Exactamente 3.911 dia despues cu a tire mata - ORANJESTAD (AAN): Un poco mas cu cuatro luna pasa, esta Diamars 20 di Augustus, Ministerio Publico a manda un relato pa indica cu nan a habri e caso back di asesinato di Poentje Castro.
Ya ta diez aña pasa cu Aruba a keda geshock door di asesinato di periodista di television John Anthony ‘Poentje’ Castro. Nunca antes a detene un of mas sospechoso pa e asesinato aki.
Pero na luna di April, un team di Cuerpo Policial di Aruba, riba peticion di Ministerio Publico, a traha riba un revision (review) di e investigacion aki cu ta carga e nomber di “Apollo-zaak”.
E revision a hiba na puntonan di referencia concreto pa mas investigacion, a base di cual a keda dicidi pa start e investigacion di nobo.
A sali na cla, cu den e periodo di poco mas cu 4 luna aki, e team di investigadornan a traha cu dedicacion na activamente scucha testigonan cu por aporta na soluciona e caso.
DETENCION A CAY:
Ademas Cuerpo Policial di Aruba y Ministerio Publico ta convenci cu tin hende cu tin conocimento di e caso, pero cu te ainda no a papia nada. Un yamada urgente ta bay na personanan cu tin conocimento tocante e asesinato di Poentje Castro, of cu sa kende(nan) a comete e asesinato aki, pa meld nan mes. Nan tabata suplica pueblo pa duna informacion via tipline 111-41.
Dialuna mainta 6 di September 2021, Ministerio Publico a emiti un boletin pa splica cu detencion a cay den investigacion di asesinato di Poentje Castro.
E team investigativo a haci e prome detencion riba Dialuna, den investigacion di asesinato di Poentje Castro. Cu esaki e team ta considera di a detene un persona cu tabatin envolvimento den e asesinato.
A ser splica cu e investigacion ta sigui full speed. No ta exclui cu lo sigui mas detencion.
Poentje Castro di 47 aña di edad, a sali di su cas e anochi di Diaranson 22 di December 2010 pa cana den su cura y a bay na e entrada di su garage unda su auto ta staciona. Aki un persona riba motorcycle a tire mata. No ta conoci si el a tende boroto pafo y e mes a bay check, of si acaso un hende a yame pa sali pafo.
El a keda henter anochi y e madruga di Diahuebs 23 di December benta eybao, y te mainta el a wordo descubri. Alarma a ser bati y mesora a seya Apollostraat.
E tempo ey e sistema di BlackBerry tabata popular, y hasta e smartphone ey a wordo manda Hulanda pa investigacion forensico.
Dialuna ta exactamente 3.911 dia desde cu el a fayece. Y e noticia di detencion a core rond manera un vlam di candela, dunando pueblo speranza cu lo por tin un luz na final di tunnel.
POPULARIDAD:
Desde cu e tabata bishita Colegio Arubano, Poentje Castro tabata un persona hopi popular. E tempo ey e tabatin un VW Buggy custom made cu tabata hala atencion. E tabata dirigi un club di Buggy tambe.
Pa su conocemento relaciona cu e mundo di auto y desaroyo tecnologico di motornan en general, el a haya trabao di un persona cu tabata taxateur pa daño di vehiculonan envolvi den accident.
Nuebe aña largo Poentje Castro a carga e show di TV cu yama “Un Dia Den Bida”, cu tabata un showcase intimo di varios persona local cu di un angulo diferente tabata pone spotlight riba nan bida, nan trabao, y nan logronan.
Desde su asesinato, sigur como 1.001 hipotesis a ser presenta for di tur skina riba loke a socede. Teorianan di e.o. revancha, asunto di amor, debe atrasa, y djis rabia. E tempo ey no tabata existi asina hopi security camera na casnan manera ta e caso awor. Pero si e bisiñanan ta corda cu e brommer a sona duro y a yega na e cas.
Mientras tanto un detencion a cay, y hopi hende ta contento cu Aruba a haya un Procurador General nobo, esta mr. Boot ter Steege, cu a mira e importancia pa saca e cold-case aki for di cashi y bolbe dune un revision, y pa prome biaha den historia di e caso aki, un hende a keda deteni pa cu e caso di asesinato.
