Ministerio Publico
ORANJESTAD (AAN): Corte Comun di Husticia a start dialuna cu tratamento den apelacion di Flamingo, un investigacion grandi di corupcion den cual tin 3 sospechoso dilanti mesa berde: ex-minister y parlamentario O.E.O. y e dos ex-ambtenaarnan E.F.E. en R.I.W.
E caso Flamingo ta trata di maluso di funcion, estafa y corupcion pasivo y a haya hopi atencion na aña 2022, despues cu O.E.O. a keda deteni.
Corupcion ta ora un persona uza su poder of su posicion pa beneficio personal, hopi biaha na costo di interes publico.
Esaki por tuma diferente forma: for di soborno y vriendjespolitiek te fraude y abuso di poder.
E peliger mas grandi di corupcion ta no solamente cu placa ta desaparece, sino e perdida di confiansa. Ora ciudadanonan sinti cu reglanan no ta aplicabel pa tur hende, e creencia den un gobierno honesto ta cuminsa kibra.
Si un ministro duna tereno na prime locations na su amigonan, e amigonan aki ta ricibi trato preferencial.
Mientrastanto ciudadanonan comun y coriente di Aruba ta keda sin haya chens, aunke nan tambe tin derecho riba un pida tereno. Asina corupcion ta funciona: e ta beneficia un grupo chikito y ta pone e resto di comunidad di Aruba na desventaha.
Riba 22 di januari 2025 Corte den Prome Instancia a condena O.E.O pa complicidad di estafa, intento di estafa di Pais Aruba y maluso di su funcion ministerial den e periodo di 2017 te 2020.
El a haya un castigo di prison pareu na e cantidad di dia cu el a pasa den detencion preventivo y e maximo di 240 ora di trabao pa comunidad.
Pa algun di e otro hechonan, entre nan corupcion pasivo, el a wordo declara liber.
Tanto Ministerio Publico como e sospecho a bay den apelacion.
E sospechoso E.F.E. a wordo declara liber den Corte den Prome Instancia, y contra e decision aki Ministerio Publico a bay den apelacion.
R.I.W. a wordo condena na castigo di prison condicional y trabou pa comunidad di 180 ora pa complicidad di estafa, falsificacion y abuso di funcion, y el a apela e sentencia aki.
Awe Ministerio Publico a pidi Corte Comun di Husticia pa condena O.E.O. pa un castigo di prison incondicional di 3 aña, como tambe pa sake for di e derecho di ocupa un cargo publico y di su derecho di voto pasivo pa duracion di 6 aña.
Ministerio Publico a pidi ademas pa condena e sospechoso E.F.E. pa un castigo incondicional di 18 luna pa complicidad di corupcion pasivo y complicidad di abuso di funcion di ambtenaar.
Contra e sospechoso R.I.W. Ministerio Publico a pidi Corte Comun di Husticia pa confirma e decisionnan di Hues den Prome Instancia.
E tratamento den apelacion lo sigui te diabierna awor. Diahuebs abogadonan lo presenta nan pleito y despues Corte Comun di Husticia lo determina un fecha pa sentencia.
