ORANJESTAD (AAN): E homber Dominicano J.R.M. di 47 aña biba na Aruba, riba Diahuebs mainta a scucha Fiscal exigi 2 aña di prison di cual 1 aña ta condicional.
Fiscal ta haya J.R.M. culpabel di entre 1 April 2022 y 28 Februari 2023 a duna hospedahe na un cantidad di muher indocumenta kendenan tabata haci prostitucion ilegal den San Nicolas. J.R.M. ta nenga di tabata sa cu e muhernan ta indocumenta y cu nan tabata haci prostitucion. En total ta 13 muher indocumenta a worde gara y expulsa for di Aruba.
Huur apartamentonan: Segun J.R.M. no ta berdad cu e tabata duna hospedahe na e muhernan ilegal. El a bisa Hues cu tur e muhernan a bin via aeropuerto, como turista y door cu no por paga hotel, nan a bay keda den e apartamentonan. Hues a mustra cu J.M.R. tin contract cu doño di e apartamentonan. Tin 6 apartamento na Rembrandtstraat y otro 6 na B. v.d. Veen Zeppenfeldtstraat na San Nicolas.
Segun J.R.M., e tabata huur e apartamentonan cu autorizacion di doño. Segun J.R.M. e tabata encarga cu e huurmento. Hues a puntra si J.R.M. tabata gana placa cu esaki. Segun J.R.M. cu e no tabata gana placa cu e huurmento sino pa cubri gastonan di coriente y awa. Pa luna e huur total ta 3.500 Florin segun J.R.M.
Cantidad di muher deteni pa prostitucion ilegal: Hues a mustra cu Polis a bisa cu a haya tip di Warda Nos Costa, cu tin prostitucion den apartamentonan na San Nicolas. Polis a bay haci investigacion na e apartamentonan riba 1 November 2022. A detene y interoga 4 muher. Hues a mustra cu e muher C.L. a declara cu e ta bin regularmente Aruba pa prostitucion y a paga 75 Florin pa dia na J.R.M. pa un apartamento.
E muher C.W. a declara cu el a bin Aruba como turista pa 3 dia na October 2022 y desde 24 October 2022, e ta huur apartamento for di J.R.M. Promer di esey na Juni 2022 tambe el a traha como prostituta. Segun J.R.M., e no tabata sa cu nan tabata traha como prostituta. Hues a sigui bisa cu e muher E.S.L., a bisa cu el a bin Aruba pa traha como prostituta.
Hues a bisa cu Polis dia 28 Februari 2023, a bolbe haci investigacion. A detene diferente muher. E muher A. a declara cu el a yega Aruba 7 Februari 2023 pa 10 dia y tabata ilegal. El a bisa cu J.R.M. sa cu e tabata traha como prostituta. E muher J.C. a bisa cu e ta trahando 7 aña caba den prostitucion. El a bin hunto cu A. y tabata comparti apartamento cu A.
Segun J.R.M., ta e amigo di A. a bin huur apartamento. Hues a sigui bisa cu e muher H. a bisa cu e desde Januari 2023 e tabata ilegal y tabata huur apartamento. El a bisa cu J.R.M. tabata sa cu e ta traha como prostituta. Tur e muhernan aki a worde deteni y saca for di Aruba. Hues a lesa declaracion di mas muher cu a worde deteni na September 2022 na apartamentonan cu J.R.M. ta huur.
Hues a bisa cu un asociacion di barnan na San Nicolas a reclama cu J.R.M. ta concurencia inhusto pa nan. Segun e asociacion, J.R.M. ta huur apartamento mas abao cu barnan ta huur cu e muhernan. J.R.M. a bisa Hues cu e no tabata sa cu e muhernan ta traha prostitucion. Hues a bisa cu en total, 13 muher ilegal a worde deteni.
