ORANJESTAD (AAN): Dialuna den oranan di mainta, Hof di Corte Superior a manda via email nan decision riba e reclamo di Eugene Lampe contra e decision di Minister di Husticia cu e no ta haya libertad condicional na Augustus 2021 sino na November 2021.
Hof a declara e reclamo di Eugene no funda.
Siman pasa diahuebs den oranan di merdia, Hof di Corte Superior a trata e reclamo di Eugene Lampe. Eugene a worde hiba Corte y el a expresa su mes dilanti e tres Huesnan cu ta forma Hof.
MESTER TIN UN PLAN COMPLETO:
Eugene ta desapunta cu e no a haya su libertad condicional dia 5 Augustus 2021. Minister di Husticia, despues di a haya conseho di tanto Reclasering como psychiater, a dicidi cu ta bay haci un evaluacion y na November 2021 lo mira si e ta haya e libertad condicional.
Minister di Husticia kier pa tin un plan completo con ta bay atende cu Eugene ora e haya libertad condicional. PG a bisa Hof cu a acerca un psychiater di Curacao pa traha un plan di tratamento y cu Reclasering ta envolvi. El a bisa cu e luna aki e plan lo mester ta cla pa e comision di KIA evalua esaki.
Hof a puntra Lampe, kico e ta pensa di e decision aki. El a bisa cu e ta haya cu Gobierno ta mucho laat cu ta awor ta bay haci investigacion. E ta desapunta cu esaki. El a bisa cu e ta comportando su mes. E sa cu e tin problema mental pero e ta haya pildernan pa bebe y tambe e ta haya inyeccion cada pasa algun siman. Segun Eugene tur dia e ta bebe su pildernan y no ta haciendo problema.
ASESINA CASI HENTER FAMIA:
Eugene a asesina na forma cruel su mama, su tata y su ruman cruel den nan cas na Macuarima. E caso aki a shock henter Aruba. E unico miembro di famia cu ta na bida, ta e ruman homber. El a worde condena na 20 aña di prison y awor, despues di 13 aña sera den KIA, e kier haya su libertad condicional.
Hof a puntra Lampe, kico e ta pensa di e decision aki. El a bisa cu e ta haya cu Gobierno ta mucho laat cu ta awor ta bay haci investigacion. E ta desapunta cu esaki. El a bisa cu e ta comportando su mes. E sa cu e tin problema mental pero e ta haya pildernan pa bebe y tambe e ta haya injeccion cada pasa algun siman. Segun Eugene tur dia e ta bebe su pildernan y no ta haciendo problema.
MI NO TA UN PELIGER:
Eugene a bisa e tres Huesnan cu ta forma Hof, cu el a comporta su mes durante 13 aña den KIA. El a bisa cu e no ta un peliger. Segun Eugene, por ta hendenan ta preocupa pa cu su forma di haci pero nan no a mira con el a cambia. Eugene su intension ta pa bay biba na e cas na Macuarima.
Abogado mr. Lejuez a bisa Hof cu promer Minister di Husticia a pone 3 condicion pa Eugene Lampe lo por haya libertad condicional. E promer condicion ta tratamento.
Eugene a bisa cu pa añas e ta bou tratamento di un psychiater. E di dos ta cu e mester ta bou tratamento di diferente psychiater. E di tres ta cu mester tin palabracionnan concreto cu Reclassering. Tur esakinan Eugene a bay di acuerdo. E ta dispuesto pa keda den contacto cu Reclassering. Pa mas cu 6 aña (cu ta e periodo di libertad condicional) e lo mester keda mantene e condicionnan aki. E abogado a bisa Hof cu Eugene no ta di acuerdo cu e mester keda warda. E kier pa e bay liber awor y no te 3 November 2021.
EUGENE TA KEDA DEN KIA:
Dialuna den oranan di mainta Hof di Corte Superior a email e decision pa tanto Ministerio Publico como e abogado mr. Lejuez. Investigacion cu DIARIO a haci ta mustra cu Hof a declara e reclamo di Eugene contra e decision di Ministerio di Husticia, no funda.
Esey ta nifica cu Eugene ta keda sera den KIA pendiente di e plan di tratamento. Awor ta keda na e comision di KIA pa duna Minister di Husticia conseho y ta e minister tin e ultimo palabra.
