Dos a wordo declara liber, mientras cu e otronan a wordo condena
*3 aña e no por postula como politico y tampoco traha den Gobierno
ORANJESTAD (AAN): Diaranson merdia 1.30, Hues a dicta sentencia den e caso Flamingo caminda e sospechosonan ta: Otmar Oduber, Jeandrick Oduber, Eisia Esser, Richinella Wever, Laurence Phillips.
CASTIGO EXIGI
Aña pasa November 2024 tratamento di e caso a tuma lugar caminda Fiscal ta haya cu den e caso aki por mira con corupcion ta tuma lugar. Esaki ta alarmante. Esser y Otmar a hiba politica pa yuda otronan cu a yuda den campaña. Na opinion di Fiscal, esaki no ta politica sino corupcion. Fiscal ta haya cu mester manda un señal bon cla den comunidad cu no ta permiti abuso di funcion. E exigencianan di Fiscal ta:
Jeandrick culpabel di malversacion door di tuma Tiel den servicio y lag’e traha. Fiscal a exigi un boet di 25 mil florin of 1 aña di prison. Tambe Fiscal a exigi 180 ora di trabao of 90 dia sera.
Phillips a gana 100 mil florin di Gobierno door di no traha. Fiscal a exigi 6 luna di prison
Wever culpabel di a abusa di su funcion y falsifica cartanan. Fiscal a exigi 240 ora di trabao of 120 dia sera. Tambe Fiscal a exigi 6 luna di prison condicional cu 3 aña di prueba.
Esser tabata e persona di confianza di Otmar. Fiscal a exigi 18 luna di prison
Otmar Oduber tabata e minister cu a abusa di su poder. Fiscal a exigi 3 aña di prison y 6 aña no por actua como politico y no por traha den Gobierno.
JEANDRICK DECLARA LIBER
Jeandrick: Hues a bisa cu Corte ta rechaza demanda di abogado pa declara Ministerio Publico no admisibel. Hues a bisa cu e no ta haya cu tin un asina yama “fishing expedition” manera abogado a bisa. Pa loke ta e acusacion di empleado fantasma, Hues a mustra cu Jeandrick a tuma Tiel den servicio. Otmar a tuma Tiel den servicio pero Tiel tabata traha pa Jeandrick. Hues a mustra cu Tiel a malversa 84 mil florin di Gobierno. Hues a bisa cu e no ta haya cu Jeandrick ta envolvi den malversacion. Ta un hecho cu Tiel a traha pa Jeandrick pero na 2020 no promer. Hues no ta haya proba cu Jeandrick ta culpable di malversacion. Hues a declara Jeandrick liber.
ESSER DECLARA LIBER
Esser: Hues a bisa cu e demanda di abogado pa declara Ministerio Publico no admisible, ta wordo rechaza. Hues a bisa cu ta un hecho cu Esser tabata un empleado di Gobierno. E pregunta ta si Esser a wordo cumpra, door di tuma regalo. Hues ta haya cu mester prueba cu Esser lo a haya cos pa haci cosnan contra su deber. El a mustra cu no tabatin transaccion financiero. Hues a bisa cu e no ta haya proba cu Esser a wordo cumpra. Hues a sigui bisa cu e no ta haya cu Esser a abusa di su funcion pa duna hende trabao. El a mustra cu Vito Croes a duna Esser placa.
E pregunta ta si esaki ta un regalo. Hues ta haya esaki ta e caso. E pregunta ta sigui, kico ta e relacion entre Esser y Vito Croes. Nan conoce otro pa hopi tempo y Vito Croes ta yuda Esser pa paga school di yiu. Hues ta haya esaki acceptable. Na opinion di Hues, loke Vito Croes a haci no ta wordo considera como regalo. Hues a conclui cu no tin prueba y a declara Esser liber di a wordo cumpra. Tambe Hues a declara Esser liber di a abusa di su funcion.
PHILLIPS CONDENA PA MALVERSACION DI GOBIERNO
Phillips: Ta asina cu Phillips no a presenta den Corte. Hues a bisa cu e demanda di declara Ministerio Publico no admisible ta wordo rechaza. Hues ta haya Phillips culpable di e acusacion empleado fantasma y malversacion di Gobierno. Hues a mustra cu Phillips ta un nombracion politico door di Otmar. Hues ta haya cu Otmar a malversa Gobierno door di duna Phillips trabao. El a mustra cu pa un periodo largo Phillips tabata complice di malversacion di Gobierno. El a señala cu Phillips no tabatin descripcion di trabao. A pag’e 131 mil florin, cual Hues ta haya cu ta di mas. Hues a tuma Phillips na malo cu Phillips a sigui traha, siendo cu e sa cu e no merece e salario. Hues a condena Phillips na 120 ora di trabao, 3 luna di prison condicional cu 3 aña di prueba.
