E nieto a batie cu bate di baseball
ORANJESTAD (AAN): E homber Y. di edad grandi di 72 aña, a presenta dilanti Hues pa di dos biaha pa a abusa di su nieto, S. E promer biaha cu esaki a socede tabata 12 aña pasa, na aña 2013 y e di dos biaha tabata dia 2 Juni 2024.
Toch Fiscal no ta haya proba cu Y. a abusa sexual di S., pero si actonan inmoral. Fiscal a exigi 18 luna di prison y prohibi pa Y. ta den contacto cu S. Hues pa gran parti a haya e castigo exigi pa Fiscal na su lugar.
Den sala di Corte tabata presente e victima hoben S., acompaña pa su madrastra. Fiscal a acusa Y. di a abusa di su nieto S. riba 2 Juni 2024. Fiscal a sigui bisa cu, subsidiario e ta acusa Y. di a haci actonan inmoral cu S., caminda e tabata drumi riba S. su lomba.
Nieto a haci demanda di daño: Ta asina cu S. a haci demanda di daño di 50 mil Florin total, cu ta encera daño emocional, trauma, perdida di trabao.
Por a mira cu S. tabata hopi nervioso y su madrastra a splica Hues riba e demanda di daño.
Abusa di nieto: Hues a bisa cu Y. a abusa di su nieto. Riba 2 Juni 2024 den oranan di marduga, despues cu S. a yega cas y bay drumi, Y. a bay haci abuso sexual cu S. Y. ta desmenti esey. Segun Y., e tabata inconciente y no sa si algo a pasa. El a bisa cu sa pasa cu ora cu e bebe, e ta perde conocimento kico e ta haci. El a bisa cu ora el a bin bei, el a ripara cu S. a maltrat’e cu un bate di baseball. Hues a mustra cu S. a declara cu ora e tabata na soño, Y. a subi riba dje y baha su carson y pone su parti intimo tabata meymey di S. su bilnan.
E miomento ey Y. tabata sacudi cabez y a bisa Hues cu e no sa di nada. Segun Y., el a pidi pa haci DNA. Hues a bisa cu a haci investigacion forence cu ta mustra cu Y. a satisface su mes riba su nieto. Hues a puntra Y., kico e ta pensa di e situacion aki. Segun Y., e no sa con pa pensa. Hues a remarca, cu Y. no sa con of e no kier pensa! Hues a bisa cu na Polis Y. a nenga di a abusa di su nieto. Y. a bisa Hues cu el a pidi pa haci test di DNA.
Hues a remarca cu no ta promer biaha. Den pasado caba Y., na 2013, a worde condena pa a abusa di su nieto S. El a worde condena na 2 aña di prison. Segun Y., inhusto 12 aña pasa, el a worde condena pasobra e no a haci nada. Hues a remarca cu e Hues e tempo ey si a haya Y. culpable.
Tendencia pedofil: Hues a bisa cu psicologo a evalua Y. y psicologo ta haya cu Y. tin tendencia pedofil pero no por segura esey pasobra Y. ta nenga tur cos. Hues a remarca cu Y. ta bisa cu e no ta busca relacion cu mucha homber jong pero ta un hecho cu el a hacie. Y. a reacciona cu e no ta abusa di un mucha y tampoco di un hoben homber. Hues a mustra cu tin raport di Reclassering cu tambe ta mustra cu Y. tin tendencia pedofil.
E raport di Reclassering ta mustra cu tin miedo cu Y. ta bolbe ripiti mirando cu el a hacie un biaha caba. Tanto psicologo como Reclassering ta haya cu Y. mester haya tratamento.
Den sala di Corte tabata presente un miembro di Reclassering y riba peticion di Hues, el a duna su punto di bista. E miembro di Reclassering a bisa cu awor e ta tende cu Y. tin problema cu alcohol tambe. E ta haya cu Y. mester haya tratamento.
Ta asina cu Y. a bay di acuerdo pa haya tratamento mirando kico e raportnan ta bisa. Hues a puntra si e tratamento mester ta obligatorio. E trahador di Reclassering a bisa cu no tin un instituto pa Y. haya tratamento pero den e caso aki, e ta hopi importante pa Y. haya tratamento di psicologo. Reclassering tin psicologo y e tratamento lo ta cu Y. mester presenta tur biaha pa tratamento. E ta haya cu Y. mester di guia intensivo pa mira con e relacion den famia lo sigui.
Victima a papia: E nieto S. hunto cu su madrastra, compaña pa un miembro di CEA, a bay para tras di un mesa cu un mike pa asina S. por expresa su mes. S. a remarca na Hues cu Y. ta bisa cu e no sa di nada pero e sa masha bon kico a pasa! S. a bisa Hues cu e caso aki a afect’e masha hopi.
