Jason Margarita condena na 2 aña y 6 luna di prison

Hues ta haye culpable di a tene relacion cu mucha di 15 aña

ORANJESTAD (AAN) – Diabierna mainta via video conference cu KIA, Hues a dicta sentencia den e caso penal cu Ministerio Publico a cuminsa contra Jason Margarita.

            Hues a haya legalmente proba cu Jason a haci actonan inmoral cu un mucha muher di 15 aña. Fiscal a exigi 42 luna di prison di cual 6 luna ta condicional.

Diabierna a scucha Hues condena Jason na 30 luna di prison di cual 6 luna ta condicional.

EXIGENCIA DI FISCAL

Algun siman pasa tratamento di e caso a tuma lugar caminda Fiscal ta haya cu Jason ta culpable y mester haya castigo. Fiscal a bisa cu ley ta mustra cu mester proteha menor di edad.

Den e caso aki e mucha ta bisa cu e tabata esun cu a busca relacion cu Jason. Sinembargo esey no ta kita afor e culpabilidad di Jason.

   Hecho ta cu Jason di 39 aña di edad a haci actonan inmoral cu un mucha y tambe a tene relacion sexual cu e mucha. Fiscal ta tuma Jason na malo pa loke el a haci.

Fiscal a exigi 42 luna di prison di cual 6 luna ta condicional cu un tempo di prueba di 2 aña. Fiscal a pidi tambe pa Jason cay bou guia di Reclassering.

SENTENCIA

   Hues a bisa cu e ta haya legalmente proba e acusacion cu Jason a haci actonan inmoral cu e mucha A. cu no tin 16 aña. A tene relacion sexual cun’e. Hues a bisa cu e ta kere e dama A. su declaracion. El a mustra cu Jason a admiti cu e tabatin un relacion cu A. y tabata sunchi.

   Pa cu e castigo, Hues a tene cuenta cu M. durante algun luna a haci actonan inmoral cu e mucha A. 15 aña. Hues no ta haya proba cu Jason activamente a abusa di e mucha. Hues a tene cuenta cu ta promer biaha cu M. ta cay sera y cu segun psicologo Jason no ta un pedofil. Psicologo ta recomenda pa Jason haya guia di Reclassering.

Hues a condena Jason na 30 luna di prison di cual  6 luna ta condicional cu 2 aña di prueba. Hues a pone condicion cu Jason mester sigui guia di Reclassering durante e 2 aña di prueba.