TIEL CONDENA PA MALVERSACION DI GOBIERNO
Tiel: No a presenta y no tin representante. Tiel a wordo declara liber di a cumpra Otmar. Hues ta haya Tiel culpabel di a malversa Gobierno door di traha fantasma. Hues a condena Tiel na 120 ora di trabao, 3 luna di prison condicional cu 3 aña di prueba.
WEVER CONDENA PA MALVERSA GOBIERNO HUNTO CU OTMAR
Wever: Hues a rechaza e demanda di abogado, pa declara Ministerio Publico no admisibel. Pa loke ta e acusacionnan, Hues a mustra cu na 2018, Otmar a bin cu maneho nobo pa cu dunamento di tereno. Wever tabata e team coordinador, encarga cu dunamento di tereno. Hues a mustra cu e caso Malmok, Wever a actua contra e maneho pa duna tereno. A traha cartanan cu no ta cuadra cu e berdad y laga director di DIP firma esakinan. Hues a remarca cu e hecho cu Wever a actua bou orden di Otmar, no ta hacie menos castigabel. Hues ta haya cu esaki a keda den intento di malversacion pasobra e dunamento di tereno no a keda realiza. Hues ta haya cu Wever, a mal usa su funcion, a falsifica cartanan y hunto cu Otmar a malversa Gobierno. Hues a sigui bisa cu Wever a abusa di e confianza cu Gobierno mester tin den dje. Hues a condena Wever na 180 ora di trabao, 5 luna di prison condicional cu 3 aña di prueba.
OTMAR CONDENA PA MALVERSACION Y ABUSA DI SU FUNCION
Otmar: Hues a rechaza e demanda di abogado pa declara Ministerio Publico no admisibel. Hues a bisa cu e no ta haya cu tabatin acusacion falso di Marisol Tromp, manera abogado a bisa. El a mustra cu comision di protesta a motiva suficiente pakico a rechaza e keho di Otmar. Hues a bisa cu e no ta haya cu Ministerio Publico a actua contra e principionan di un caso husto manera abogado a bisa.
Hues ta haya proba e malversacion den caso Malmok y tambe cu Otmar a haci mal uso di su funcion. Hues a mustra cu Otmar na 2018 a bin cu maneho nobo pa cu entrega di tereno. Hues ta haya cu e personanan C. y F. no mester bin na recomendacion pa tereno na Malmok. El a mustra cu Wever a actua contra e maneho di duna tereno, riba orden di Otmar. Hues a mustra cu Otmar ta amigo di e homber M. cu ta pareha di e dama C. E homber M. a pidi Otmar regla tereno. Ariba instruccion di Otmar, Wever a traha e cartanan falso. Hues ta haya cu Otmar como minister a faborece su amigonan pa haya tereno.
E asunto di empleadonan fantasma, Hues ta haya Otmar a duna Tiel, Phillips, Geerman trabao. Hues ta haya cu Otmar hunto cu Tiel y Phillips a malversa Gobierno. Pa loke ta Geerman, Hues no ta haya malversacion. E ta haya cu Geerman a haci e trabaonan cu el a palabra cu Otmar. Hues a declara Otmar liber pa un parti di malversacion y tambe a declara Otmar liber pa e acusacion di a wordo cumpra. Hues a bisa cu e no ta haya proba cu Tiel a cumpra Otmar of duna Otmar regalo. Tampoco Hues ta haya cu Otmar a abusa di su funcion den e caso aki.
Pa loke ta e relacion cu Esser, Hues ta haya cu Otmar a pone Esser na un posicion estrategico pa yuda Otmar. Hues ta haya cu Otmar cu ayudo Esser a haci pa hendenan haya trabao na Serlimar. Hues a bisa cu a haya un buki serca Esser cu informacionnan di hendenan cu ta liga na partido di Otmar. Hues a bisa cu no tin prueba cu lo a cumpra Otmar. Hues no ta haya cu Otmar a abusa di su funcion manera Fiscal ta acusa. Hues ta haya cu Otmar ta culpable di malversacion y un parti a abusa di funcion.
Hues ta haya cu Otmar diferente biaha a purba malversa Gobierno, den caso terenonan. Tambe Phillips y Tiel a malversa Gobierno. Hues a bisa cu Otmar a abusa di su funcion como minister. Esaki ta daña e imagen di Gobierno di Aruba. Pa cu e castigo, Hues a tene cuenta cu e periodo largo cu a dura promer cu e caso a bin dilanti y cu Ministerio Publico a duna e caso hopi publicidad. Hues no ta haya cu Otmar tabatin beneficio financiero den e caso aki.
Hues a condena Otmar na 365 dia di prison di cual 319 dia ta condicional. Esey ta nifica cu Otmar no mester bay sera mas. Hues tambe a condena Otmar na 240 ora di trabao pa comunidad. Hues a prohibi Otmar pa un periodo di 3 aña di por postula su mes como politico y tambe cu pa 3 aña e no por traha den Gobierno.
