Hues kier sa si e sospechoso tin abogado
ORANJESTAD (AAN): Awe mainta 11’or e muhe Chania Chante Fernandes Pedra di 24 aña, mester presenta den Corte pa sigui cu e caso cu a keda posponi dia 3 Juli 2026.
Dia 3 di Juli 2026, Hues a palabra cu e sospechoso cu awe 20 Augustus 2026 lo tin un caso pro forma caminda Hues kier sa si Fernandes Pedra tin abogado.
A rechaza abogado di Hulanda: Ta asina cu dia 3 di Juli 2026, e abogado Hulandes, Moskowicz a presenta den Corte y tabata sinta serca di Fernandes Pedra. Fiscal a reclama na Hues cu Moskowicz no ta e abogado di Fernandes Pedra y no por tin toga bisti. Hues a bisa Moskowicz cu e no por tin toga bisti pasobra e no ta abogado di Fernandes Pedra.
Hues a mustra cu Hof a tuma decision cu Moskowicz no por defende e acusado Fernandes Pedra y esey ta punto final. E problema cu tin ta cu Moskowicz no ta registra como abogado na Aruba. Hues a puntra Fiscal si a check cu Orden di Abogado di Aruba, si lo por tin abogado cu kier defende Fernandes Pedra. Fiscal a bisa Hues cu a acerca Orden di Abogado y no a haya reaccion.
Dal pareha mata cu SUV y core bay: Dia 3 di Juli 2026, Fiscal a presenta 5 acusacion contra Fernandes Pedra relaciona cu e lamentable accidente di 4 Januari 2026, caminda Fernandes Pedra a dal cu e Jeep SUV cu e tabata maneha, e victima Josely Paulina Vasquez Gonzalez di 65 aña y Carlos David Vialez Valerio di 54 aña mata y sigui core bay.
Sospechoso a pidi hues reconsidera: E sospechoso Fernandes Pedra a lesa un carta pa Hues. E tabata hopi emociona. El a bisa cu actual e no tin abogado. El a bisa cu e tin pleno confianza den Moszkowicz.
Hues a puntra Fernandes Pedra pakico e abogadonan mr. Illes y mr. Emerencia a retira. Fernandes Pedra a bisa cu e no por bisa. El a sigui bisa cu e ta haya cu awor cu e no tin abogado, e ta confia den Moszkowicz. El a pid Hues pa reconsidera Miszkowicz. Tambe el a pidi pa lag’e den libertad pa asina e por prepara pa e caso.
Sospechoso ta encarcela: Fiscal a bisa cu e no por tuma decision riba e peticion pa laga Moszkowicz ta abogado. Fiscal ta haya cu lo mester mira con e sospechoso lo por haya un abogado. El a bisa cu loke si e por tuma decision ta riba e peticion di Fernandes Pedra pa lag’e liber.
Fiscal ta reacciona cu no por laga Fernandes Pedra liber. Na opinion di Fiscal, e sopechoso a core hopi duro riba Boulevard caminda tin hotel y casino estableci. Fiscal ta haya cu ainda tin acusacionnan serio contra Fernandes Pedra caminda tin castigo di 8 aña di prizon.
Fiscal a remarca cu e famia di Fernandes Pedra a bay media y Ministerio Publico mester a reacciona pa aclarea e expresionnan. Na opinion di Fiscal, ta obvio cu comunidad lo keda den shock si laga Fernandes Pedra liber. Fiscal ta haya cu tin motibo di peso y no tin chens cu Fernandes Pedra por bay liber.
Hues a dicidi e dia ey cu e ta pospone e caso pa 20 Augustus 2026, caminda lo bay evalua con leu ta y cu tratamento di e caso lo ta 2 October 2026.
Sospechoso mester busca un Abogado: Hues a enfatisa cu ta importante cu pa dia 20 Augustus., Fernandes Pedra tin un abogado. Hues a bisa cu si Hof bolbe nenga e peticion di Fernandes Pedra pa e wordo asisti door di Miszkowicz, Fernandes Pedra mester busca un otro abogado, of di Aruba of den exterior pero cu ta registra na Aruba. Hues a sigui bisa cu 20 Augustus 2026 lo por tin resultado riba investigacion di e engine computer di e Jeep SUV cu Fernandes Pedra tabata core. Tambe lo por spera cu psycologo a keda cla cu e raport riba Fernandes Pedra.
Awe ta e dia importante pa haya sa si Fernandes Pedra ta haya Moszkowicz como su abogado of no. Si no ta asina, kende lo ta e abogado oficial di Fernandes Pedra.
