Interogacionnan den caso ‘Caret’ a finalisa

Landsrecherche ta trahando actualmente na compilacion di e dossier final

• ‘Regiezitting’ den e caso ta programa pa diabierna 7 di november 2025 

ORANJESTAD (AAN): Diabierna den e investigacion penal di e tiroteo di 9 di februari 2025 den cual A.C. Lanoy di 19 aña a fayece pa motibo di un tiro di polis, e dos agentenan policial envolvi a bolbe wordo scucha como sospechoso. Despues di e interogacionnan aki, e ultimo actividadnan di investigacion lo tuma lugar y e investigacion finalisa.

   Ministerio Publico a anuncia anteriormente cu ambos agente policial lo wordo persigui penalmente. Nan lo wordo acusa di complicidad di homicidio.  

  Landsrecherche ta trahando actualmente na compilacion di e dossier final. Asina cu esaki keda cla, e lo wordo entrega na Ministerio Publico.

  E asina yama ‘regiezitting’ den e caso ta programa pa diabierna 7 di november 2025. Durante e tratamento aki den Corte, e abogadonan di e sospechosonan lo haya oportunidad pa presenta nan deseonan di investigacion. Corte lo dicidi siguientemente cualnan lo keda admiti.

   Tanto e abogadonan di e sospechosonan como e abogado di e famia di e victima fayeci a ser poni na haltura diabierna tocante e avance den e caso.

   Pa motibo di e seriedad di e incidente den cual un hoben a fayece, e investigacion aki a wordo trata cu prioridad door di Landsrecherche. Na mesun momento e falta di recurso durante hopi aña door di falta di placa, ta causa cu otro investigacionnan andando a confronta tardanza.

   Recien ainda por a tende public ta puntra di con no a tende nada mas di e caso aki.  Por corda con e mainta di e caso aki, a tende cu Polis a persigui e auto debi cu e no tin luz cendi.  Pero DIARIO mes a publica screengrab di un Security Camera na Madiki Kavel, unda bo ta mira claramente e auto ta coriendo cu luz dilanti y luz patras cendi.

  Hopi a comenta cu un hoben autista den situacion asina ta hinca den su cabez cu su unico mision ta pa yega cas.  Varios mayor cu tin yiu autista a indica cu si acaso un dia nan yiu haya rijbewijs, y cu Polis para nan tras… nan tambe lo ta coriendo pa cueste loke cueste yega cas y ta ‘safe’.