ORANJESTAD (AAN): Diabierna mainta te den oranan di atardi, Hues di Corte di Husticia a dedica na trata e caso penal cu Ministerio Publico a cuminsa contra 4 periodista:
Richard Lacle, Brian Koolman, Norben Giel y Nelson Cabral de Andrade (Speed). Ta asina cu Koolman no a presenta. E ta na Hulanda. Fiscal a baha pisa riba e grupo caminda el a exigi 2 aña di prison pa Speed cu orden di detencion di biaha, 18 luna di prison di cual 8 luna ta condicional pa Norben Giel y Richard Lacle, 6 luna di prison condicional pa Brian Koolman.
Den e articulo aki, DIARIO ta publica tratamento di e caso y e exigencia di Fiscal. Den un otro articulo, DIARIO ta publica e defensa di abogado mr. Canwood.
E acusacion contra e 4 periodistanan ta: (*) Den e periodo di 1 Januari 2021 te 22 Maart 2023, conhuntamente a ofrece ex agente di Polis, Vos, regalo of promesa cu e meta pa hibe na haci of keda sin haci algo contra deber di su trabao. Nan ta wordo acusa di cu den e periodo menciona a viola secretonan den cual tabata sa cu e ambtenaar, relaciona cu su funcion, ta obliga pa tene. (*) Nan ta wordo acusa di entre 1 Januari 2021 te 22 Maart 2023, a participa na un organizacion cu tabata consisti di un of mas otro persona cu tabatin como meta pa comete crimennan, esta corupcion di un ambtenaar y/of tuma y/of duna soborno y/of mal uza di funcion y/of violacion di secreto di trabao. (*) Tambe cu a forma parti di un organizacion criminal.
Hues a haci preguntanan na Lacle. Hues a mustra cu e caso a cuminsa na Maart 2023 caminda un agente di Polis a haci denuncia di ladronicia di Tetra-radionan. Despues a cuminsa investigacion y e nombernan Lacle, Giel y Speed a cay. E investigacion a carga e nomber “Caso New York” cu e caso di a cumpra agente Vos. Hues a bisa cu na Hues Comisario Lacle a bisa cu e no ta corda cierto cosnan. Lacle ta para riba cu e no a haya informacion for di Vos y no a paga Vos pa haya informacion.
El a bisa cu 2 biaha e tabata na cas di Vos y 2 biaha Vos tabata na cas di Lacle. Lacle a bisa cu e ta uza un number di dienst pa scucha Polis. El a bisa cu el a yuda Vos cu un Laptop Computer pero no pa haya informacion. Segun Lacle, varios biaha Vos tabata pidi’e placa pero e no a duna. El a bisa cu e sa duna Vos cerbes pero despues e ta paga. El a bisa cu e sa duna Vos placa pero no ta tur ora Vos ta paga bek. Segun Lacle, Vos tabata haci trabaonan na su cas y e tabata pag’e. Hues a bisa cu na Hues Comisario, Lacle a reconoce WhatsApp cu Vos.
Lacle ta nenga cu a instala aparato pa Vos: Hues a mustra cu segun investigacion di Polis, tabatin comunicacion entre Lacle y Vos entre 2021 y 2023. Vos a declara na Polis, cu Speed a pidie pa instala un sistema y despues Lacle a instala e sistema. E ta un sistema cu via laptop pega na e Tetra-radio di Polis lo scucha tur informacion cu Central di Polis manda. Lacle a bisa cu e no sa di esey. Hues a bisa cu Vos a bisa cu el a hacie y cu Lacle a traha e sistema. Vos a bisa cu Speed a ofrece 1.500 Florin pero Vos a nenga. Lacle a bisa cu e sa di e sistema pero e no a hacie pa Vos.
Admiti duna placa na Vos: Promer Lacle a bisa cu e no a fia Vos placa. Hues a confronta Lacle cu declaracion di Vos cu ta mustra cu Lacle a dun’e placa. E ora Lacle a bisa Hues cu dos biaha el a paga cuenta di cellular pa Vos.
Hues a mustra cu Vos tambe a bisa cu Lacle tabatin aparato di mobile data yama ‘Mi-Fi’. Lacle a nenga esey. Hues a bisa cu Vos a bisa cu ora Lacle papia di cooler ta daña, Lacle lo kiermen e internet di computer cual ta scucha Polis. Hues a mustra cu tin combersacion via WhatsApp caminda Vos lo a bisa cu e cooler a worde saca y e caha a wordo kita. Segun Vos cu ora papia di cooler, cerbes of caha, kiermen cu radio di Polis. Hues a bisa cu tin WhatsApp di Lacle cu ta bisa Vos cu no tabatin informacion. Lacle a splica Hues cu e tabata radio amateur y e tin su mesun aparato pa scucha Polis, Ambulance y Brandweer.
