E caso di hincamento a conmove tur hende
ORANJESTAD (AAN): Tratamento di e caso riba Diahuebs di e mucha muher S.A.A.H. di 16 aña kende a hinca un dama di inicial A. cu cuchiu, a conmove tur hende.
Hues a bay hopi profundo den e caso, caminda no solamente a scucha e acusado sino e mama di e victima, e mama di e acusado, miembro di Reclassering, miembro di Respaldo. Pa algun ora, sala di Corte tabata keto. Tur hende tabata conmove kico tur tabata worde papia. Por a mira cu tanto e mama di e victima como e mama di e acusado S.H. tabata yora.
Mama di victima y mama di acusado a yora: E mayornan di e victima A., a haci demanda di daño per juicio. E demanda di daño inmaterial ta 10 mil Florin. E mama di e victima A., hopi emociona a bisa Hues cu su yiu a keda cu cicatriznan mahos door cu e yiu ta sufri di keloid.
E mama a bisa Hues cu nan a keda hopi afecta pa tur loke mester a pasa aden. Cu wowo na awa e mama a bisa cu el a gradici Dios cu su yiu ta na bida. El a bisa Hues cu no tin prijs pa loke a pasa cu su yiu.
El a bisa cu e no kier pa e cos aki pasa cu ningun famia. Hopi emociona e mama a bisa cu su yiu tabata den cuido intensivo. El a bisa cu ainda tin cu warda con lo bay para cu e hincanan. E mama a sigui bisa Hues cu su yiu no por haci ehercicio pasobra e no por hala rosea bon. E ta haya cu loke S.H. a haci ta pa mata pa su yiu.
Cu lagrima na wowo y haciendo movecionnan di hinca, el a bisa Hues cu 3 biaha S.H. a hinca su yiu. El a bisa Hues, promer biaha cu S.H. a hinca, e yiu a core, di dos biaha a bolbe hinca y despues a bolbe hinca y e yiu a cay abao. Por a mira cu e mama di S.H. tambe tabata wowo na awa, ora e tabata tende e mama di e victima conta kico tur e mester a pasa aden.
E mama a bisa cu e tabata den parkinglot ta warda su yiu. Ora el a yega, ya su yiu tabata den ambulance. El a bisa cu e ta spera cu lo por yuda S.H. cu ta un mucha. E mama a bisa Hues cu como mama e ta compronde. Por a nota cu den sala di Corte tur hende tabata biba e emocionnan. Esnan presente tabata sinti loke e mama di e victima tabata expresa. Na final e acusado a bisa Hues cu ta duel e hopi loke a sosode.
E mama di e acusado S.H. a bisa Hues cu S.H. tabatin hopi problema y no tabata bisa nada. Segun e mama, S.H. no tabata bisa cu e tabata victima di bullying na school. E mama a bira wak e mama di e victima y a bisa sorry loke a pasa pero e tambe ta pasando hopi trabao cu S.H. E mama a bira wak Hues y a bisa cu door di e lamentable incidente aki, el a haya sa cu su yiu tin problema y ta hayando atencion di Respaldo. E mama a bisa cu bo no sa kico bo yiu ta haci ora e yiu sali for di cas. Awor cu a haya sa, e mama ta busca tur manera pa yuda S.H.
