ORANJESTAD (AAN): E homber Curasoleño E.G.B. di 52 aña riba Dialuna mainta a presenta den Corte pa scucha decision di Hues den e caso penal cu Ministerio Publico a cuminsa contra dje.
Luna pasa tratamento di e caso a tuma lugar caminda ta acusa B. di a haci preparacionnan pa intencional exporta cocaina for December 2020 y Februari 2021 pa Hulanda. Tambe ta acusa B. di posesion di 10 kilo di cocaina y tabata forma parti di un organizacion criminal na Aruba y Curacao.
Fiscal a exigi 4 aña di prison: Durante tratamento di e caso luna pasa, Fiscal a menciona cu tin varios casonan di traficacion caminda a scucha yamadanan. Investigacion ta mustra cu na December 2020, B. a cuminsa prepara pa transporta cocaina pa Hulanda.
E preparacion ta, cu mester hinca e kilonan di cocaina, den un cargamento di flor cu ta bin for di Colombia y ta destina pa Hulanda. B. mester hinca GPS-Tracker (no ta conoci pa prensa si ta Apple Air-Tag) den bloki di cocaina pa asina na Hulanda, esnan encarga por haya e droga. Fiscal a bisa cu nan a papia di pago di personanan envolvi na Aruba. For di Aruba, B. tabata manda potret di e blokinan di cocaina. El a haya placa di blokinan di droga. B. a admiti di traficacion di blokinan di cocaina.
Na December 2020 tabata papia di 10 kilo di cocaina. Na Februari 2021 tabata papia di 10 kilo di cocaina. E tabata manda potret di e bloki den cual el a hinca e GPS-Tracker. Tambe e tabata manda potret di e cantidad di blokinan. Fiscal a bisa cu e ta haya legalmente proba cu na December 2020 tabatin 1 bloki so y na Februari 2021 tabatin 7 bloki. Fiscal ta haya cu B. ta forma parti di un organizacion criminal. Tabatin cantidad di mensahenan riba smartphone caminda B. tabata un persona importante den e organizacion criminal cu tabata dedica den traficacion di droga. Fiscal ta haya cu B. tabata den un organizacion professional y tabatin un funcion importante.
Na opinion di Fiscal, mester manda señal bon cla cu no ta acepta tipo di actividadnan asina. Fiscal ta haya cu B. a envolvi su mes den un organizacion pa gana placa y no a worry cu e consecuencia cu esaki por tin pa comunidad. Fiscal a exigi 4 aña di prison, kitando e tempo cu e ta sera. Fiscal a bisa pa debolbe e iPhone cu a confisca di B.
Abogado: Abogado mr. Mohamed a bisa Hues cu B. ta worde acusa di preparacion di traficacion di cocaina pa Hulanda, posesion di cocaina y forma parti di organizacion criminal. E abogado a bisa Hues cu na December 2020 y Februari 202, B. a prepara pa manda droga pero esakinan no a sigui. E ta laga na Hues pa dicidi riba e preparacion.
E abogado a menciona un sentencia di Corte. Tambe el a menciona sentencia di 2023 relaciona cu cocaina, caminda el a mustra cu mester determina cu ta cocaina. Polis no a haya nada, no tin test di laboratorio cu ta mustra cu e bloki ta realmente cocaina. B. no a test e blokinan si nan ta realmente cocaina. E abogado ta haya cu no por prueba cu B. tabatin cocaina den su man y ta haya cu mester declar’e liber. E abogado a menciona sentencia di un caso na Hulanda riba organizacion criminal. E ta haya cu tur dos transporte no a sigui.
E ta di opinion cu esaki no ta suficiente pa papia di un organizacion criminal. Despues di Februari 2021, no a sosode nada mas. Na opinion di mr. Mohamed, no tabatin un temporada largo di cooperacion manera ley ta exigi pa por papia di un organizacion criminal. El a menciona un caso di traficacion di 2019 di 10 kilo di ocaine, caminda a condena e acusado na 8 luna di prison pa participa den organizacion criminal. E ta haya e castigo exigi pa Fiscal ta exagera.
Sentencia: Dialuna mainta, Hues a bisa cu a keda legalmente proba cu B. a prepara transporte di droga. Tambe Hues ta haya proba posecion di cocaina. Hues a bisa cu esey ta a base di Whatsapp y potret cu B. tabatin algun bloki di cocaina. Tambe tabata papia di prijsnan cu a paga. Tambe a pone GPS-Tracker den blokinan. Hues ta haya cu B. tabata forma parti di un organizacion criminal y cu B. tabatin un funcion importante.
E droganan tabata worde hinca den cargamentonan di flor cu ta destina pa Hulanda. B. tabatin contacto na aeropuerto. Hues no a sigui Fiscal su exigencia sino a baha esaki. Hues a condena B. na 34 luna di prison kitando e tempo cu e ta sera den KIA. Hues a ordena pa e smartphone iPhone worde duna back na B.
