Tanto Hues como Fiscal ta duda den declaracion di e victima
ORANJESTAD (AAN): E homber R. di 38 aña, riba Diahuebs mainta a wordo declara liber di e acusacion di a viola y haci actonan inmoral cu e dama K.
Ta asina cu R., ta bibando na Hulanda y su abogado mr. Carlo a presenta den Corte pa defende.
E acusacionnan cu Fiscal a presenta contra R. ta cu dia 4 November 2021, el a viola y haci actonan inmoral cu e dama K. Ta asina cu e dama K. no a presenta den Corte.
Hues ta duda: Hues a mustra cu K. a haci denuncia cu el a bay na e auto di R. pa haya un refresco. Den auto tabata R. y un amiga di R. K. a bisa cu R. y e amiga di R. a haci actonan inmoral cu ne y cu R. a forc’e pa tin relacion sexual.
Hues a bisa cu e ta haya e caso aki hopi straño. E ta puntra su mes, kico realmente a sosode. Hues, lesando e declaracion di K., ta puntra con por ta cu K. a bay den e auto. Hues a bisa cu e tin duda den declaracion K., kico a sosode. El a mustra cu Hues Comisario a interoga K. y e amiga di R. Hues ta haya cu na Hues Comisario, K. a duna declaracion completamente otro cu loke el a declara na KZP. Na Hues Comisario, K. a bisa cu el a bay den auto y a masashi R. cu tabatin dolor, pa 10 minuut largo. E amiga di R. a bisa cu ningun momento tabatin actonan inmoral. Hues tambe a remarca cu K., despues di e incidente, a manda WhatsApp na R. caminda e ta cuminda R. Ora a confronta K. cu esaki, el a desmenti pero despues ta admiti. Hues ta duda den declaracion di K.
Ta asina cu K. a haci un demanda di daño contra R. Segun K., e caso a causa cu el a divorcia di su pareha y cu el a keda cu trauma. El a demanda 3000 florin.
Abogado mr. Carlo a bisa Hues cu R. actualmente ta trahando na Hulanda. El a duna Hues un declaracion por escrito di R. R. a bisa cu e caso aki a afect’e pasobra e no a haci nada. El a bisa cu na 2023 el a dicidi bay biba na Hulanda y ta trahando.
Fiscal tambe ta duda: Fiscal a bisa Hues cu el a bin cu e caso pa Hues dicidi. Fiscal a mustra cu mester saca afor si realmente tabatin violacion, actonan inmoral of si tabatin un aventura den trio. Fiscal ta haya cu K. tabata consistente den su declaracionnan. Fiscal ta duda den declaracion di e amiga di R. y pesey ta pidi pa declara R. liber. Fiscal a bisa cu e declaracion liber di R. ta nifica tambe cu no por aproba e demanda di daño di K.
Abogado: mr. Carlo a bisa Hues cu no sa socede cu tanto Hues como Fiscal no ta haya proba e acusacion. El a bisa cu e caso a traha riba R. E abogado ta contento cu tanto Hues y Fiscal ta duda cu R. ta culpabel.
Sospechoso declara liber: Hues a cera tratamento di e caso y a dicta sentencia di biaha. Hues ta haya cu e declaracionnan di e victima K. no ta consistente y ta crea duda. Hues ta duda cu lo a sosode violacion of actonan inmoral. Hues a declara R. liber y no ta aproba e demanda di daño.
