Tres sospechoso condena
ORANJESTAD (AAN):Corte di Husticia a trata e caso penal cu Ministerio Publico a cuminsa contra e hombernan G.V. di 29 aña, J.M. di 31 aña y C.L. di 27 aña, kendenan ta worde acusa cu riba 23 di Juni 2025 a importa marihuana scondi den co’i hunga. Hues a confirma e castigo combina cu Fiscal a exigi pa e hombernan J.M. y C.L. y a baha e castigo di prison pa e homber G.V., kende ta worde considera como e organizador.
Marihuana scondi den co’i hunga: Hues a mustra cu segun e relato di Polis, Douane riba 23 Juni 2025, a confisca 4 bulto di marihuana cu tabata scondi den un frishider di co’i hunga. E 4 bultonan a pisa 1.962 gram. E frishider tabata riba nomber di C.L.
Ta asina cu C.L. a admiti cu e tabata sa cu ta droga. El a bisa Hues cu door cu amigonan a pidi’e, el a haci’e. El a bisa cu el a haya instruccion di G.V., kende el a mira un biaha so. Nan a ofrece 500 Dollar pa trece e marihuana. C.L. a bisa Hues cu el a actua hopi bobo. El a bisa cu su trabao tabata pa bay busca e frishider di co’i hunga. Ora el a bay busca e pakete, el a worde deteni y su smartphone confisca.
Hues mustra cu e mesun dia a detene J.M., kende a bay busca un stoof di co’i hunga. Douane a haya 2 rol di marihuana scondi den e stoof cu a pisa algo mas di 1.400 gram. Segun J.M., e no tabata sa cu tabatin marihuana den e stoof di co’i hunga. Hues a remarca cu tur dos importacion di marihuana, a worde haci mesun cos. Ta asina cu J.M. conoce G.V. y nan a yega di worde deteni pa marihuana. Tambe cu nan a yega di viaha hunto bay Merca. Hues ta haya cu e ta parce cu ta J.M. y G.V. a importa e droga. J.M. no kier a duna contesta riba esaki.
Hues a bisa cu G.V. a bin den e caso aki door di informacion cu a haya for di smartphone di C.L. Segun G.V., el a haci un fout door di acerca C.L. pa busca marihuana pa un hende. C.L. lo mester a duna G.V. e droga y G.V. lo entrega e persona e droga. Hues a puntra G.V., kende e persona cu mester a haya e droga ta. G.V. a bisa Hues cu e no ta bay menciona nomber.
El a sigui bisa cu e no tin nada di haci cu J.M. su cargamento. El a bisa cu nan ta amigo for di tempo di school.
Ta asina cu C.L. y J.M. a worde laga liber despues di algun luna cera. G.V. te ainda ta encarcela. Hues a mustra cu J.M. na 2024 a haya condena pa droga. G.V. na 2022 y 2023 a haya condena pa droga.
Fiscal: Fiscal a bisa cu den e frishider di co’i hunga a haya casi 2 kilo di marihuana y den e stoof di co’i hunga casi 1.5 kilo di marihuana. Fiscal a sigui bisa cu C.L. a admiti cu e lo worde paga 500 dollar for di G.V. pa busca e frishider di co’i hunga cu marihuana cu a bin riba C.L. su nomber. J.M. ta desmenti di sa algo di e droga den su stoof di co’i hunga.
Fiscal a cuestiona actitud di J.M. den Corte, kende ta haci uso di su derecho di silencio pa no papia. Fiscal ta haya cu ta J.M. a importa e marihuana hunto cu un otro for di America.
Na opinion di Fiscal, G.V. ta e persona di contacto di C.L. G.V. tabata duna instruccion y ta mas bien organiza e importacion di marihuana. Pa cu e castigo, Fiscal a bisa cu e ta tene cuenta cu C.L. a coopera cu e investigacion. El a exigi pa C.L., 240 dia di prison di cual 150 dia ta condicional cu 3 aña prueba. Pa J.M., Fiscal a exigi 360 dia di prison di cual 266 dia ta condicional cu 3 aña di prueba. Pa G.V., Fiscal a exigi 18 luna di prison.
Abogadonan a trece nan defensa y mr. Canwood a cuestiona postura di Fiscal cu a exigi 18 luna pa G.V. Segun e abogado, Fiscal ta sospecha cu G.V. lo ta envolvi den e caso di J.M. pero no ta asina. El a pidi Hues pa duna G.V. castigo igual cu e otronan.
Castigo: Hues a sera tratamento di e caso y a dicta sentencia di biaha. Hues a bisa cu Douane a intercepta e marihuana y e paketenan ta riba nomber di C.L. y J.M. Ta asina cu C.L. a admiti y bisa cu ta G.V. a bis’e. J.M. ta bisa cu e no sa di e droga.
Hues ta haya tur tres culpabel. Hues a confirma e exigencia di Fiscal pa C.L. y J.M. Hues a bisa cu G.V. ta un recidivista y a baha e castigo na 15 luna di prison.