Hues a bisa cu Vos a declara cu Lacle kiermen cu ta informacionnan cu Lacle lo mester scucha di radio di Polis cu e no ta haya. Hues a mustra cu Lacle a manda Vos un mensahe cu su bateria di computer a baha y no tin informacion. Vos a bis’e cu asina Lacle ta castig’e. Despues Lacle ta bisa cu e sa bisa otro Polis tambe cu e bateria ta abao. E kiermen e bateria di cellular. Hues a bisa cu tin mas combersacion entre Vos y Lacle, caminda Vos ta bisa cu e radio di Polis cu ta pega cu computer cu Lacle a regla. Lacle a desmenti esaki.
Hues a bisa cu tin combersacion entre Vos y Lacle cu ta duna e impresion cu si Lacle no paga, e lo no haya informacion. Lacle a bisa cu e no ta corda. Lacle a admiti di sa puntra Vos pa informacion pero el a bisa cu e no ta haya. Lacle a bisa cu e sa di e programa Zello y ta nenga di a instala e programa aki den laptop di Vos. Hues a bisa cu a haya un papel cu informacionnan di Lacle di placa cu el a fia Vos y caha di cerbes.
Speed no kier papia: Hues a bisa cu lo haci preguntanan pero Speed a bisa cu e no ta bay duna ningun contesta. E ta haci uso di derecho di silencio. El a bisa cu e no a paga Vos pa informacion pasobra e tin un sistema cu e ta haya tur informacion. El a bisa cu e sa yama Vos pa informacion y Vos ta yam’e. Hues a bisa cu riba cellular di Vos for di April 2021 e tin contacto cu Speed. Vos a declara cu Speed a pidi’e pa instala e mesun sistema cu el a haci pa Giel. Speed lo a ofrece Vos 1.500 Florin pa luna pa e sistema aki. Despues Koolman a hiba un Laptop Computer color cora pa Vos. Segun declaracion di Vos, el a nenga e oferta pero a instala e sistema. Hues a mustra cu tin diferente combersacion entre Speed y Vos tocante e internet di Vos pa haya informacion. A instala e programa Zello riba laptop y pega riba Tetra-radio di Polis.
Giel tampoco a papia: Hues a bisa cu na Hues Comisario, Giel a bisa cu na 2011 el a cuminsa haya informacion di Vos. Giel a bisa cu e no ta haya informacion di Vos, pero sa puntra Vos pa informacion. Giel a bisa cu e ta considera Vos un amigo y sa duna Vos placa. Giel a yega bay algun biaha na cas di Vos. Hues a mustra cu segun e relato di Hues Comisario, Giel a bisa cu e tabata usa un number di cellular cu ta duna acceso pa informacion di Polis. Investigacion ta mustra cu e number ta riba radio di Polis na Vos. Giel a haci uso di silencio ora Hues a mustra cu Vos a bisa cu Giel a dun’e laptop y cu Giel a pidie pa informacion via programa Zello. Hues a mustra cu tin hopi combersacion encuanto e Tetra-radio di Polis y Giel a bisa cu e ta haci uso di derecho di silencio.
Hues a bisa cu tabatin investigacion haci na cas di Vos, caminda a haya 3 Laptop Computer y 3 Tetra-radio di Polis. Dos di e laptops a habri mientras cu un di nan a wordo desconecta for di distancia. Un di e laptop ora a habri’e, algo a pone cu no por a copia informacionnan.
Speed ta recidivista: Hues a mustra cu na 2019, Speed a haya castigo pa asunto di scucha Tetra-radio di Polis. Awor el a cay den su tempo di prueba pa e caso aki.
Fiscal a bisa cu e caso a bin dilanti door di detencion di e ex agente Vos. Fiscal a bisa cu Ministerio Publico a apela e sentencia di Vos cu tabata na December 2023. Fiscal ta haya cu Vos a laga su mes wordo cumpra. E acusadonan Lacle, Giel, Speed y Koolman ta esnan cu a “cumpra Vos”.
Periodista no por cumpra Polis: Fiscal a bisa Hues cu e caso aki no ta bay riba libertad di prensa. No ta bay pa silencia prensa sino cu tur cu ta haci delito di cumpra hende, ta wordo castiga. Na opinion di Fiscal, na Hues Comisario, e acusadonan tabatin oportunidad di duna splicacion pero nan no a hacie.
Fiscal a enfatisa cu periodista no por cumpra Polis. El a remarca, con por ta cu cierto media ta na un lugar di un incidente, promer cu Polis mes yega. Na opinion di Fiscal, e contesta a bin dilanti den caso Vos. El a mustra cu tabatin un caso anterior caminda tabata usa Tetra-radio Polis, caminda Speed tambe tabata envolvi. Awor a bay uza un sistema mas sofistica.
