E siman aki mes Hof ta dicidi si Rudy Carti ta sali of tin cu keda den KIA

E caso a wordo trata via video conference ---ORANJESTAD (AAN): Dia 21 di October 2021, ariba orden di Fiscal, e conoci fisioterapista Rudy Carti, mester a entrega su mes na KIA.

           Esaki despues cu Carti a wordo laga liber di KIA y tabatin apenas 12 dia liber.

            Fiscal a apela contra e sentencia di Corte den Promer Instancia y a ordena cu Carti mester entrega su mes of sino lo duna orden pa detene y hib’e KIA. Abogado mr. Carlo di biaha a cuminsa un caso contra e decision di Fiscal.

CASO TRATA VIA VIDEO CONFERENCE

            Diaranson tratamento di e caso a tuma lugar pero tabata cu portanan sera ya cu e tipo di casonan asina ta wordo trata “Raadkamer”.

            DIARIO por a compronde cu mr. Carlo a cuestiona cu ta inhusto cu Fiscal ta ordena pa bolbe detene Carti siendo cu el a wordo laga liber for di KIA. Tambe a abogado a pidi pa suspende e detencion y si tog ta haya cu loke Fiscal a haci ta corecto, pa laga Rudy Carti den libertad te ora cu e caso di apelacion keda trata den Corte Superior.

E SIMAN AKI MES TIN DECISION

            Hof, despues di a scucha e punto di bista di mr. Carlo y di Fiscal, a bisa cu ta bay studia e caso y cu mas tarda diabierna lo por spera un decision si Carti mester wordo laga liber of e tin cu keda den KIA.

            Dia 8 di October 2021, Hues di Corte den Promer Instancia a declara Carti liber di 4 di e 8 acusacionnan di lo a mishi y penetra dama cu e lo a duna masashi. Hues a condena Carti na 2 aña di prison di cual 1 aña ta condicional cu un tempo di prueba di 2 aña. Hues a ordena pa Rudy keda sin traha como fisioterapista pa 4 aña.

            E hecho cu Carti tabatin 8 luna caba sera, kitando 1/3 parti di e 1 aña cu e mester sinta, ta net loke el a sinta den KIA. Ta pesey el a wordo laga liber. Fiscal no a gusta cu Carti a wordo laga liber y a duna orden cu e mester entrega su mes na KIA pendiente e caso di apelacion.