ORANJESTAD (AAN): Diaranson pa 3:30 pm den Corte di Husticia a tuma lugar e caso sumario cu e dama Opheila B. a cuminsa contra Nelson (Speed) Cabral de Andrade.
E dama Opheila B. a worde representa pa mr. de Hoogd mientras cu Speed a worde representa pa mr. Illes.
E demanda ta cu Speed durante su programa na radio a expresa cu ta Opheila a horta password y documento di Leoncita Arends y duna Otmar Oduber pa a usa den temporada di eleccion na 2017.
E abogado mr. de Hoogd a mustra cu door di e expresionnan haci door di Speed, 4 biaha LandsRecherche a bay na cas di Opheila pa haya informacionnan tocante e password pa cu e caso Avestruz. E abogado a bisa cu door di esaki e mama di Opheila a bira malo.
E abogado ta haya cu Speed mester rectifica expresionnan cu no ta cuadra cu e berdad. El a mustra riba hurisprudencia di libertad di prensa caminda no por bay haci acusacionnan sin cu no tin prueba.
Di parti di Speed, mr. Illes a bisa cu Speed a haci e expresionnan a base di informacion cu Leoncita a dun’e. E abogado a presenta un carta di Leoncita cu ta bisa cu ta el a bisa Speed cu Opheila a horta e password y documentonan. E abogado ta haya cu Opheila no mester a cuminsa caso contra Speed sino contra Leoncita.
Hues a haci pregunta na Speed, pakico no a bay busca e opinion di Opheila promer cu el a haci e expresionnan. Speed a bisa cu e no ta papia cu Opheila y como tal esey no ta posibel. Sinembargo coleganan a haci esey su siguiente dia pero ya e problema a cuminsa caba.
Hues a sera tratamento di e caso y a bisa cu dia 23 Juni 2021 lo tin sentencia.
