Discurso di Prome Ministro a confirma DIARIO posicion DIARIO
*Planificacion Wever-Croes cu hidrogeno vs. petroleo confirma
*Con reemplasa poder di petroleo cu a reemplasa poder di oro?
ORANJESTAD (AAN) — For di momento cu despues di COVID-19 mundo a reuni pa atende asuntonan di clima y a dicidi cu mester scrap petroleo como combustibel, DIARIO a presenta un posicion cu a bira realidad na 2022.
E pregunta grandi di DIARIO tabata, con ta bay reemplasa petroleo como fuente di placa? DIARIO a mustra riba e motibo grandi cu petroleo ta wordo considera oro den economia mundial.
E poder di petroleo como productor di placa a crea podernan mundial pero tambe gueranan mundial pa e interes financiero cu petroleo tin y cu a keda comproba na Aruba.
Ora Aruba tabata traha riba un futuro estatal nobo, e independencia financiero y economico di Aruba tabata un punto sumamente importante. Ta e dependencia financiero di e islanan Hulandes den Caribe tabata conoce, tabata estorbo pa Reino.
Entrada di Shell na Curacao y despues Lago na Aruba a habri porta pa un economia nobo, pero tambe peligroso pasobra el a kita atencion for di e necesidad pa diversifica economia y no pone tur webo den un macuto.
Na caminda pa Status Aparte Aruba a cuminsa duna contenido real na su posibilidadnan como destinacion turistico y den esaki sigur mester corda riba e celebracion di e Aña di Turismo organisa pa Bestuurscollege di Aruba, ya den culminacion di su lucha pa Status Aparte .
E poder y peligro combina di petroleo tabata motibo di gueranan na un mundo den gara economico di petroleo.
Mundo mester dicidi kico e ta haci cu futuro. Mundo ta wordo destrui dor di cambio di clima of mundo ta deshaci di su economia di petroleo?
E conferencia organisa e siman aki na Aruba a duna prueba di tur e informacionnan cu DIARIO a presenta for di 2020 na Aruba.
Den e nota final di Prome Ministro Wever-Croes ta topa cu e realidad grandi cu DIARIO a trece dilanti pa informa lectornan corectamente di loke mester spera na un momento cu kier despedi di petroleo.
Cuanto placa lo costa pa reemplasa petroleo? DIARIO for di 2018 a cuminsa splica Aruba cu mas tene na proyectonan sin bida, mas problema por spera.
DIARIO for di 2018 a mustra Aruba riba e falsedad di e entrada di Citgo den e situacion mundial y a aplaudi ora Prome Ministro Wever-Croes a busca yabi di e refineria y pone fin na Citgo.
E siman aki noticia a drenta for di Venezuela pa ilustra con e compania petrolero Chevron, cu tin economia di Venezuela ainda na bida, a exigi Venezuela haci Lago di Maracaibo y otro sitionan na Venezuela limpi pa evita desastre na e barconan di Chevron.
Venezuela lo a haci e beachnan di Aruba limpi si barco di azeta trece pa Citgo a zink na costa of a susha costa Arubano?
DIARIO a duna sosten total na e maneho di Prome Ministro Evelyn Wever-Croes cu a introduci e proyecto Eagle, pa Aruba cambio di producto petrolero pisa pa gas.
DIARIO a aplaudi cu no a sigui cu e ultimo intento pa un refineria di azeta, aunke modifica na exigencianan nobo, pero a opta pa hydrogeno.
Den su discurso di despedida Prome Ministro Wever-Croes a mustra riba e reto mas grandi di cambio di clima, cu ta encera e forma cu mundo mester cubri gasto pa cambia di combustibel sigur si sigui tarda pa tuma decisionnan importante manera Gobierno Wever-Croes tabata tin curashi pa tuma.
Di e forma aki, durante e Congreso cu Aruba a tene den cooperacion cu Hulanda, Aruba a bira atrobe e lider sigur den Region di Caribe pa atende e peligro mas serio di destruccion cu cambio di clima ta pa hende y paisnan.
Cambio di petroleo pa energia limpi, ta bira e revolucion di Siglo 21 manera DIARIO a adverti y uno di e motibonan pa e sosten cu nos ta duna, na Aruba y pafor di Aruba pa e maneho cu ta wordo hiba dor di Gobierno Wever-Croes pa Aruba por enfrenta un futuro den cual e ta scrap petroleo como productor di placa pa introduci un productor nobo di placa pero tambe na bienestar di bida y salud di e ciudadano Aruba.
Prome Ministro Wever-Croes a duna mundo prueba atrobe cu e por carga e responsabilidad di ta na timon di e barco Aruba na e momentonan mas dificil den historia economico di mundo, cu ta na peliger!
