E hoben a bisa cu el a palabra cu e sospechoso pa tuma e culpa
ORANJESTAD (AAN): E hoben homber J.B. di 17 aña, riba Diabierna den Corte a bisa Hues cu e no ta esun cu a cap e homber H. cu machete sino e homber Daniel. El a bisa cu el a palabra cu Daniel pa tuma e culpa pasobra Daniel a caba di sali for di KIA. Fiscal ta haya J.B. culpabel di purba mata cu machete y a exigi 2 aña di prizon. Abogado a bisa Hues cu mester declara J.B. liber pasobra no tin prueba cu ta J.B. a cap e homber H.
Acusacionnan pisa: Fiscal ta acusa J.B. di intento di mata riba 10 April 2026, di e homber H. Ta asina cu J.B. a dal e homber H. varios biaha cu e machete na su cabez, nek, brazanan y pianan. Fiscal a sigui bisa cu subsidiario e ta acusa J.B. di maltrato severo y mas subsidiario, intento di maltrato severo
Ademas Fiscal ta acusa J.B. di posesion di armanan di candela entre Maart y April 2026.
Ken a cap ken: Hues a puntra J.B. kico e tin di bisa di e acusacionnan. Segun J.B., no ta el a cap H. sino e homber, un dal Daniel. El a bisa cu Daniel a coy su machete y bay cap H. Hues a remarca cu J.B. a bisa otro cos cerca Polis. J.B. a bisa Hues cu tin cosnan cu el a bisa Polis cu no ta e berdad. Hues a mustra cu e victima H. a declara na Polis cu anochi laat el a lanta ora cu su ex amiga A. tabata bati na porta. Ora el a habri porta, tres hende a atak’e. H. a bisa Polis cu ta Daniel a cap parti di su orea. Despues Polis a detene Daniel y el a bisa Polis cu e no sa nada di maltrato di H. El a bisa cu el a tende cu ta J.B. a maltrata H. Segun J.B., su ex amiga e dama A. a pidi nan pa bay cun’e na cas di H. pa busca su cellular. A. tabata maneha un SUV den cual nan a bay. Segun J.B. den e auto tabatin un hende homber grandi. En total tabatin tres homber den e SUV.
Segun J.B., e dama A. a bay busca su smartphone cerca H. Ora el a tende desorden y mira cu e homber H. a dal e dama A. E ora ey el a bay dal H. Despues Daniel a coy e machete cu J.B. tabatin den auto y ataca H.
Hues a puntra J.B. pakico e ta cana cu machete. El a bisa cu door cu hendenan na San Nicolas ta blo bringa cu ne, e ta cana cu machete pa defende su mes.
Tuma e culpa: E acusado J.B. a bisa Hues cu e cu Daniel a palabra pa J.B. tuma e culpa pasobra Daniel a caba di sali for di KIA. Hues a mustra cu J.B. a declara dos biaha na Polis cu el a maltrata H. cu machete. Despues J.B. a declara na Polis cu ta Daniel a maltrata H. cu e machete. Hues a puntra J.B. kico ta e berdad. Segun J.B., e berdad ta cu e no a maltrata H. cu machete. Hues a remarca cu H. no a menciona J.B. di lo a maltrat’e.
Dos arma di candela: Hues a puntra J.B. tocante e armanan di candela cu e tabatin. J.B. a bisa cu e armanan no ta di dje sino cu el a haci payasada y traha video cu e armanan den man. Hues a mustra cu Polis a haya e video den un smartphone caminda ta mira J.B. cu dos arma den man. Un ta revolver y e otro ta pistool. J.B. a admiti na Hues cu e armanan ta di berdad. Segun J.B., el a bisa Recherche di kende e armanan ta y a bisa Recherche pa no menciona su nomber pa e no haya problema. Hues a hala atencion di J.B. cu tin castigo pisa pa posesion di arma, aunke cu e arma no ta di J.B.
