Na yoramento e acusado a bisa Hues cu e no kier bay bek Colombia
ORANJESTAD (AAN): E homber Colombiano H.L.B. (20), a admiti cu el a haci dos atraco arma y menaza dos hende cu cuchiu pa nan dun’e nan pertenencia. El a pidi disculpa pa loke el a haci. Na yoramento el a bisa Hues cu e no kier bay bek Colombia. Hues a confirma e exigencia di Fiscal cu ta 5 aña di prison, kitando e tempo cu H.L.B. ta sera den KIA.
ACUSACIONNAN
Fiscal a bisa Hues cu H.L.B. ta wordo acusa di atraco riba 9 April 2026, caminda H.L.B. a ranca tas for di un dama J. y pone cuchiu na su garganta y menace. Fiscal a sigui bisa cu H.L.B. riba 2 Maart 2026, a forza un dama D.C. duna un cellular caminda H.L.B. a mustr’e un cuchiu. Dia 19 di Maart 2026, H.L.B. a bolbe forza un homber B. duna su tas y joyas door di pone cuchiu na su garganta. Dia 3 April 2026, H.L.B. a haci atraco, caminda el a ranca tas for di un dama D.S. y push’e riba vloer.
ATRACO
Hues a puntra H.L.B. si el a bin Aruba como turista na Januari 2026. Hues a remarca cu dos luna despues, H.L.B. a bay haci atraco y forza hende duna nan propiedadnan. Segun H.L.B. e tabata den un crisis familiar cu su pareha cu ta na Colombia y a bay usa droga. Esey a causa cu el a bay haci atraco pa asina haya placa pa cumpra droga. El a pidi pordon na tur esnan cu el a horta. El a bisa Hues cu e sa cu e victimanan a traha duro pa haya nan cosnan.
ACUSADO TA PIDI PORDON
H.L.B. a pidi Hues permiso pa e lesa un carta cu el a skirbi. Na yoramento e tabata pidi pordon na comunidad di Aruba y esnan cu el a horta. El a bisa cu e sa cu el a faya y cu ser humano ta haci fayo. E kier cambia su bida y mustra cu e por haci cosnan bon. El a bisa cu e ta sinti hopi malo, berguenza, fustra pa tur loke el a haci. El a bisa cu e droga cu e tabata usa, a converti’e den un adicto.
H.L.B. a pidi Hues pa pordon’e. El a bisa cu e no ta un bestia sino un yiu di Dios.
Hues a bisa cu H.L.B. a bisa bunita palabranan pero con e ta pensa di drecha su bida.
ADMITI Y NO KIER BAY BEK COLOMBIA
Hues a puntra H.L.B. si e ta mantene su declaracion na Polis caminda e ta admiti tur e atraconan. El a bisa cu si. El a bisa cu e tabata militar na Colombia y a cay den adiccion. El a rehabilita pero a bolbe cay aki na Aruba ora el a haya e problema cu su pareha. El a bisa cu el a bin Aruba pa drecha su bida. El a bisa cu e no kier bay bek Colombia pasobra nan a purba mat’e aya. El a bisa cu na Colombia tin hopi violencia.
Hues a remarca cu e ta mira cu H.L.B. ta pinta su mes como victima pero si H.L.B. ta conciente cu el a haci hopi malo na Aruba. Pakico e kier keda aki. H.L.B. na yoramento a bisa cu e no kier bay bek Colombiano.
E dama J. a haci demanda di daño di 805,43 florin pa loke H.L.B. a horta e tas cu contenido.
FISCAL A EXIGI 5 AÑA DI PRISON
Fiscal a bisa cu tin suficiente prueba pa tur e acusacionnan. El a mustra cu H.L.B. a admiti tur e delitonan. Ta 4 delito, 2 atraco y 2 caso caminda H.L.B. a forza hende duna nan pertenencia. Fiscal ta haya cu ta importante pa tene cuenta kico tur e victimanan a pasa aden. Tambe Fiscal ta tene cuenta cu circunstancia di H.L.B. Fiscal a remarca cu e forma con H.L.B. a haci atraco y forza hendenan, ta afecta e hendenan y esaki lo por dura añanan. Ademas e ta causa un impacto di inseguridad den comunidad. Fiscal a exigi 5 aña di prison, kitando e tempo cu H.L.B. ta sera den KIA.
Pa loke ta e demanda di daño di e dama J., Fiscal ta haya cu H.L.B. mester paga esaki.
ABOGADO
Abogado mr. Sjiem Fat a bisa Hues cu H.L.B. a admiti tur cos. Segun abogado e acusacionnan no ta specifica con H.L.B. a haci atraco of forza hende. E abogado ta duda cu aki por papia di legalmente proba. E abogado a cuestiona e forma con Polis ta papia di e caso riba Face book siendo cu ainda e caso tabata bao investigacion. El a cuestiona tambe cu Polis ta papia di cosnan cu abogado no a haya. Mr. Sjiem Fat ta considera esaki un violacion di e proceso.
ACUSADO CONDENA NA 5 AÑA DI PRISON
Hues a sera tratamento di e caso y a dicta sentencia. Hues ta haya cu H.L.B. a haci 2 atraco y 2 biaha a forza hende duna nan pertenencia. Hues ta haya legalmente proba tur cuater caso. Hues a bisa cu casonan asina ta crea sentido di inseguridad no solamente cerca e victimanan sino e comunidad na San Nicolas. Hues a tuma H.L.B. na malo pa esaki. Hues ta confirma exigencia di Fiscal. Hues a condena H.L.B. na 5 aña di prison, kitando e tempo cu e tabata sera den KIA. Hues ta aproba e demanda di daño di 805,43 florin. Hues a pone e medida di pago.
