Sentencia den caso di Tetra-Radio
- Castigo di 6 luna den KIA pa Speed Andrade
- El a condena e periodistanan na castigo combina
ORANJESTAD (AAN): Diaranson mainta sentencia a cay den e caso penal cu Ministerio Publico a cuminsa contra Richard Lacle, Brian Koolman, Norben Giel y Nelson Cabral de Andrade (Speed). Ta asina cu Speed no a presenta pasobra e ta den exterior. Koolman tampoco a presenta pasobra e ta na Hulanda.
Hues a baha e exigencia di Fiscal contra e periodistanan pasobra e no ta haya proba e acusacion di organizacion criminal.
Exigencia Fiscal: Luna pasa durante tratamento di e caso, Fiscal a bisa cu tur 4 sospechoso a cumpra Vos pa haya informacion di Polis. Fiscal ta haya cu Vos a viola su deber como Polis door di ricibi placa, regalo pa haci cosnan contra di su deber.
Fiscal ta haya cu tabatin un relacion largo entre nan y esey ta worde considera organizacion criminal. Fiscal a mustra cu Vos a instala e aparatonan di computer na su cas y tabata ‘stream’ tur informacion di audio transmiti via Tetra-Radio di Polis pa tempo largo.
Fiscal ta haya nan culpable di a viola secreto di Polis. Fiscal a expresa cu periodistanan mester atene nan mes na norma, etica periodistico y ley den un comunidad. E ta haya cu aki den forma structural a bay scucha Tetra-radio di Polis.
Fiscal a exigi 2 aña di prison pa Speed y a exigi pa detencion di biaha ora Hues dicta sentencia. Fiscal a exigi 18 luna di prison di cual 8 luna ta condicional pa Giel y Lacle y cu 3 aña di prueba. Fiscal a exigi 6 luna di prison pa Koolman cu 3 aña di prueba.
A cumpra Vos: Diaranson mainta ora Hues a duna su sentencia, a cuminsa na bisa cu e ta declara tur cuater acusado liber di e acusacion di “forma parti di un organizacion criminal”. Hues ta haya cu no tin suficiente prueba cu na ta di un organizacion criminal.
Hues a sigui bisa cu Speed, Giel y Lacle ta culpable di a cumpra Agente policial Vos. Hues ta haya proba cu Speed, Giel y Lacle a paga Polis Vos. Cada un a hacie na nan manera. Hues a bisa cu e ta haya e declaracion di Vos confiabel. Na opinion di Hues, no ta esey so. E declaracion di Vos, ta worde confirma door di e chatnan riba WhatsApp. Tin prestamo di placa haci y a duna regalo, pa asina move Vos como ambtenaar haci cosnan cu ta contra di su obligacion como agente di Polis.
A viola obligacion di Vos: Hues ta haya tur cuater periodista culpable cu Vos a viola su obligacion di comparti informacionnan secreto di Polis. Hues a bisa cu Vos no a haci’e su so. E acusadonan a yuda door di duna diferente Laptop Computers, facilita aparato Mi-Fi cu su propio account, instalacion di Apps di ‘Zello’ riba e Laptop Computernan, cu via di un waya tabata re-transmiti tur audio for di Tetra-radio di Polis. Hues ta haya cu cada un a haci aporte significante den esaki.
No por haci delito pa haya informacion: Hues a bisa cu pa cu e acusacion di organizacion criminal, no tin suficiente prueba di trahamento structural pa por papia di organizacion criminal. Pesey ta declara nan liber riba e parti ey.
Hues a reacciona riba defensa di abogado, cu mester tene cuenta cu libertad di prensa. Hues a bisa cu en principio mester respeta esaki pa democracia den un pais. Sinembargo, e limite di libertad di prensa ta worde determina pa ley.
Hues a enfatisa cu un periodista no por haci delito pa haya informacion. Hues ta haya cu esaki a sosode den e caso aki. El a bisa cu solamente den caso excepcional por tin excepcion.
Pa cu e castigo, Hues a bisa cu e ta tene cuenta cu seriedad di e caso. E ta haya cu aki ta trata di un caso serio caminda a causa cu Vos a viola su obligacion y daña imagen di Polis. Esaki a crea duda den Polis door cu informacion secreto di Polis ta cay den man di e acusadonan. Hues ta haya cu esaki por causa peliger den comunidad.
Hues a tuma e acusadonan na malo cu door di sensacion y nan propio interes a haci esaki.
Castigo combina: Hues a bisa cu e ta castiga e acusadonan menos cu Fiscal a exigi, pasobra e no ta haya proba e organizacion criminal. Hues a condena Lacle y Giel na 240 ora di trabao pa comunidad y si no cumpli cu esaki, lo mester bay 120 dia cera den KIA.
Tambe Hues a condena Lacle y Giel na 12 luna di prison condicional cu 3 aña di prueba. Esey ta nifica cu si den e periodo di 3 aña nan haci algo contra ley, nan lo por haya e 12 luna di prison riba e castigo cu nan lo haya pa e delito cu nan a haci.
Hues a condena Speed na 18 luna di prison di cual 12 luna ta condicional cu un tempo di prueba di 3 aña. Esey ta nifica cu Speed mester bay 6 luna cera den KIA.
Hues a bisa cu Speed a haya mas castigo pasobra el a haci e delito aki den su tempo di prueba pa e mesun delito aki cu el a yega di haci den pasado.
Hues a condena Koolman na 150 ora di trabao pa comunidad y si e no cumpli cu esaki, e lo mester bay cera 75 dia di prison. Tambe un castigo condicional di 3 luna di prison cu 3 aña di prueba
