A bolbe nenga peticion pa e sospechoso haya libertad
ORANJESTAD (AAN): Diahuebs mainta e sospechoso femenino Chania Chante Fernandes Pedra di 24 aña a presenta den Corte sin abogado. Fernandes Pedra a manda via mail, un cantidad di documento pa Hues. Hues despues di a scucha reaccion di Fiscal riba e diferente peticionnan, a dicidi cu ta busca abogado di Corsou pa defende Fernandes Pedra ya cu ningun abogado na Aruba ta disponible. Hues a bolbe rechaza e peticion di Fernandes Pedra pa e bay liber.
Den sala di Corte abao tabata presente famia di victima mientras cu ariba tabata famia di Fernandes Pedra. Hues a bisa cu e kier sa e posecion huridico pa Fernandes Perna, raport Psicologico, raport di computer di e Jeep SUV. Tambe tin mas documentonan cu a bin acerca.
Fiscal a presenta e acusacionnan contra Fernandes Pedra cu ta: cu dia 4 Januari 2025, a dal mata e victima Josely Paulina Vasquez Gonzalez di 65 aña y Carlos David Vialez Valerio di 54 aña y sigui core bay. Fiscal a sigui bisa cu Fernandes Pedra ta wordo acusa di tabata core e Jeep SUV sin rijbewijs, core bao influencia, core cu velocidad halto y den un situacion emocional.
Fiscal tambe a bisa cu Fernandes Pedra ta wordo acusa di intento di mata di señora Williams y e homber Fernandes Rivas.
No tin abogado: Hues a puntra Fernandes Pedra con a para cu abogado. Fernandes Pedra a bisa Hues cu un carta a wordo manda Corte via mail cu ta splica tur cos. Hues a puntra ken a traha e carta. Segun Fernandes Pedra, Moszkowicz a yud’e.
Hues a bisa cu tin raport di investigacion di Polis, tin raport di experto di Hulanda cu a analisa e computer di e Jeep SUV, tin carta di abogado di e victimanan cu nan ta siguiendo tratamento. Tambe tin demanda di daño.
Abogado di Corsou: Hues a bisa cu tambe tin email di Fiscal cu ta bisa cu a purba haya asistencia di abogado di Aruba. For di Orden di Abogado por a compronde cu no tin abogado cu lo kier ta dispuesto pero tin dos abogado for di Corsou. Fiscal a bisa cu Departamento di Asuntonan Social a informa cu no tin informacion pa gastonan di estadia di e abogadonan di Corsou. Fiscal ta haya cu Hues lo mester tuma un decision riba esaki. Hues a mustra cu segun ley, e gastonan di honorario di abogado, estadia lo mester wordo cubri door di Gobierno di Aruba.
Rapport di Psicologo no ta cla: Hues a bisa cu el a haya un mail di psicologo Boekhoudt kende ta splica cu lo bay tuma mas tempo promer cu e raport ta cla. Esaki door di e estado emocional di Fernandes Pedra. E psicologo ta calcula cu e mester 3 siman mas.
Hues a haya un cantidad di documento cu a wordo firma door di Fernandes Pedra tocante e situacion di abogado. Hues a bisa cu e por compronde cu Fernandes Pedra no tin abogado. Fernandes Pedra no kier a lesa e documentonan door di su situacion emocional. Hues a remarca cu ta trata di diferente documento. El a pospone e caso un rato pa e bay lesa e documentonan y despues presenta un resumen den sala di Corte.
Hues a bolbe y a bisa cu el a lesa e documentonan. El a bisa cu tin peticionnan cu e lo mester presenta y scucha reaccion di Fiscal.