E ta den trauma, no por focus hopi bon mas. S. a bisa cu e no kier sa mas di Y. E madrastra a bisa Hues cu S. ta hopi emocional y ta bebe hopi door di e trauma cu el a sufri. El a bisa cu e mama di S. ta hopi afecta y no por a presenta den Corte.
Fiscal: Na su turno, Fiscal a bisa Hues cu 2 Juni 2024, Polis a bay na un cas pa un problema familiar. Eynan, Polis a topa cu Y. cu man sangra y cu e tabata bou influencia. Y. a bisa cu e tabatin problema cu S. S. mes no tabata presente. Mas laat, S. a presenta na Polis cu su mama. S. a bisa cu e tabata drumi cu carson largo bisti. Na dado momento el a spierta ora cu su amiga a yam’e na cellular. El a sinti hende riba dje y a mira cu ta Y. y S. su carson tabata baha. E momento ey S. a rabia asina hopi cu el a coy un bate di baseball y maltrata Y. cu esaki.
Fiscal ta haya cu e declaracion di S. ta suficiente y tin prueba di sosten. El a mustra cu na 2013 caba Y. a abusa di S. E tempo ey S. tabata menor di edad. Riparabel ta, cu e mesun manera S. a worde abusa. Fiscal a mustra cu e tempo ey den e sentencia, ta mustra cu Y. tabata bou influencia di alcohol y cu Y. tabata mishi cu S. E tata di S. a bisa cu el a mira su yiu yega cas riba brommer coriendo duro, sin flanel.
El a mira S. hopi emocional y S. a bisa su tata cu el a bolbe sosode. E mama tambe a bisa mesun cos. Fiscal a bisa cu for di investigacion no ta sali na cla cu tabatin penetracion y pesey mester declara Y. liber di abuso sexual. Si Fiscal ta haya Y. culpable di a haci actonan inmoral cu S. Fiscal ta haya cu Y. a tacha integridad di S. Fiscal ta tuma Y. na malo cu a abusa di e situacion.
Exigi 18 luna di prison: Fiscal a bisa Hues cu por a scucha kico ta e impacto riba S. y cu lo keda. Pa cu e castigo, Fiscal a bisa cu e ta tene cuenta cu den pasado caba Y. a abusa di S. y awor atrobe. E ta tene cuenta cu psicologo ta haya cu tin tendencia pedofil.
Psicologo ta haya Y. pa un parti ta menos responsabel. Psicologo ta haya cu Y. mester di tratamento. Reclassering tambe ta haya cu Y. mester di guia intensivo. Fiscal a exigi 18 luna di prison pa Y., di cual 6 luna ta condicional cu 3 aña di prueba. E castigo ta bay cu e condicion cu Y. mester cay bou guia di Reclassering durante e tempo di prueba.
Fiscal tambe a exigi pa prohibi cu Y. tin contacto cu S. of den cercania di S. durante e 3 aña di prueba. Pa loke ta e demanda di daño, Fiscal ta haya cu esaki no ta specifica kico realmente ta e gastonan y pesey mester declara esaki no admisibel. Sinembargo Fiscal a mustra cu mirando cu tin sentencia di Corte di Hulanda pa caso sin demanda, el a pidi pa impone pa Y. paga 2 mil Florin.
Abogado: Abogado mr. Kuster a bisa Hues cu na 2013, Y.(72) a worde condena caba pa algo asina. El a mustra cu despues cu Y. a sali liber, e no a haya guia. E abogado a mustra cu Y. ta alcoholico y ta perde conocemento. Psicologo ta haya cu Y. ta menos responsabel pa loke el a haci. Tanto psicologo como Reclassering ta haya cu e chens pa ripiti ta grandi.
Abogado a bisa cu e ta comparti opinion di Fiscal cu mester declara Y. liber di a abusa di S. E ta haya cu lo ta mihor tratamento obligatorio pa Y. y no castigo largo den prison. E abogado ta comparti opinion di Fiscal pa loke ta e demanda di daño.
Sentencia: Hues a pospone e caso un rato pa e bay evalua. Ora el a bolbe, el a sera tratamento di e caso y a dicta sentencia. Hues a bisa cu e ta haya legalmente proba e acusacion subsidiario esta cu Y. a haci actonan inmoral cu su nieto. Hues no ta haya proba abuso sexual.
Hues a bisa cu esaki ta un caso hopi serio. No ta promer biaha cu Y. ta worde condena pa e mesun cos. Psicologo ta mustra den raport cu pa un parti Y. no ta responsabel pero cu mester di tratamento. Reclassering tambe ta bati bel. Hues ta haya e exigencia di Fiscal na su lugar.
