Ministro Ursell Arends a confirma:
ORANJESTAD (AAN): Diabierna merdia, Minister Ursell Arends ta informa cu señora Zulema Erasmus, a ser postula como e siguiente Minister Plenipotenciario na Washington.
Zulema ta traha pa Gobierno di Aruba desde 2005. Actualmente e ta eherce e funcion di Afdelingshoofd na Departamento di Asuntonan Economico, Comercio y Industria di cual e tin un team encarga cu Business Support, Export Promotion, Investment Promotion y Trade Policy. E tin e funcion tambe di Directora Interino di e Departamento.
Zulema a gradua na Rijksuniversiteit Groningen den International Relations/International Organizations despues di a caba VWO na Colegio Arubano. Un stage na Ministerio di Asuntonan Exterior cerca e Adviseur Koninkrijkszaken a duna Zulema e conviccion cu e miho manera pa aporta na bienestar y progreso di su dushi isla, ta pa traha na Aruba mes.
Semper e tabata di opinion cu aunke Relacionnan Exterior ta un tema di Reino, cu Aruba por ta un pionero riba nivel internacional y por influencia e agenda internacional. Zulema ta mira cu Aruba tin hopi candidatonan cu por funciona exitosamente den diplomacia den Reino Hulandes, pero e oportunidadnan ta limita pasobra mester competi cu Hulandesnan pa un funcion diplomatico na Ministerio di Asuntonan Exterior.
Den su carera como ambtenaar, Zulema a eherce e funcion di beleidsmedewerker na Departamento di Asuntonan Economico, Comercio y Industria, como na Departamento di Asuntonan Exterior. Su experticio den gobierno a amplia ora Zulema a traha na Bestuurskantoor prome como Adviseur di Minister y despues como Waarnemend Secretaris di Conseho di Ministronan, na unda e a experencia di cerca e proceso di decision politico.
Banda di su trabao, Zulema a contribui na empoderacion di hobennan door di ta docente part-time di Organization, Governance and Management na Universidad di Aruba. Desde 2021 Zulema ta Segunda Secretaria-General den e directiva di Comite Olimpico Arubano. Recientemente e a forma parti di e Comision Bishita Real instala door di Minister-President riba solicitud di Gobernador di Aruba.
Zulema ta casa desde 2004 cu Melvin Dabian y ta mama di un yiu muhe di 20 aña studiando na Hulanda y un yiu homber di 16 aña kende tin ambicion pa bira un Student-Athlete den Atletismo.
Un palabra di gratitud na señora Zulema Erasmus pa acepta e reto y ta convenci cu e lo sa di representa nos Pais dignamente na Washington.