Fiscal: Fiscal a bisa Hues cu e ta haya J.R.M. culpable di a duna hospedahe na muhernan ilegal cu tabata haci prostitucion ilegal. Fiscal a mustra cu tin diferente di e muhernan a declara cu tabata paga 75 Florin pa dia pa apartamento cu J.R.M. tabata huur. Nan tabata haci prostitucion na e apartamentonan.
Fiscal a sigui bisa cu tin di e muhernan a declara cu nan mester keda paden sino J.R.M. lo yama Warda Nos Costa pa nan. Tin di e muhernan a declara cu ta J.R.M. a bay busca nan na aeropuerto. Na opinion di Fiscal, J.R.M. tabata sa cu e muhernan tabata haci prostitucion ilegal. Fiscal a bisa Hues cu e no ta kere cu J.R.M. no tabata sa di nada.
Fiscal a lesa declaracion di varios di e muhernan pa mustra cu nan tabata paga J.R.M. e suma di 75 Florin pa dia y nan tabata haci prostitucion ilegal. Fiscal ta haya cu J.R.M. tabata haci ganashi. Na opinion di Fiscal, el a bira un costumber di J.R.M. pa huur apartamentonan cu muhernan ilegal cu tabata haci prostitucion. Fiscal a mustra cu tin combersacionnan di WhatsApp, caminda J.R.M. tabata instrui e muhernan kico nan mester bisa Inmigracion pa asina por drenta Aruba como turista y despues ta keda ilegal y traha prostitucion.
Pa cu e castigo, Fiscal a bisa cu e castigo maximo ta 8 aña di prison pa traficacion di ilegalnan. Fiscal ta haya cu J.R.M. a facilita e muhernan ilegal hospedahe pa nan haci prostitucion. E ta haya cu J.R.M. a pone salubridad di Aruba na peliger pasobra no e muhernan ta ilegal y no tabata haci control.
Fiscal a tene cuenta cu ta promer biaha cu J.M.R. a cay sera. Fiscal ta haya cu mester manda un señal cu no ta permiti e tipo di prostitucion aki. Fiscal a exigi 24 luna di prison, di cual 12 luna ta condicional cu un tempo di prueba di 2 aña.
Abogado: Abogado mr. Zara a bisa Hues cu den e caso aki no por papia di cu J.R.M. a usa e muhernan. El a pidi Hues pa tene cuenta, cu declaracion di e muhernan no ta bisa e berdad. Na opinion di abogado, tur ta tira culpa riba J.R.M. Nan sa cu nan lo worde saca for di Aruba y no ta worry kico lo pasa cu J.R.M., kende a worde deteni pa un tempo. E abogado a sigui bisa cu e muhernan aki a bin prepara Aruba y sa kico pa declara ora nan worde deteni.
Na opinion di mr. Zara, J.R.M. no a forza ningun di e muhernan pa haci prostitucion. E unico cos cu el a haci tabata huur nan un apartamento y no tabatin intension di haci ganashi.
E abogado ta haya cu mester declara J.R.M. liber di traficacion di hende. E abogado ta haya cu J.R.M. no tabata ofrece e muhernan trabao di prostitucion. E no tabata traha cita pa e muhernan aki haya cliente. Na opinion di abogado, no tabatin un relacion estrecho entre J.R.M. y e muhernan, manera ley ta exigi, pa por bisa cu e ta complice di traficacion di ilegalnan.
- Zara a remarca cu Immigracion a ‘screen’ y a laga e muhernan pasa y no por bay exigi di J.R.M. cu e mester check si e muhernan aki ta kedando ilegal. E abogado ta haya e exigencia di Fiscal demasiado halto. El a bisa Hues cu J.R.M. no a bay huur apartamento pa haya ganashi sino pa lanta un gym y un barberia. J.R.M. no a hiba negoshi di prostitucion na Aruba.
Hues a sera tratamento di e caso y a bisa cu e lo bay studia e caso y dia 4 April 2024 lo tin sentencia.
