Castigo di 3 aña y mey di prison pa homber cu a ocasiona accidente fatal na Calbas

Ademas di kita su rijbewijs pa 5 aña

• Accident a causa morto di deportista local 

ORANJESTAD (AAN): E acusado Colombiano biba na Aruba, Javier Tejedor Perez Tejedor (J.P.T.) di 64 aña di edad, a presenta Diabierna mainta dilanti Hues pa scucha su sentencia. Hues a haya J.P.T. culpabel di a ocasiona e accidente fatal riba 24 Mei 2024 na Calbas, cu a causa morto di e deportista hoben Jeferson Lopez, kende tabata coriendo su brommer Harley Davidson. Hues no a sigui e exigencia di Fiscal sino a condena J.P.T. na castigo di prison mas abao pero a impone otro castigo acerca.

   Castigo exigi: Ta asina cu Fiscal durante tratamento di e caso dia 17 Januari 2025, a mustra cu apenas par di luna prome, esta na Maart 2023, J.P.T. a wordo condena caba pa core bao influencia y su rijbewijs a wordo kita pa algun luna. Su siguiente aña e ta bolbe haci mesun cos, esta ocasiona un accident, anto den su tempo di prueba.

   Fiscal a remarca cu ta parce cu J.P.T. no a siña di loke el a haci. Fiscal a mustra cu e caso anterior di 14 December 2022, tabata un choque frontal y 2 aña despues, J.P.T. ta ocasiona otro choque frontal riba e mesun caminda. Fiscal a tuma J.P.T. na malo cu e ta purba “tira e culpa riba otro”.

   Pa loke ta e demanda di daño, Fiscal a aproba e gastonan di e brommer y entiero. E resto el a pidi pa declara no admisibel.

   Fiscal a exigi 4 aña di prison pa J.P.T. y pa kita su rijbewijs pa 5 aña. Tambe Fiscal a exigi pa ehecuta e 2 siman di prison cu tabata colga riba J.P.T. su cabez door cu el a bolbe haci e mesun cos durante su tempo di prueba.

   Sentencia: Hues a bisa J.P.T. cu e ta haya legalmente proba cu dia 24 Mei 2024, J.P.T. a causa un accidente fatal na Calbas. Hues a bisa cu J.P.T. tabata burachi y no a duna preferencia. Tambe cu e no tabatin rijbewijs.

   Hues tambe ta haya J.P.T. culpabel di e otro acusacion cu riba 14 December 2022, tambe el a core auto bou influencia di alcohol y ocasiona un accidente frontal.

   Core iresponsabel: Hues den su evaluacion di e caso a mustra cu abogado a bisa cu J.P.T. no a core iresponsabel sino a haci calculacion malo ora el a pasa e truck cu tabata para su dilanti. Hues a mustra cu Fiscal ta haya cu J.P.T. a core hopi iresponsabel. Hues ta haya cu J.P.T. tabata core y a pasa un truck y dal frontal contra e brommer cu consecuencia cu Jeferson Lopez a fayece na e sitio.

   Hues a remarca cu 5 ora despues di e accidente, a haci test di alcohol cu J.P.T. y e resultado tabata 413 µg/l di alcohol cu ta 2x biaha mas cu e cantidad permiti pa ley. Hues ta haya cu J.P.T., apesar di a mira e brommer ta bini, a bay pasa e truck. Na opinion di Hues, J.P.T. mester a para y laga e brommer pasa. Hues ta haya cu na momento di e accidente, J.P.T. tabata hopi burachi. El a mustra cu anterior ya caba J.P.T. a wordo condena pa a core auto bou influencia pero esaki no a pone J.P.T. keda sin core auto bou influencia. Hues no ta haya cu tabatin un truck para riba caminda manera J.P.T. ta bisa y si ta asina mes, J.,P.T. mester a para warda e brommer pasa.

   Pa cu e castigo, Hues a tene cuenta cu e seriedad di e caso. Hues a evalua sentencianan duna di Corte pa casonan similar. Hues ta haya cu J.P.T. tabata core hopi iresponsabel cu a causa morto di Jeferson Lopez.

   Hues a tuma J.P.T. hopi na malo cu el a bay bebe y core auto, siendo cu na 2023, el a wordo condena pa sigui curso pa no core auto bao influencia. Hues a remarca cu e curso no a concientiza J.P.T. pa stop di bebe. Hues a señala cu dia di e accidente, J.P.T. tabatin un cups cu biña den e auto. Hues a bisa cu e ta tuma J.P.T. hopi na malo. Hues ta haya cu mester duna castigo di prison y confisca e auto.

   Castigo: Pa cu e demanda di daño, Hues a aproba e suma di 27.107 florin mas 800 florin pa preparacion di e caso di parti di e famia. Hues a declara no admisible e otro demandanan. El a bisa cu e famia lo por haci un caso civil pa esaki.

   Hues a condena J.P.T. na 3 aña y 6 luna di prison, mas e 2 siman di prison cu tabata condicional di un otro caso di accidente. Tambe Hues a dicidi cu pa 5 aña ta kita e rijbewijs di J.P.T.

   Hues tambe a dicidi cu e auto di J.P.T. ta keda confisca. Pa cu e demanda di daño. Hues a pone e medida di pago. Esey ta nifica cu si J.P.T. no paga e daño, e lo mester bay cera 170 dia.