Abogado mr. Canwood di 3 periodista ta señala den Corte
ORANJESTAD (AAN): Diabierna abogado mr. Canwood, kende a representa Nelson de Andrade (Speed), Norben Giel y Brian Koolman, a cuestiona e forma con Fiscal ta persigui e periodistanan den e caso di scucha Tetra-radio di Polis. E abogado ta haya cu Fiscal kier mina libertad di prensa pa busca informacion.
Despues di a scucha Fiscal exigi 2 aña di prison pa Speed, 18 luna di prison di cual 8 luna ta condicional cu 3 aña di prueba pa Giel y Lacle y 6 luna di prison condicional cu 3 aña di prueba pa Koolman, mr. Canwood a bisa Hues cu e ta haya cu no mester culpa su clientenan pa fayo cu ex agente Vos a haci.
No tabatin cumpramento di Vos: E abogado ta haya cu mester declara Giel, Andrade y Koolman liber. Mr. Canwood a bisa Hues cu Vos ta bisa cos cu no ta cuadra cu e berdad. E abogado a mustra cu den caso Giel, Vos ta papia manera cu el a haya placa pero Giel a splica bon cla cu e no tabata paga. Pa loke ta Speed, Vos ta papia cu e lo a haya sponsor y publicidad pero no tabata asina. No ta asina cu Vos a haya mas publicidad cu cualkier otro Polis. E abogado a mustra cu Vos ta bisa cu Koolman ta haci cosnan pa Speed. Ta pesey mes Fiscal no ta haya Koolman culpable di a cumpra Vos.
E abogado a desmenti e declaracion di Vos cu Speed a financia e aparatonan. E abogado a bisa Hues cu cada un a percura pa nan Laptop Computer y Vos ta esun cu a instala. El a sigui bisa cu Vos ta papia cu Speed a ofrec’e 1500 florin diferente biaha, pero no a tum’e. Esaki no ta berdad. Na opinion di mr. Canwood, si Vos ta fia placa pa loco, e ta duda cu si Speed a ofrece placa, e lo a nenga esaki. E abogado a splica cu Speed ta haci donacion na hendenan cu tin problema for di su saco. E hecho cu lo a treat Vos cerbes, esey ta mucho baho di Fiscal pa considera esey como a cumpra Vos.
Pa loke ta Giel, e abogado a bisa cu tin biaha e ta bisa Vos ta ok cu e ta yuda cu placa pero no ta haci nada. E abogado ta haya cu Hues mester declara Giel y Speed liber di a cumpra Vos.
No a viola secrecia di polis: E abogado a bisa Hues cu e no ta haya cu su clientenan a viola secrecia di Polis. Ta Vos como Polis a ofrece cierto medio pa scucha. E abogado ta puntra su mes si pasobra Vos a viola e secrecia di Polis, e periodistanan tambe ta castigabel.
Mina libertad di prensa: mr. Canwood a bisa Hues cu Prensa tin e libertad di publica cosnan. Periodistanan tin e deber di publica cosnan cu no ta corecto. E ta haya cu Gobierno y Ministerio Publico no mester stroba prensa den ehercemento di nan trabao. Ora cu ta stroba prensa di haya informacion, ta stroba e libertad di prensa. E abogado a menciona articulonan di ley pa mustra cu prensa tin e obligacion di duna informacion y mester tin e libertad di prensa.
Na opinion di abogado, envez cu Ministerio Publico ta reuni cu prensa pa palabra con lo ta e mihor manera cu mester haci e trabao, ta persigui nan den Corte. El a mustra cu na October 2020 tabatin planea cu Mando Policial ta reuni cu prensa pa tin un mihor relacion di trabao. Sinembargo door e situacion di Covid-19, esaki no a sigui. El a mustra cu Polis ta yama prensa pa haya informacion riba cierto caso. E ta haya cu no ta Ministerio Publico pa determina con prensa mester haci trabao. Si sigui asina ta stroba prensa den haci su trabao debidamente. Ta stroba e libertad di prensa. Ta parce cu Ministerio Publico kier bringa prensa envez di traha cu prensa den casonan importante.
No por papia di organizacion criminal: E abogado a bisa cu su clientenan no ta culpable di organizacion criminal. E abogado ta haya cu aki por papia di un cooperacion pero no un organizacion criminal. mr. Canwood ta haya cu Fiscal mester ta hopi cauteloso den haci expresionnan.
Castigo exagera: Pa loke ta castigo exigi pa Fiscal, mr. Canwood a bisa Hues e exigencia di 6 luna di prison condicional por stroba Koolman den su enseñanza na Hulanda. E abogado ta haya cu Fiscal por a exigi castigo condicional pa Giel y trabao pa comunidad. Na opinion di abogado, e hecho cu Fiscal a exigi castigo di prison y detencion pa Speed, ta duna e impresion cu Speed ta un criminal cual no ta asina. E abogado a pidi Hues pa no duna castigo pasobra su clientenan a haci uso di nan derecho di libertad di prensa.
Lacle a bisa Hues cu Vos a gaña algun cos. El a bisa cu desde cu Vos a cay sera, el a sigui haya informacion di Polis usando su aparatonan. Lacle a bisa Hues cu Vos no ta e unico agente cu a haya sponsor. El a bisa Hues cu e website ta sigui traha sin Vos. El a bisa si fia hende placa of duna placa no ta cumpra. Lacle a bisa Hues cu el a kere cu e lo a haya castigo combina y trabao pa comunidad pero a keda geshock cu 18 luna di prison.
Hues a cera tratamento di e caso y 18 December 2024 lo tin sentencia.
