Hues cu preguntanan critico na e dos agentenan di Polis

Caso grandi atendi den Corte

• Pakico a tira 20 biaha riba e auto y mata Ayden Lanoy
• Siendo cu nan por a djis keda den e patruya di Polis 

ORANJESTAD (AAN): Diabierna henter mainta den sala di Corte di Husticia, a trata e caso penal cu Ministerio Publico a cuminsa contra e dos agentenan di Polis M.V. di 38 aña y R.G.D. di 29 aña. A uza 2 sala pa asina tur hende por a presencia tratamento di e caso. Den e sala caminda e caso a wordo trata, e famianan di e victima Ayden C.J. Lanoy (kende tabatin 19 aña), den e di dos piso tabata mas bien agentenan di Polis y por a mira tambe Comisario di Polis presente. Den un otro sala di Corte, via video, hendenan por a sigui e caso.

   Diabierna mainta Hues a trata tur loke a sosode riba e Diadomingo scur ey di 9 Februari 2025, caminda lamentablemente Ayden C.J. Lanoy a wordo tira mata. A keda palabra cu Dialuna 23 di Februari 2026 lo sigui cu tratamento di e caso, caminda Fiscal lo bay bisa kico e ta pensa di e caso. Despues ta e abogado di e famia mr. Hatzmann lo presenta e demanda di daño y despues ta abogadonan mr. Illes y mr. Carlos lo defende e dos agentenan.

   Por a mira den sala di Corte, varios miembro di famia di e victima, cu flanel preto bisti y dilanti di e flanel tin potret di Ayden y den lomba ta skirbi: “Justice for my son Ayden C.J. Lanoy”.

   Persecusion a caba den tiramento di Ayden: E acusacion cu Fiscal a presenta contra agentenan M.V. y R.G.D. ta cu nan ta complice di a mata Ayden C. J. Lanoy riba 9 Februari 2025 door di intencionalmente a tira varios biaha cu nan arma di Polis riba e auto den cual Ayden tabata. Subsidiario, Fiscal ta acusa nan di complice di intento di mata y mas subsidiario complice di intento herida severo.

   Hues a bay hopi profundo den e caso y a haci preguntanan critico pa e agentenan M.V. y R.G.D. Hues a mustra cu riba e anochi di 8 pa 9 Februari 2025 e incidente a sosode. E anochi ey tabatin problema na Kalibra, asalto na San Nicolas y problema na hospital. Central di Polis a manda e patruya di M.V. y R.G.D. na Lekker Bar & Restaurant na Noord pa mira si tur cos tabata bayendo bon. Na rotonde Palm Beach M.V. y R.G.D. a mira e Toyota cu Lanoy tabata core sin luz di patras.

   E agente M.V. tabata na stuur di e patruya y a dicidi di core su tras. Despues di rotonde Super Food e auto a bira na man drechi pero diripiente a bira man robez bay direccion Bubali. E patruya tabatin luznan sendi y sirena y tabata papia via microphone pa para e auto. R.G.D. a bisa Hues cu el a mira tambe e auto y a bisa via microphone pa para na banda.

   El a kere cu e chauffeur lo tabata bou influencia. Hues a bisa cu investigacion ta mustra cu ta un luz patras so no tabata traha. Hues a bisa cu e sistema di usa luz y alarma por duna e impresion na e chofer cu e mester hala un banda pa laga Polis pasa.

   No tabata core duro: Tabatin un persecusion y M.V. a bisa cu mester a subi velocidad. R.G.D. a bisa cu for di un rotonde pa e otro Lanoy a subi velocidad. Hues a bisa cu investigacion ta mustra cu e auto no tabata core mas cu 80 km/h, o sea no tabata core cu velocidad halto.

   Pakico a saca arma: E persecusion a sigui te Madiki Kavel. Tabata 5:10’or di mainta y Central di Polis a bisa e patruya cu si e seguridad ta den peliger pa stop e persecusion. Hues a puntra M.V. y R.G.D., pakico nan a persigui e auto. M.V. a bisa cu e hecho cu e chofer no kier a stop y e forma di core, el a pensa cu ta sospechoso.

   Hues a bisa cu tras di cas 136 den Madiki Kavel a yega na un caminda sin salida. M.V. a bisa cu a blokia e caminda y el a mira un homber ta move den e auto. El a baha for di patruya y a mira cu e auto tabata algun meter su dilanti y tabata bay den su direccion. El a tuma posecion di tira. E momento ey por a scucha cu M.V. a bira emocional. Hues a sigui cu R.G.D. kende a bisa cu el a baha hunto cu M.V. y e tambe a saca arma. El a bisa cu e auto a hala atras y a subi velocidad y bay riba M.V. Hues a puntra pakico a saca arma.

   Pakico no a keda den patruya: El a remarca cu por a hala un banda y nan bida no tabata na peliger. Segun R.G.D., e momento ey e tabata considera e auto como un arma. Hues a remarca cu no por tabatin otro alternativa pa actua? Pakico no a bolbe subi patruya y sigui persigui e auto. Segun R.G.D. el a mira M.V. y e ta haya cu no tabatin oportunidad pa esey. Pesey el a saca su arma. Hues a remarca cu tin reglanan stipula ki ora Polis por saca arma y mester ta cauteloso ora ta tira riba un auto. Hues a puntra cu mirando bek riba e caso, lo no tabata mas mihor pa a warda den patruya y mira kico e chofer ta haci?

   M.V. a bisa cu ora el a mira cu e auto no por a core bay, el a pensa cu e chauffeur lo baha y core bay na pia. Pesey el a baha for di patruya. E no sa ki momento exacto el a saca arma. Segun M.V. ora el a mira e auto a cuminsa move, el a sinti esey un menaza y a saca arma.

   Hues a remarca cu M.V. tabata envolvi den otro caso di tiramento y e sa cu e no mester saca arma sin mas. Segun M.V., tur cos a pasa asina liher y e no a pensa. R.G.D. tambe a bisa cu tur cos a pasa asina liher y e no a pensa. R.G.D. a bisa Hues cu el a mira e auto ta bay den direccion di M.V.

   A los 20 tiro riba e auto: Hues a mustra cu M.V. a tira 3 biaha y R.G.D. a tira 17 biaha riba e auto. Hues a puntra M.V. riba kico el a tira y kico tabata su intension. El a bisa cu el a tira riba e capa di motor pasobra e ta considera esaki un menaza contra su bida. Hues a puntra con M.V. ta mira cu M.V. a declara na Landsrechercher cu si e tira riba e capa di motor, e lo elimina e peliger. Hues a puntr’e si su intension tabata pa elimina Lanoy. M.W. a bisa cu no. Hues a remarca cu si mira bon, tira asina lo no para e auto. Hues a bisa cu Polis tambe ta hende y den casonan di tension, ta di spera cu como Polis lo mester reacciona mas trankil y no ta bay den panico.

   Hues a puntra R.G.D., pakico el a tira 17 biaha. Den su contesta, Agente R.G.D. a bisa cu el a mira e auto ta bay cu velocidad y a scucha un tiro. Hues a bisa cu ta M.V. a tira. Segun R.G.D. e no tabata sa cu M.V. a saca un arma. Segun R.G.D. den banda di su wowo el a mira M.V. y no a paga tino si M.V. a saca arma.

   Segun R.G.D., el a kere cu ta for di e auto a tira. Hues a bisa cu R.G.D. a declara na LandsRecherche cu el a haya un black out y ta te ora e balanan a caba, el a stop di tira.

   Dialuna awor, 23 Febuari 2026 lo sigui cu tratamento di e caso.