Huez tabata skerpi den su sentencia
- A abusa di confianza di e mayornan pa wak pa nan yiu
- E tin di paga 10 mil Florin na famia tambe
ORANJESTAD (AAN): E homber W. di 74 aña, riba Diabierna mainta a wordo haya culpabel di a abusa di un mucha muher bou di 12 aña. E acusado W. a presenta den Corte pa scucha su sentencia. Luna pasa tratamento di e caso a tuma lugar caminda tata di e mucha victima, a bisa den Corte, cu pasobra e tin su yiu cu ta depende di dje, e no a mata W.
El a ripiti esaki diferente biaha y Hues a hala su atencion. Fiscal a exigi 5 aña di prison pa W. y pa e paga e demanda di daño di 10 mil florin y cu medida di pago. Diabierna, e tata, su pareha y familiarnan tabata presente pa scucha sentencia. Famia di e acusado tambe tabata presente. Por a mira cu e guardianan di Corte, CEA, tabata atento.
Culpabel di abusa di mucha: Hues ta haya W. culpabel di a penetra e mucha cu su dede y tambe di a mishi na partinan intimo di e mucha durante 2 aña. Hues a bisa cu den casonan di abuso, ta declaracion di e victima contra e acusado. Hues a splica cu segun ley, no por bay solamente tras di declaracion di e victima. Un testigo no ta suficiente pa condena un sospechoso.
Segun decision di Corte Supremo di Hulanda, den casonan asina, mester busca pruebanan di sosten. Hues a mustra cu for di declaracion di e victima, for tempo cu e tabatin 7 aña te cu 9 aña, mas cu 30 biaha, W. tabata abusa di dje na cas di su mayornan den camber. Hues a mustra cu e mucha tabata yora so ora e tabata duna declaracion na KZP.
Hues a sigui bisa cu otro testigo a bisa, cu e mucha a cont’e kico a pasa y tabata yora. E testigo tambe a bisa cu e mucha tabata corta su mes na su mannan.
Hues ta haya cu e declaracion di e mucha ta confiabel. Na opinion di Hues, tin prueba di sosten y tambe cu e acusado W. mes a admiti durante tratamento di e caso. El a admiti di a mishi cu e mucha na su pechonan y parti intimo, pero ta nenga di a penetra e mucha cu su dede. Hues a bisa cu e no ta kere W., cu ta nenga di a penetra e mucha cu su dede. Hues ta haya legalmente proba cu W. a penetra e mucha cu su dedenan diferente biaha y a mishi cu e mucha su partinan intimo.
E mucha a keda afecta: Pa cu e castigo, Hues a bisa cu e ta tene cuenta cu seriedad di e caso. El a bisa cu Fiscal a exigi 5 aña di prizon y abogado mr. Mohamed a bisa cu e castigo exigi ta dispropocional halto y tambe pa Hues tene cuenta cu salud di W.(74).
Hues ta haya cu durante 2 aña largo, W. tabata abusa di e mucha di 7aña te cu ora e tabatin 9 aña. Hues ta haya cu W. a abusa di e confianza di e mayornan cu a confia W. den cuida nan yiu. Hues a sigui bisa cu W. a tacha e integridad di e mucha y cu por afecta e mucha sicologicamente.
Castigo di 4 aña di prizon: Hues a mustra cu for di rapport di psicologo, te ainda e mucha ta afecta. Hues a bisa cu e ta tene cuenta cu orientacion di sentencianan di Corte Superior den casonan similar. Hues a condena W. na 4 aña di prizon, kitando e tempo cu e ta sera den KIA.
Mester paga 10 mil florin di daño: Pa loke ta e demanda di daño, ta asina cu e mayornan a demanda 10 mil florin. Esaki door cu e mucha ta afecta. E ta corta su mes, e tin miedo y mester haya tratamento. Hues a aproba e demanda di 10 mil florin y a pone e medida di pago.