Hues a mustra cu J.B. tin un carchi di castigo. Na 2025 tabatin un caso di September 2024, caminda J.B. lo a causa destruccion y mester a cay bou guia di Reclassering. J.B. a bisa Hues cu e tabata bay EPB pero no a caba y tabata traha beach boy ariba beach.
Rapport di Reclassering: Hues a mustra cu tin un raport di Reclassering riba J.B. caminda ta mustra cu e chens ta mediano cu J.B. ta cay bek den man di husticia. J.B. a bisa cu e tabata huma marihuana. Reclassering ta conseha castigo combina cu condicion cu J.B. ta cay bou guia di Reclassering.
Reclassering a stipula cu e condicionnan ta cu semanal, J.B. lo mester haci test di droga, bay school bek y no anda cu amigonan cu ta hib’e den mal caminda.
Exigi 2 aña prizon: Fiscal a bisa Hues cu H. a declara cu J.B. y Daniel a cap e cu un machete. Ta asina cu J.B. a bisa cu el a cap H. Na cas di J.B. a haya e machete. Despues J.B. ta bisa cu Daniel ta esun cu a malatrata H. Fiscal a remarca cu tin hopi declaracion bruha. Na opinion di Fiscal, for di J.B. por a compronde cu e tabata na e cas y cu e tabatin un machete. J.B. a bisa cu e tabata cu Daniel y cu ta Daniel a coy e machete y cap H. Fiscal ta haya J.B. culpabel di hunto cu Daniel a cap H. Fiscal a bisa Hues cu el a spanta ora el a mira e cortanan cu H. a sufri. En especial e corta na garganta di H. Fiscal ta haya cu nan a tuma e risico cu por a corta adernan di nek di H., cu consecuencia cu H. por a muri. Tambe Fiscal ta haya proba cu J.B. ta culpabel di posesion di 2 arma. Riba video ta mira J.B. cu un arma den cada man.
Pa cu e castigo, Fiscal a bisa cu e ta tene cuenta cu na momento di a haci e delitonan J.B. tabatin 16 aña. El a bisa cu Reclassering ta conseha pa J.B. cay bou guia di Reclassering y cu condicionnan. Fiscal ta haya cu e guia di Reclassering lo ta hopi bon. Fiscal a sigui bisa cu e ta tene cuenta cu e edad hoben di J.B. y a exigi castigo hubenil di 24 luna (2 aña) di prizon di cual 6 luna ta condicional cu 2 aña di prueba y bou guia di Reclassering. Fiscal a bisa tambe cu e machete cu a confisca mester wordo destrui.
Defensa Abogado: Abogado mr. Dijkhoff a bisa Hues cu H. no a menciona cu J.B. a maltrat’e cu machete. H. a menciona tres persona a maltrat’e pero no J.B. Abogado a mustra cu J.B. a bisa cu e no a maltrata H. cu machete. El a bisa cu J.B. a bisa cu el a palabra cu Daniel pa tuma e culpa, pero no tin prueba cu J.B. a cap H. E victima H. mes a bisa cu ta otro hende entre otro Daniel a cap e. Abogado a pidi Hues pa declara J.B. liber di intento di mata. El a bisa cu J.B. a admiti di tabatin e armanan den man y a desmenti cu e armanan ta di dje. E abogado a bisa Hues cu J.B. a yuda cu investigacion pa haya doño di e armanan. E abogado ta haya e castigo exigi pa Fiscal, ta mucho largo. El a remarca cu mas J.B. keda sera den KIA, mas e chens tey cu J.B. ta cay den mal caminda. Teniendo cuenta cu e raport di Reclassering, mr. Dijkhoff a pidi Hues duna castigo condicional bou guia di Reclassering.
Na final di tratamento di e caso J.B. a bisa Hues cu awor cu e tin 6 luna cera, el a ripara cu e no ta riba e bon caminda.
Hues a bisa cu e ta bay studia e caso y 30 October 2026, e lo tin sentencia.