Cuerpo Policial tabata sospecha cu e Tetra-radionan di Polis tabata wordo mal uza. Na 2022 a haci denuncia di ladronicia di 3 Tetra-radio. Investigacion a mustra cu tur tres Tetra-radio tabata na e mesun adres, esta na cas di Vos. Riba 22 Maart 2023 a haci investigacion na cas di Vos. A haya 3 laptop pega riba 3 Tetra-radio di Polis y cu esakinan tabata manda informacion pa cierto periodistanan via programa Zello y tambe a uza Mi-Fi.
Riba smartphone di Vos a haya combersacionnan cu Lacle. Tambe tin combersacion cu Giel y Speed. Tin combersacionnan cu ta duna Vos placa. Vos a declara cu tabata manda noticia pa Lacle, Giel, Speed y Koolman kendenan a bin cu nan laptop. Fiscal a bisa cu investigacion a mustra cu Koolman a bay hiba laptop riba orden di Speed pa Vos. Lacle a bay pidi Vos ayudo pasobra Speed no tabata suministra informacion.
Segun Fiscal, na Hues Comisario Lacle a confirma loke Vos a declara. Tambe cu e tabata fia Vos placa y Vos tabata paga bek. Vos a palabra cu Lacle, Giel y Speed cu ora ta papia di Tetra-radio di Polis, ta usa e codigo di “cooler”, “cerbez” y “caha”.
Fiscal a bisa cu Koolman no kier a bisa nada y ta bisa cu e no sa unda Vos ta bisa. Giel a fia Vos varios biaha placa. Segun Fiscal, Giel tambe a confirma cu tabata haya informacion di Vos. El a bisa cu Speed no kier a bisa nada y cu Speed a bisa cu tabatin palabracionnan pero no kier bisa cu ken.
A cumpra Vos: Fiscal a bisa cu tur 4 sospechoso ta wordo sospecha di a cumpra Vos pa haya informacion di Polis. Fiscal ta haya cu Vos a viola su deber como Polis door di ricibi placa, regalo pa haci cosnan contra di su deber. El a bisa cu por spera cu e sospechosonan lo nenga cu a duna Vos algo of paga pa haya informacion. Tin indicacionnan cu nan a duna Vos placa y cosnan y popularidad na radio pa haya informacion di Polis.
Tur cos ta mustra cu Vos, riba peticion di Lacle, Giel y Speed a percura pa informacion di Polis. Tur esaki pa regalo, placa, sponsor y popularidad. Koolman tabata esun cu riba orden di Speed a bay hiba laptop na cas di Vos. Koolman tabata papia hopi cu Vos riba con e Tetra-radionan di Polis ta traha. Fiscal a pidi Hues pa declara Koolman liber di a cumpra Vos. Na opinion di Fiscal, no tin prueba cu Koolman lo a paga of duna regalo na Vos.
Organizacion criminal: Fiscal ta haya cu tabatin un relacion largo entre e periodistanan y Vos. Esey ta wordo considera organizacion criminal. E hecho cu Vos a instala e aparatonan y tabata manda informacion di Polis pa tempo largo ta organizacion criminal. Fiscal a bisa cu e organizacion criminal aki no ta manera mafia Pablo Escobar sino un forma di actua den un grupo cu ta contra ley. E hecho cu tabata pasa informacion secreto di Polis na Speed, Lacle, Giel y Koolman, ta un organizacion criminal. Fiscal ta haya nan culpable.
Viola secreto di polis: Fiscal a sigui bisa cu e ta haya e 4 periodistanan culpable di a viola secreto di Polis. Vos como Polis, tabatin e deber di secrecia pero e tabata pasa informacionnan di Polis cu ta considera secreto na e periodistanan. Na opinion di Fiscal, ningun di nan tabatin e autorizacion pa haya informacion di Polis. Fiscal ta haya cu nan ta complice di viola secreto di Polis.
Fiscal a exigi castigo pisa: Fiscal ta haya cu e comportacion di Speed y Giel, di haci uso di derecho di silencio tin su consecuencia. E ta haya cu Lacle ta gaña. Na opinion di Fiscal, e silencio por tin consecuencia riba e castigo ora cu resulta cu nan ta culpable. Fiscal ta haya cu e periodistanan no kier tuma responsabilidad riba nan.
Fiscal a mustra cu Speed ya a wordo condena pa algo similar. El a haci e mesun cos den su tempo di prueba. Parce cu e no a siña. Como periodista nan ta conoci den comunidad. Fiscal ta haya cu periodistanan mester atene nan mes na norma, etica periodistico y ley den un comunidad. E ta haya cu den forma structural a bay scucha radio di polis.
Fiscal a exigi 2 aña di prison pa Speed y a exigi pa detencion di biaha ora Hues dicta sentencia. Fiscal a exigi 18 luna di prison di cual 8 luna ta condicional pa Giel y Lacle y cu 3 aña di prueba. Fiscal a exigi 6 luna di prison pa Koolman cu 3 aña di prueba.
Despues di a scucha defensa di mr. Canwood, Hues a bisa cu 18 December pa 8:15 am e lo cera e caso y dicta sentencia.
