Hues a confirma exigencia di Fiscal
ORANJESTAD (AAN): E homber D.F. di 36 aña di Hulanda y biba na Rotterdam, no a keda nada contento ora el a tende Hues confirma exigencia di Fiscal y conden’e na 9 aña di prison pa a tira riba un auto y herida dos hende.
Luna pasa tratamento di e caso aki a tuma lugar, caminda a acusa D.F. di intento di mata e hombernan V.E. y M.E. riba 21 Januari 2024. Tambe e ta worde acusa di posecion di arma di candela y destruccion di un auto.
Fiscal a baha pisa: Dia 30 Augustus 2024 durante tratamento di e caso, Fiscal a bisa Hues cu ta un hecho cu tabatin un tiramento na Olde Molen. E pregunta ta, kende a tira. Por a mira riba video di seguridad tur loke a sosode riba e parkinglot dilanti di Molen. Polis ta conclui cu ta D.F. a tira riba e auto, ora e tabata para tras di un auto preto.
E hombernan V.E. y M.E. a sufri rasca di tiro. Fiscal ta haya legalmente proba cu ta D.F. a tira, aunke cu D.F. ta desmenti esey. Fiscal a bisa cu por a mira riba video cu un tal S. a saca algo for di su zij y pasa D.F. esaki. Despues e tiramento a sosode.
Fiscal ta haya cu e tiramento ta un intento di mata riba V.E. y M.E. E ta haya D.F. culpable di posecion di arma di candela y a causa destruccion riba e auto cu el a tira. Fiscal a bisa cu tabatin autonan para riba parkinglot y tabatin mas hende ta cana rond. El a bisa cu D.F. tabatin suerte cu nada mas serio a sosode.
Pa cu e castigo, Fiscal a bisa cu e ta tene cuenta cu D.F. a pone bida di hendenan den peliger. A sacudi comunidad y ta crea sentido di insegurida. Fiscal a exigi 9 aña di prison.
Sentencia: Diabierna mainta Hues a bisa cu e ta haya legalmente proba cu D.F. a tira riba 21 Januari 2024 riba un auto banda di e parkinglot di Olde Molen. Esaki Hues ta considera un intento di mata mas biaha haci. Tambe Hues ta haya D.F. culpabel di posecion di arma di candela y destruccion.
Pa cu e castigo, Hues a bisa cu e ta tene cuenta cu a tira riba un parkinglot di Olde Molen den direccion di un auto. Dos persona a resulta herida. Un na bariga y otro na nek. Hues ta haya cu D.F. a crea un situacion peligroso pa otronan. Hues a confirma e exigencia di Fiscal y a condena D.F. na 9 aña di prison.
Acusado a rabia: Den sala di Corte, por a mira claramente cu D.F. no a keda nada contento cu e sentencia y tabata manera murmura y zundra.
Su abogado a bay papia cun’e y despues miembronan di CEA a hib’e. Tempo lo mustra si e ta bay apela e sentencia of no.
