ORANJESTAD (AAN) – E homber J.R. a presenta dilanti Hues pa duna cuenta pa e delito cu el a haci. Dia 20 December 2020,
Polis a deten’e pasobra e tabata cana cu un arma di candela den Village. Den Corte, J.R. a admiti di a haci esaki. Fiscal a exigi castigo combina y Hues a condena J.R. na castigo combina.
CANA ARMA PA DEFENDE SU MES
Hues a bisa cu Polis a haya informacion cu J.R. tabata cana den Village cu un arma di candela. Polis a bay y haya J.R. cu un revolver. Segun J.R., desde 1980 e tabatin e arma. El a bisa cu e tin problema cu K.J.(Prince) caminda Prince a yega di maltrat’e cu machete y palo. Segun J.R., tur hende na San Nicolas sa cu Prince ta adicto problematico. J.R. a splica Hues cu hendenan a bis’e cu Prince ta busk’e pa mata. El a bisa cu el a haci denuncia na Polis pero nada a pasa. Pesey e tabata cana cu e arma pa defende su mes.
El a bisa Hues cu un guardia di KIA a bin bis’e cu Prince a bisa cu e no kier tin problema y cu e tabata bou influencia di droga. E guardia a bisa J.R. pa ora e sali, mihor e bay cu un hende y papia cu Prince. J.R. a puntra Hues kico e tin cu haci den futuro ora e sali y un hende busk’e problema ya cu el a bay Polis pa Prince pero nada no a pasa.
Durante tratamento di e caso a sali na cla cu J.R. ta biba na un misa caminda e ta cuida e misa y mantene. El a bisa Hues cu e tin mas cu 20 aña ta bibando na e misa y cu loke a sosode cu e arma di candela, ta un mal decision cu el a haci e momento ey pero cu nunca mas e lo haci.
FISCAL
Fiscal ta haya legalmente proba cu J.R. tabatin un arma di candela. E ta haya cu J.R. no ta un mal persona pero tin un arma di candela, por causa morto. Pa cana cu arma di candela riba caya normal e castigo ta 18 luna di prison di cual 6 luna ta condicional. Fiscal a tene cuenta cu circunstancia y a exigi 18 luna di prison di cual 9 luna condicional y un tempo di prueba di 3 aña.
ABOGADO
Abogado mr. Fraser a bisa Hues cu ta un hecho cu J.R. tabatin un arma di candela. Esaki pa motibo cu Prince a menaza cu morto. J.R. a haci denuncia na Polis pero nada a sosode. Pesey e tabata cana arma pasobra Prince ta cana arma. E abogado a mustra cu Prince tabata condena pa tira y tabata algun luna for di KIA. E ta haya ta straño, cu te dia di awe Polis no a bay interoga Prince. E abogado a mustra cu J.R. ta conoci como un persona hopi trankil y ta biba na un misa. E ta haya e exigencia di Fiscal ta rasonabel.
Hues a mustra cu si sigui Fiscal, J.R. lo no haya libertad condicional. Normal libertad condicional ta conta ora castigo ta 12 luna y lo kita 1/3 parti afor. Pesey el a dicidi di modifica e exigencia.
SENTENCIA
Hues a bisa cu J.R. ta culpable y cu e tin e impresion cu J.R. no ta un hende violento. El a bisa cu el a compronde cu J.R. a bay Polis pero nada no a sosode. Pesey ta desvia exigencia di Fiscal cu ta hopi rasonabel. Hues a tene cuenta cu ya J.R. ta sera 5 luna y mirando cu no ta violento el a condena J.R. na 18 luna di prison di cual 12 luna ta condicional cu 2 aña di prueba.
