomber. Hues a mustra cu 12 Juni 2024 a detene J.F. y e tin 8 luna sera. Hues a mustra cu J.F. tin carchi di castigo riba cual tin caso di encubrimento y ladronicia.
Ta dal 8 pa 10 marihuana cada dia: Durante tratamento di e caso, a sali na cla cu J.F. ta usa droga.
Trankilamente asina den Corte, el a bisa Hues cu e ta huma 8 pa 10 pito di marihuana pa dia y den weekend e sa usa Ecstasy (XTC) tambe.
Hues a bisa cu tin un demanda di daño y perhuicio di 4.500 Florin cu ta pa cosnan cu a horta for di un cas.
Fiscal: Segun Fiscal a bisa Hues e caso aki a cuminsa ora cu un persona C. a haci denuncia di ladronicia. E persona C. a bisa Polis cu el a mira riba Facebook articulonan cu J.F. a pone pa bende cu ta di dje. Polis a bay haci investigacion na cas di J.F. y mas cu 150 articulo a keda confisca. Fiscal a bisa cu despues Polis a bolbe bay haci investigacion y a haya mas cos.
Na opinion di Fiscal, tin suficiente indicacion cu J.F. tabata activo den ladronicia na diferente casnan den diferente bario. Ta asina cu hendenan a haci denuncia y a reconoce nan articulonan cu a worde horta. Fiscal a mustra cu den smartphone di J.F. a haya potretnan di articulonan horta. Den smartphone di e amiga di J.F., a haya video di containernan y casnan caminda ta papia di horta.
Fiscal a remarca cu practicamente tur dia, J.F. tabata horta. J.F. tabata papia via WhatsApp cu otronan na unda mester bay horta. Fiscal ta haya cu por papia di encubrimento di articulonan horta. J.F. tabata cumpra cosnan horta for di un choller house na Shiribana. Ta conoci cu na e cas ey ta haya cosnan horta. Fiscal ta haya J.F. culpable di incubrimento di articulonan horta. Tambe cu a horta for di un container.
Fiscal a bisa cu hende ta traha hopi duro pa yega na su cosnan. J.F. casi tur dia tabata bay horta manera ta algo masha normal. Fiscal a bisa cu esaki no por! Fiscal a mustra cu na 2021 J.F. a worde condena pa encubrimento. Fiscal ta haya cu J.F. tabata haci esaki manera un “side job”.
Na opinion di Fiscal, e placanan cu Polis a confisca, lo mester keda confisca. Tambe el a exigi pa confisca e dos autonan di J.F. Fiscal a exigi 42 luna (3 aña y 6 luna) di prison y a pidi Hues pa declara e demanda di daño no admisibel.
Abogado: Abogado mr. Edwards a bisa Hues cu J.F. ta para riba cu e no a horta sino a cumpra cosnan. E abogado ta haya cu mester declara J.F. liber di ladronicia, manera Fiscal a bisa. Pa loke ta incubrimento, e abogado ta haya cu tin duda cu ta J.F. a encubri cosnan cu ta procedente di ladronicia na cierto lugar. Abogado a bisa cu tin otro hendenan cu tabata horta. El a referi na decision di Hues pa e otro ladronicianan.
Abogado a bisa Hues cu pa loke ta e autonan cu Fiscal a exigi pa keda confisca, e autonan mester bay back. E abogado ta haya cu e auto Toyota mester bay back pa J.F. pasobra no tin ningun indicacion cu e auto tabata envolvi den encubrimento di cosnan den e horta. E abogado a sigui bisa cu e otro auto Nissan ta solamente e reemnan y tirenan ta procedente di encubrimento y mester duna e auto back. Pa cu e placanan confisca, e abogado a bisa cu tempo cu a detene J.F., e tabata traha hunto cu su amiga. Na opinion di abogado, e placa confisca ta placa cu nan tabata spaar, Polis a haya den un tas cora y no ta asina cu esaki ta ganashi di bendemento di cosnan horta.
Sentencia: Hues a sera tratamento di e caso y a dicta sentencia di biaha. Hues ta haya cu J.F. ta culpable di ladronicia di un frigidaire, hermentnan y otro cosnan for di un cas na Marawiel. Hues a mustra cu tin combersacionnan riba WhatsApp cu ta mustra cu J.F. hunto cu otronan a haci esey. Pa e otro cosnan, Hues ta haya J.F. culpable di encubrimento.Tin un otro caso di ladronicia cu tambe Hues ta haya J.F. culpable. En total 2 ladronicia, 5 encubrimento di cantidad di articulo.
Ta asina cu no ta promer biaha cu J.F. ta cay sera pa ladronicia. Hues a cuminsa cu na 2018, J.F. a haya castigo di prison pa ladronicia y encubrimento na 2021. Hues a bisa cu e ta comparti punto di bista di Fiscal cu tur dia J.F. tabata activo. Hues tin e impresion cu tin hopi mas caso pero no tin pruebanan. Hues a bisa cu encubrimento ta mesun castigabel pa ladronicia. Sin encubrimento no tin ladronicia. Hues a condena J.F. na 36 luna di prison di cual 6 luna ta condicional cu un tempo di prueba 3 aña.
Hues a honra e demanda di 4.500 Florin y cu J.F. mester paga. Hues a pone medida di pago. Fiscal a bisa cu e auto Toyota lo worde duna back pero no e Nissan cual tabatin reemnan y tire horta. E placanan lo keda confisca.
