Caso grandi den Corte na Aruba
- E mes a bisa di ta conciente cu comunidad no ta di acuerdo cu e castigo
ORANJESTAD (AAN): Dialuna mainta e famia di e victima Ayden G.J. Lanoy a haya un baño di awa frieu ora Fiscal a exigi apenas 12 luna di prison condicional pa e agentenan M.V. y R.G.D., pa a mata Ayden riba 9 Februari 2025. E famia a cuminsa murmura den sala y ora Hues a dicidi di tene un pausa, por a mira na nan cara y hasta expresion, cu nan ta hopi rabia. Un rato despues cu e exigencia a bira conoci den comunidad, por a nota cu comunidad a reacciona hopi rabia riba Ministerio Publico.
Ningun hende ta ariba di ley: Den Sala di Corte mescos cu Diabierna, varios miembro di famia tabata presente y bisti cu flanel preto cu potret di Ayden dilanti y patras ta skirbi: ‘Justice for my son Ayden C.J. Lanoy’. Den e sala ariba tabatin cantidad di agentenan di Polis cu a bay scucha e exigencia di Fiscal y e defensa di e abogadonan.
Por a nota cu den sala di Corte abao a aumenta e cantidad di miembronan di CEA. Tabatin 5 miembro di CEA pa garantiza orden y actua si por presenta situacion caminda mester actua.
Den e articulo aki, ta concentra riba e requisitorio di Fiscal y den un otro articulo ta publica e defensa di abogado di e dos agentenan di Polis.
Fiscal a bisa cu tin un procesverbaal cortico cu 4 potret cu ta forma parti di e requisitorio. Fiscal a cuminsa na bisa: “Ningun hende ta riba ley. En especial esnan cu ta traha cu ley”. E ta referi aki na e dos agentenan di Polis. Fiscal a bisa cu mester tin investigacion imparcial y cla riba un caso unda Polis a tira un persona mata. El a bisa cu ta esencial den un comunidad pa tin claridad. Fiscal a bisa cu e investigacion a wordo haci door di LandsRecherche cu ta cay bou Ministerio Publico y no tin nada di haci cu Polis.
Exigencianan halto pa uza arma: E morto di Ayden di 19 aña ta tristo. E sospechosonan, ta e dos agentenan di Polis. Awor mester evalua henter e caso. E pregunta ta si e dos agentenan Polis ta culpabel di e morto di Ayden. Fiscal a bisa cu tin exigencianan halto pa cu uzo di arma. E uzo di arma di Polis ta e situacion extremo. E dos Polisnan ta wordo acusa di complice di a mata. Fiscal ta haya nan culpabel di a mata. El a mustra cu tin reglamento con Polis mester actua. E pregunta ta si nan a actua corecto, si nan a actua den defensa propio. Si esey ta e caso, e ora ey nan mester wordo declara liber. Si nan no a actua corecto, e ora ey nan ta culpabel y castigabel.
E tiramento di Polis riba un hende, ta tacha e persona su integridad. Segun ley, Polis ta permiti di usa violencia ora cu no tin otro forma pa logra seguridad. Loke Polis mester tene cuenta ora di usa violencia, si tin otro forma pa acuta sin usa arma. Fiscal a bisa cu den 10 seconde a tira 20 biaha riba e auto Toyota cu Ayden Lanoy tabata maneha. Fiscal ta haya cu e ta un tempo hopi cortico pa evalua si a actua corecto. Fiscal a menciona cu tin articulonan di ley cu ta mustra con y ki ora ta usa arma di candela. Den situacionnan masha limita of extremo, Polis por haci uzo di su arma reglamentario. Solamente ora tin sospechoso cu e persona tin arma of cuchiu of si e persona a yega di wordo condena pa casonan hopi serio.
Agente D. a tira Ayden mata: Fiscal a bisa cu e agentenan a persigui e auto pasobra tin un luz patras cu no ta cende. Despues e situacion na Madiki Kavel caminda a yega un caminda sin salida. E agentenan a tira 20 biaha riba e auto y un persona a muri. Ayden a muri door di un tiro cu a drenta y sali for di su curpa. Posiblemente e bala a perfora un ader mayor y tur dos pulmon. Por a nota cu e mama di Ayden tabata yora ora cu Fiscal tabata papia. Hues a para e tratamento un rato y puntra si e señora ta sinti bon. Sino e por sali un rato for di sala. E mama a bisa cu e ta ok. Hues a ora ey a sigui cu e caso caminda Fiscal a bisa cu door di hopi sangramento interno, Ayden a fayece.
E mama y tata di Ayden a bay identifica Ayden. Na e lugar di e incidente, Polis a haya 20 huls y un peña bashi. Den e arma di M.V., tabata falta 3 bala y e arma di di R.G.D. tabata falta full un peña. Tur 17 bala a wordo tira y a saca e peña y a hinca un otro peña y ‘arma’ e pistol cla pa tira. E impactonan di bala mas tanto tabata na banda robez y parti patras di e auto. Fiscal a bisa cu di e 20 balanan, 17 bala a dal den e auto. A haya e bala cu a mata Ayden y Instituto Forense di Hulanda (NFI) a investiga e bala aki y investigacion a mustra cu ta R.G.D. a tira e bala ey. A conclui cu Tiro #5 di e 17 tironan total, tabata esun mortal.
