ORANJESTAD (AAN) – Hues di Corte di Husticia a baha pisa riba e trio cu a haci asalto arma riba un dama na su cas cu su yiu. Hues basicamente a confirma e exigencia di Fiscal pa e trio aki.
Tratamento di e caso aki a tuma lugar luna pasa caminda Fiscal a acusa W.V.R., R.B.E. y A.G.J. cu riba 9 November 2020 a haci asalto arma riba e dama A. Tambe Fiscal a acusa R.B.E. di posesion di un revolver riba 28 November 2020.
R.B.E. tambe ta wordo acusa di a menaza dos agente di Polis cu morto riba 15 December 2020. E lo a bisa cu lo bin cu 15 granada di man y mata nan un pa un. Un di e agentenan a declara cu ora e tabata cana banda di e celnan na warda di Polis, Santa Cruz, R.B.E. a bisa cu si a yega di mata Polis na Aruba. Despues el a bisa cu e lo bin cu 15 granada di man.
EXIGENCIA DI FISCAL:
Fiscal a bisa cu e ta haya legalmente proba e asalto arma. El a bisa cu e otro dos Jeffrey y Bryan a huy for di Aruba. E victima tabata den su cas cu un baby. Seis homber a drenta e cas y menaza. Tres di e asaltantenan lo tabata arma. Investigacion a conduci na detencion e tres sospechosonan. Fiscal a bisa cu e no ta duna importancia cu awor e sospechosonan ta desmenti siendo cu nan a duna declaracion detaya. Awor nan ta bisa cu nan a wordo forza pa declara contra A.G.J. Fiscal ta kere cu den KIA nan lo a wordo menaza. Ademas tin declaracion di e amiga di e sospechosonan kendenan ta bisa cu e sospechosonan ta envolvi den e asalto arma. Fiscal ta considera W.V.R., R.B.E. y A.G.J. complice di e asalto arma.
Fiscal ta haya cu R.B.E. ta sinta ta gaña den Corte. Na opinion di Fiscal, no tin prueba legal di e menaza di e agentenan di Polis pasobra ta un agente so ta bisa esey. El a pidi Hues pa declara R.B.E. liber pa esey.
Fiscal ta haya A.G.J. culpable di menaza, maltrato y destruccion di un auto.
Fiscal a bisa un hende mester sinti su mes sigur den su cas. E asalto arma ta un asunto hopi serio. Hendenan ta keda afecta pa añanan largo y hopi biaha no ta sinti nan mes sigur den nan cas. El a cuestiona e hecho cu ilegalnan ta bin Aruba pa haci asalto arma. Fiscal exigi 60 luna di prison pa W.V.R, 63 luna di prison pa A.G.J. y 66 luna di prison pa R.B.E.
SENTENCIA:
Diaranzon Hues di Corte di Husticia a dicta sentencia den e caso, caminda Hues ta haya tur tres acusado culpable di e asalto arma. Nan tur tres ta complice di asalto arma. Hues a bisa cu e ta haya W.V.R. tambe culpable di posecion di arma di candela. Hues a condena W.V.R. na 5 aña di prison, kitando e tempo cu e ta sera den KIA.
Pa loke ta e ex militar Venezolano, R.B.E., Hues a bisa cu e no ta haya proba cu R.B.E. a menaza e agentena di Polis y ta declar’e liber pa esaki. Hues ta hay’e culpable di complice di e asalto arma y a confirma e exigencia di Fiscal y a condena R.B.E. na 5 aña y 6 luna di prison, kitando e tempo cu e ta sera den KIA.
Pa loke ta A.G.J., Hues ta hay’e culpable di e asalto arma y otro delitonan cu el a haci. A.G.J. a wordo condena na 5 aña y 3 luna di prison, kitando e tempo cu e ta sera den KIA.
