Abogado di mayornan di victima Ayden Lanoy a critica den Corte
- Polisnan a actua manera cowboy
ORANJESTAD (AAN): Abogado di e mayornan di e victima Ayden Lanoy, mr. Hatzmann, a critica fuerte Fiscal di Ministerio Publico cu a exigi 12 luna di prison condicional pa e dos Polisnan. E abogado a pidi Hues pa condena e dos Polisnan pa a mata Ayden Lanoy den un forma cruel.
Dialuna di mainta te den oranan di merdia, den sala di Corte di Husticia a trata e lamentable caso di e dos Polisnan M.V. y R.R.G.D. cu a tira mata Ayden Lanoy.
Den e articulo aki, DIARIO ta concentra ariba e criticanan fuerte di mr. Hatzmann y den un otro articulo ta publica e defensa di abogadonan di e dos Polisnan, mr. Carlo y mr. Illes.
Polisnan a tira ayden pa e no scapa: Abogado mr. Hatzman a bisa Hues cu e exigencia di Fiscal ta un diferencia grandi compara cu loke e famia di e victima tabata spera.
E abogado a sigui bisa cu Fiscal ta cuestiona e forma di actua di e dos Polisnan mientras cu famia ta haya cu ta intencionalmente e Polisnan a actua asina. Na opinion di mr. Hatzmann, e Polisnan a actua manera cowboy door di a tira pa Ayden no scapa.
Famia a spanta di exigencia di Fiscal: E abogado a sigui bisa cu e famia a keda spanta di e exigencia di Fiscal. E famia a spera un castigo abao, pero no asina!
- Hatzmann a remarca e caso aki no ta na Hulanda sino na Aruba. El a cuestiona cu na Hulanda ta duna castigonan abao na Polis. E abogado a bisa cu na Aruba e pensamento ta completamente diferente compara cu Hulanda.
Mester condena brutalidad di polis: E abogado a accentua cu aki ta trata di brutalidad di Polis. Mr. Hatzman a bisa cu den bista di e mayornan, e persecusion tabata sin base y exagera. E Polisnan nan Ego tabata domina. E Polisnan a sali for di e patruya cu pistol cla pa tira. Nan no tabata kier pa e Toyota scapa. Nan no a tene cuenta cu lo por a herida hende.
Apesar cu e Toyota a kita pa pasa na banda di e patruya, M.V. y R.R.G.D. a tira 20 bala riba e auto. R.G.D. a keda tira te cu e no tabatin mas municion. E Toyota a keda core poco poco y bay dal contra un cura y Ayden a fayece.
Tin testigo a bisa cu el a mira e auto tabata bay patras y a scucha un tiro.
No por carga e polisnan den handschoen: E abogado a mustra cu un agente T. a bisa cu Polis mester ta hopi cauteloso pa tira riba auto. mr. Hatzmann a bisa Hues cu e exigencia di Fiscal a shock henter comunidad.
E abogado ta haya cu Hues no mester proteha e Polisnan sino haci husticia. E abogado a remarca cu si e Polisnan mester bay prison, nan ta bay prison y no carga nan den handschoen manera Fiscal ta haci.
E abogado a mustra con Hues na Inglatera a condena un agente di Polis cu a maltrata un hende cu despues a muri na 8 aña di prison. E abogado ta spera cu Hues lo haci husticia.
