Aduana a haya cantidad di placa scondi den maleta
ORANJESTAD (AAN): Hues di Corte di Husticia a trata e caso penal cu Ministerio Publico a cuminsa contra e muhe Asiatico di inicial Y.F., kende ta wordo sospecha di labamento di placa y no a declara na Douane cu e tin cantidad grandi di placa.
Hues ta comparti punto di bista di Fiscal cu aki ta trata di labamento di placa y a confirma e castigo exigi cu ta 6 luna di prizon y e mas cu 135 mil dollar ta keda confisca.
Yen di placa scondi den maleta: Ta asina cu e muhe Y.F. no ta na Aruba, el a bay su pais di origen. Su abogado mr. Hernandez a presenta acompaña pa mr. Faarup. E acusacion cu Fiscal a presenta ta cu ta acusa Y.F. cu riba 12 Maart 2025, e tabatin mas di 135 mil Dollar sin declara esaki na Aduana na Aeropuerto. Miembronan di Aduana a bay listra den e maleta y a haya cantidad di placa scondi den pañanan, bleki y cahanan.
Fiscal a bisa cu na prome instante, Y.F. a bisa Aduana cu ta 33 mil Dollar so e tin. Fiscal a sigui bisa cu despues cu miembronan di Douane a haya tur e placanan, Y.F. a bisa cu e tabata traha na un Restaurant y a haya placa. Investigacion a mustra cu riba un cuenta di Y.F. a haya mas cu 135 mil Dollar.
Segun Y.F. su storia, “el a spaar su placa y tabata gamble hopi”. Sinembargo investigacion di Polis a mustra cu e Y.F. enberdad tabata bay casino y tabata registra deposito y despues tabata lanta e placa. Esey ta “pa laga mustra” cu el a gamble den casino siendo cu no ta asina.
Abogado mr. Hernandes a bisa Hues cu su cliente a traha duro na Aruba pa yega na e placa y tur cos ta depende di e resultado di e caso si e ta bolbe.
Fiscal a baha pisa: Fiscal a bisa Hues cu e ta haya legalmente proba cu Y.F. a keda sin declara placanan na Aduana. Fiscal ta haya cu esaki ta ‘labamento di placa’.
El a mustra cu miembronan di Aduana a haya placanan scondi den paña- y blekinan den maleta. Na opinion di Fiscal, e muhe Y.F. no a duna splicacion drechi di procedencia di e placa. El a bisa cu Y.F. a bisa cu e placa ta procedente di Casino caminda el a gana. Fiscal a sigui bisa cu Y.F. a bisa cu e tabata gana 2.200 Florin pa luna den un restaurant. E placa tabata wordo deposita na banco y e placa despues tabata wordo manda pa su pais na Asia.
Fiscal: Segun Fiscal, Polis a haci investigacion na Casino pero no por a saca afor cu Y.F. a gana hopi placa. Polis a constata cu Y.F. tabata deposita placa y lanta e placa bek pa laga mustra cu el a gamble. Fiscal a cuestiona e hecho cu Y.F. a bisa cu e tabatin 33 mil Dollar pero despues ta resulta cu ta mas cu 135 mil Dollar. Fiscal ta haya cu Y.F. no a declara e placa na Aduana y riba dje a duna informacion robez na autoridad na Aeropuerto.
El a mustra cu e Y.F. a declara na Polis, cu el a sconde e placa den maleta pasobra “el a tende cu Aduana ta horta placa for di maleta”.
Fiscal a bisa Hues cu e no ta haya cu por proba cu Y.F. lo tabata haci transaccion pa otro. El a pidi Hues pa declara Y.F. liber pa esaki. Pero si Fiscal ta haya proba labamento di placa y cu Y.F. no a declara placa na Aduana. El a exigi 6 luna di prizon pa Y.F. y cu e mas cu 135 mil Dollar mester keda confisca.
Defensa di Abogado: Abogado mr. Hernandez a bisa Hues cu no tin ningun indicacion cu e placa ta for di fuente malo. E unico cos ta cu su cliente Y.F. no a declara e placa na Aduana. E abogado a sigui bisa cu e no ta haya cu por papia aki di labamento di placa y mucho menos di transaccion di placa. E ta haya cu mester declara Y.F. liber y solamente duna un multa pa no a declara e placa na Aduana. E abogado a bisa cu Y.F. tabata traha 10 aña na e Restaurant y tabata haya tips. E tabata biba cerca doño di e restaurant y a spaar e placa pa e bay bek su pais di origen y cumpra un cas pa e biba.
E abogado a bisa cu Y.F. ta papia idioma Asiatico y no ta compronde otro idioma. E no por a lesa e borchinan na Aeropuerto cu mester declara placa na Aduana. E abogado ta haya cu e doño di trabao a declara cu Y.F. tabata gana 1.300 Dollar pa luna y tambe tabata haya tips. E placanan cu Y.F. tabata manda pa su pais di origen, tabata e placanan di tips cu e tabata haya di clientenan. E abogado a bisa cu investigacion di Polis na Casino, no a mustra nada no-normal y Y.F. no tabata gasta hopi placa den casino. Na opinion di abogado, Y.F. tabata spaar su placa y no tabata sa cuanto placa realmente e tabatin. El a sconde e placanan den cahanan y otro cosnan, pa asina e placanan no tabata visible pa hende por horta. E abogado ta haya cu Y.F. no a comete delito intencional y mucho menos labamento di placa. El a pidi Hues pa debolbe e placa.
Castigo di Hues: Hues a sera tratamento di e caso y a dicta sentencia di biaha. Hues a bisa cu tabata sospecha Y.F. di labamento di placa. Polis a interoga Y.F. y a haci investigacion. Na opinion di Hues, no por a verifica tur cos cu e muhe Y.F. a bisa.
Hues a mustra cu Polis a haya den smartphone di Y.F. combersacion caminda e doño di e Restaurant tabata ‘coach/splica’ e muhe Y.F. kico e tin di bisa na Aduana. Hues ta haya cu aki si por papia di labamento di placa.
E otro punto ta cu Y.F. no a declara e placa na Aduana. Na opinion di Hues, e forma con tur e placa tabata scondi ta duna indicacion cu ta labamento di placa. Tambe Hues a mustra cu por a scucha den e smartphone con e muhe Y.F. a manda mensahe y bisa cu “el a wordo gara”.
Hues a bisa cu no por prueba cu Y.F. lo tabata haci transaccion di placa pa hende y ta declar’e liber di esaki. Pero si Hues ta haya Y.F. culpabel di labamento di placa y a keda sin declara placa na Aduana.
Hues a confirma e exigencia di Fiscal. Hues a condena Y.F. na 6 luna di prizon y cu e mas cu 135 mil Dollar ta keda confisca.
