El a manda e persona guli bolita na Colombia y trece Aruba
ORANJESTAD (AAN): Diabierna 3 October 2025, Corte di Husticia ta trata e caso penal cu Ministerio Publico a cuminsa contra e homber G.E.T. di 40 aña. Na Juni 2025, tratamento di e caso mester a tuma lugar caminda G.E.T. mester a presenta hunto cu e homber J.M.Z. Riba peticion di abogado mr. D.Croes, a pospone e caso di G.E.T.
Gulido di bolita a muri: E acusacion di Fiscal contra G.E.T. ta cu riba 24 di December 2024, el a viola ley di droga y dia 26 di December 2024, el a causa morto di e homber defunto Terence D’Aguiar. Durante tratamento di e caso contra J.M.Z. ta sali na cla cu G.E.T. ta esun cu a pidi D’Aguiar bay busca bolitanan na Medellin, Colombia.
Hues a mustra cu e amiga di D’Aguiar a declara na Polis cu G.E.T. a papia cu D’Aguiar. J.M.Z. a bisa cu G.E.T. a pidi’e pa bay Colombia y controla D’Aguiar. Ta asina cu den pasado a sosode cu D’Aguiar a bay caba Medellin pero door di usamento di droga, el a perde riba caya y mester a manda hende bay busk’e y trece Aruba.
Segun J.M.Z., el a bin Aruba cu D’Aguiar pero no sa nada di gulimento di bolitanan. Dia 26 di December 2024, Polis a haya informacion cu un hende a muri cu bolitanan di cocaina den stoma. A resulta cu ta D’Aguiar a bira malo y a fayece. Investigacion a mustra cu 2 bolita di cocaina a kibra den su stoma.
J.M.Z. a declara na Polis cu G.E.T. a yam’e y bis’e cu D’Aguiar a fayece. Relaciona cu e lamentable incidente aki, Polis a bay na cas di G.E.T. y a deten’e y tambe J.M.Z. cu tabata eynan. Polis a kere cu J.M.Z. lo tabatin bolitanan guli y a hib’e hospital pa investigacion. A resulta cu e no tabatin bolitanan guli.
Complice condena na 2 aña di prison: Den e caso contra J.M.Z., Fiscal a mustra cu den pasado J.M.Z. a yega di haya castigo di prison caba pa asunto di droga. Fiscal ta haye culpabel di complice y a exigi 18 luna di prison. Na Juli 2025, Hues a dicta sentencia contra J.M.Z. Hues a bisa cu e ta haya e caso excepcional pasobra D’Aguiar a fayece cu bolitanan den su stoma. Hues a mustra cu 2 bolita a kibra den stoma di D’Aguiar, cu a causa su morto. Hues ta haya e forma aki di transporta droga, sumamente peligroso.
Hues ta haya cu J.M.Z. a haci e viahamento pa placa y no a responsabilisa su mes pa loke a sosode. Na opinion di Hues, e castigo exigi pa Fiscal ta mucho abao y a condena J.M.Z. na 2 aña di prison.
Diabierna awor lo scucha tratamento di e caso contra G.E.T. y DIARIO lo informa lectornan kico tur a sosode den sala di Corte di Husticia di Aruba.