Peticionnan di sospechoso: Hues a mustra cu e sospechoso ta reclama e forma con el a wordo deteni pa 11 dia na warda di Polis. (*) E documentonan traha pa Moszkowicz ta mustra cu e investigacion tecnico riba e Jeep SUV no a keda cla. (*) Mester investiga e comportacion di e peatonnan. Si nan tabata bou influencia di alcohol. (*) Investiga e daño na e Jeep. Puntra si por usa e investigacion di Hulanda como prueba. (*) Pidi un reconstruccion di e accidente y verificacion di e sucedido. (*) Ta uza argumento cu e no por a mira e peatonnan. (*) Con por ta sigur si ta e computer di e auto a wordo manda Hulanda y si nada no a wordo haci na e auto. Si tin cameranan cu a filma. (*) Peticion pa scucha testigonan. (*) Reclama cu nan a nenga di dun’e tratamento medico tempo e tabata sera na warda di Polis. (*) Resistencia contra asistencia di un abogado. (*) Peticion atrobe pa lag’e liber cu condicionnan stipula promer cu e investigacionnan ta completamente cla y cu e tin abogado.
Hues a bisa cu 10 April 2026 a puntra abogado di e tempo ey, si tin peticion. E abogado a pidi pa scucha señora Williams y Fernandes Rivas. Nada a keda dicidi y awor ta bolbe haci peticion.
Fiscal ta contra pa sospechoso bay liber: Fiscal a bisa cu e ta mantene su punto di bista pa cu interoga e testigonan, esta cu no ta necesario pa scucha e testigonan. Pa loke ta trata imagennan di camera di siguridad, Fiscal a mustra cu tur imagen a wordo manda. E asunto di investigacion riba computer di e auto y reconstruccion di e accidente, Fiscal ta puntra su mes kico lo bin acerca cu tin caba. Fiscal ta haya cu ta mas importante pa Fernandes Pedra tin abogado y e caso wordo trata pa e victimanan.
Fiscal a bisa cu e no ta haya cu por laga Fernandes Pedra liber. El a mustra cu investigacion for di Hulanda ta mustra e comportacion di stuur sumamente peligroso cu a causa morto di dos hende. El a mustra cu pa e delito cu Fernandes Pedra a haci, tin un castigo di 8 aña di prizon. Fiscal ta haya cu comunidad lo no gusta cu Fernandes Pedra lo wordo laga liber. El a remarca cu no tin situacionnan personal cu a wordo presenta cu ta mustra cu mester cambia di opinion.
Abogado di Corsou pa sospechoso: Hues a pospone e caso un rato y a bolbe cu su decisionnan. Hues a bisa cu ta importante cu Fernandes Pedra ta haya un abogado. Hues a dicidi cu Fernandes Pedra lo haya dos abogado for di Corsou y lo mester scoge cual e kier.
Pa loke ta e gastonan pa cu abogado su estadia, Hues a mustra cu ley ta bon cla cu e gastonan necesario mester wordo cubri pa Gobierno. Den e caso specifico aki, cu no tin abogado di Aruba disponibel, e cubrimento di gasto lo no ta problema. Hues a mustra riba art. 69 di Landsverordering Straf.
No reconstruccion di accidente: Hues ta haya cu tur e imagennan di security-camera di e accidente ta den e documentonan di e caso. Tin un raport di e computer di e Jeep SUV ta bin for di Hulanda. Hues ta haya cu no tin suficiente motivacion pa cu e reconstruccion di e accidente y investigacionnan. Hues ta haya cu ta lubida di mira e hecho cu e forma con Fernandes Pedra a core asina duro, a core riesgo cu por sosode un accidente fatal. Hues a rechaza e peticion.
Pa loke ta peticion pa scucha e testigonan, Hues a mustra cu Psicologo ta mustra cu e testigonan lo core peliger si nan mester bolbe wordo scucha como testigo. Haya cu tin tur imagen di video cu ta mustra tur cos. Hues ta haya cu ta suficiente pa scucha testigonan na Hues Comisario.
Hues ta haya cu tin motibonan di peso teniendo na cuenta cu e raportnan nobo cu tin awor. Teniendo cuenta cu pa e delito tin castigo di 8 aña di prizon y a shock comunidad, no por laga Fernandes Pedra liber awor. Dia 2 October pa 9’or di mainta lo trata e caso.
Lo pasa video di accidente den Corte: Hues a bisa cu e idea ta pa dia 2 October 2026 lo pasa video di loke a pasa y si victimanan ta haya ta pisa, lo por sali pafor di sala di Corte un rato.