Polis a tuma riesgo di tira: Fiscal a bisa cu for di e investigacionnan por conclui cu no intencional e agentenan kier a mata Ayden sino cu nan a tira pa para e auto. Fiscal a bisa cu M.V. y R.G.D. a tuma e rieso cu por a mata y mirando cu nan tabata para hopi cerca di e auto y a impactonan di bala por a causa e morto. Nan tabata sa di e riesgo cu esun den auto lo por muri. Fiscal a sigui bisa cu Polis a wordo entrena cu mester evita tira riba autonan cu ta core pasobra e lo no haci cu e auto ta para. E chens ta grandi cu hende por muri. Fiscal ta haya cu e agentenan a tuma e riesgo aki.
Complice di a mata Ayden: Tur dos tabata hunto den e patruya y nan ta entrena pa actua hunto den patruya. Durante e persecusion a actua. Agente M.V. tabata na stuurwiel di e patruya, y R.G.D. tabata traha cu e luz y microphone. R.G.D. a bisa M.V. pa blokia e auto den Madiki Kavel pa e no core bay. M.V. a tira y R.G.D. a tira. R.G.D. a bisa cu el a tira pa defende su colega M.V. Ambos a baha cu arma den man cla pa tira riba e auto. M.V. a cuminsa tira riba e auto 3 biaha y R.G.D. a sigui cu 17 tiro. Polis ta entrena pa actua hunto sin cu a palabra.
Fiscal ta haya cu nan ta complice di a mata. Na opinion di Fiscal, no ta revelante kende a tira mata. Ta R.G.D. a tira mata Ayden.
No a cumpli cu reglanan di ley: Fiscal a sigui cu a base di un violacion di trafico, M.V. y R.G.D. a bay over na uza arma. E violacionnan di trafico aki NO ta hechonan hopi serio pa hustifica uzo di arma di candela. E pregunta ta cu si e forma con Ayden a core bay por wordo cualifica di pone bida di e agentenan na peliger? Fiscal no ta haya esey. Fiscal a bisa cu Ayden tabata core no duro. E pregunta ta si M.V. por a hala un banda. Ayden no tabatin intencion di bay riba M.V., sino pasa banda di M.V. y scapa. Fiscal ta haya cu no tabatin hechonan severo di peliger pa usa arma. El a conclui cu e agentenan no a actua segun reglamentonan stipula den ley.
No tin defensa propio: E hecho cu no a actua segun reglamentonan stipula den ley, mester wak si nan lo a actua den defensa propio. Fiscal ta haya cu e agentenan por a keda para y warda refuerzo. No tabatin motibo di peliger contra nan bida. Nan a baha for di patruya cu arma den man. Ayden no a bay cu e auto Toyota riba M.V. sino tabata kier a pasa banda di dje pa scapa.
Fiscal no ta haya cu tabatin menaza di peliger di morto pa M.V. y como tal no por bisa cu el a actua den defensa propio. Fiscal tampoco ta haya cu R.G.D. a actua den defensa propio. R.G.D. a bisa cu el a reacciona pa defende su colega M.V. Fiscal ta haya cu M.V. a kere cu su bida tabata na peliger cual no ta asina. Fiscal ta haya cu e agentenanan a bay mucho liher den tira riba e auto.
Cuestiona raport di abogadonan: Fiscal a cuestiona e raport di abogadonan tocante e imagennan di tiramento caminda a usa un otro experto. Fiscal ta haya cu no tin splicacion suficiente pa mustra con a haci investigacion. E no ta haya cu por usa e raport.
Pa cu e demanda di daño cu ta 166.507,89 Florin, Fiscal a aproba un parti y ta haya cu mester declara un parti no admisibel.
Exigencia di Fiscal: Fiscal a bisa cu e agentenan nan bida a keda afecta. Door di nan culpa Ayden nunca a cumpli 20 aña. E incidente a afecta henter comunidad. E agentenan a wordo ataca door di media pa loke nan a haci. Fiscal ta haya cu esaki no ta husto. El a bisa cu e ta un proceso hopi dificil pa evalua. Nos no ta den zapato di e agentenan. Nan a tuma un decision no-corecto.
Fiscal a bisa cu e no ta exigi un castigo di prison sino condicional. El a bisa cu esaki lo no ta na agrado di comunidad. Comunidad ta spera hopi di Polis. Polis mester wordo entrena con pa usa arma y actua den situacionnan dificil. Fiscal ta haya cu ambos agente lo mester haya e mesun castigo cu trabao pa comunidad. Fiscal a exigi 12 luna di prison condicional cu 2 aña di prueba y 180 ora di trabao comunitario.
(Prison condicional nifica cu nan lo no bay encarcela).
