Asunto di Tetra-radio conoci como ‘Caso New York’
ORANJESTAD (AAN): Riba Diaranson, Corte di Prome Instancia a dicta sentencia den e caso penal ‘New York’.
Ta trata di e caso contra e periodistanan R.L., B.K., N.G. y N.C.d.A.
E sospechosonan ta worde acusa di corupcion activo di funcionarionan publico, complicidad di violacion di secreto oficial y participacion den un organizacion criminal durante e periodo di 1 di januari 2021 te 22 di maart 2023.
E tratamento di awemainta ta un continuacion di e caso contra e agente policial Vos, kende a worde condena riba 8 di december 2023 pa 16 luna di prison, di cual 8 ta condicional, pa malversacion, violacion di secretonan di trabao, abuso di su funcion y soborno di parti di miembronan di prensa. Ademas el a worde prohibi di eherce e trabao di polis pa e duracion di 3 aña. Ministerio Publico a bay den apelacion contra e sentencia aki.
Corte a absolve e sospechosonan di participacion den un organizacion criminal. B.K. a worde declara liber di corupcion activo di funcionarionan publico, conforme solicitud di Ministerio Publico.
E otro tres sospechosonan a worde condena pa corupcion y e cuatro sospechosonan a worde condena pa complicidad den violacion di secreto oficial di trabao. Teniendo na cuenta e absolucion di participacion den un organizacion criminal, e castigonan imponi ta bao di e castigonan exigi pa Ministerio Publico.
B.K. a haya un castigo di trabao pa comunidad di 150 ora y ademas un castigo di prison condicional di 3 luna cu un tempo di prueba di 3 aña.
R.L y N.G. a haya un castigo di trabao pa comunidad di 240 ora y ademas un castigo di prison condicional di 12 luna cu un tempo di prueba di 3 aña.
N.C.d.A. a haya un castigo di prison di 6 luna y ademas un castigo di prison condicional di 12 luna cu un tempo di prueba di 3 aña.
Corte ta tuma e sospechosonan na malo cu nan a intercepta comunicacionnan confidencial di Tetra-radio di Polis di Aruba aparentemente pa interes propio, beneficio economico y/o sensacionalismo. Door di haci esaki, a viola privacidad di ciudadanonan di Aruba y a causa posible riesgonan y peligronan pa e ciudadanonan, Polis y sociedad.
Corte a tuma na cuenta tambe e actitud procesal di e sospechosonan na momento di determina e haltura di e castigo. N.C.d.A. a haya e castigo mas halto pasobra el a worde condena anteriormente pa hechonan similar, y esey no a strobe pa bolbe comete delitonan di e mes indole.
Ministerio Publico ta considerando ainda si lo apela. Tanto Ministerio Publico como defensa tin 14 dia pa tuma e decision aki.
